Read Paite Chin DIUTERONOMI 17 Bible Online

DIUTERONOMI 17 - Paite Chin bible

DIUTERONOMI 17

¹Bawngtal hiam, belam hiam, demna om leh hoihlouhna himhim nei in TOUPA na Pathian uh kiang ah na kithoih ding uh ahi kei. Hiai lah TOUPA na Pathian uh ading in thil kihhuai ahi ngal a.

²Na lak uah TOUPA na Pathian un a honpiak na tenna koipeuh uah leng pasal hiam, numei hiam leng, thukhun bohsia a pathian dang na va sem a,

³Ka thupiak louh, ni hiam, kha hiam, van a te himhim hiam, TOUPA na Pathian uh mitmuh a thil hoihlou hih a om a;

⁴a honhilh ua, nang na zak a, phatuamngai tak a na dot a, ngai in, a dik a, thu a tel mahmah a, huchibang thil kihhuai Israelte lak a hih a na hihleh;

⁵Huai thil gilou hihmi, pasal hiam, numei hiam na kulh kongkhak pawlam uah pasal hiam numei hiam pen na pikhe ding ua, suang in na deng lum ding uhi.

⁶Theihpih nih hiam, thum hiam kam apan in a si ding mi hihlup ding ahi. Himahleh theihpih khat kia kam apan in hihlup ding ahi kei.

⁷Hihlup ding pen tung ah theihpihte’n a khut uh that ding in a kha masa ding ua, huaikhit chiang in mipi tengteng in, huchibang in na lak ua kipan thil hoihlou na hihmang ding uh ahi.

⁸Sisan kisuah thu ah, sum leh pai thu ah, kivuak thu ah, na tenna ua kiselna thu himhim a nou adia vaihawm haksa lua a hongom leh, TOUPA na Pathian un amun seh ding ah na hoh ding ua,

⁹huai hun a siampu Levite leh vaihawmte kiang a hoh in na dong ding uhi. Amau thu hihpuk ding dan a hon na kawkmuh ding uhi.

¹⁰Huchi in nou TOUPA’N mun a seh ding apan thu hihpuk dan a hon na kawkmuh bang un na hih ding ua, a hon sinsak bang un pilvangtak in na hih ding uhi.

¹¹Thu hihpuk dan a hon na sinsak uh leh vaihawm dan a hon na hilh bangzel un na hih ding uhi. Thu hihpuk dan a hon na kawkmuh uh taklam ah hiam, veilam ah hiam na pialsan ding uh ahi kei.

¹²TOUPA na Pathian uh ma a nasem a pang siampu leh vaihawmmi thu pomlou a, engtat peuhmah, huai mi hihlup ding ahi. Israel apan huai thil hoihlou na hihmang ding uh ahi.

¹³Huchi in mi tengteng in a za ding ua, a lau ding ua, a engtat nawn kei ding uhi.

¹⁴TOUPA na Pathian un a hon piak ding gam na va tun ua, na va luah ua, na va ten ua, “I gam a nam tengteng bang in kumpipa i nei ding uh, na chih chiang un”;

¹⁵TOUPA na Pathian un a telpen kumpipa dia na neih ding uh ahi. Na unau lak ua mi khat na kumpipa ding ua na bawl ding uh ahi. Namdang mi, na unau uh hilou zaw nou hon-uk dia na bawl ding uh ahi kei.

¹⁶Himahleh sakol tampi a kaikhawm ding ahi kei, ahihkeileh sakol zong ding in Aigupta gam a kiknawn din mite a sawl ding ahi kei. A ziak ahihleh TOUPA’N, “Huai lam a na kiknawnlouh ding uh ahi” a chi khinta hi.

¹⁷A lungtang pimang a a omlouhna ding in zi leng tampi a neih ding ahi kei. Dangka leh dangkaeng leng tampi a khawm ding ahi kei.

¹⁸Hichi ahi ding a, a lalgam mangtutphah a a tut chiang in siampu Levite apan kila hiai dan teisawn a, amah adia laibuzial a a gelh ding ahi.

¹⁹Hiai dan amah kiang ah a om gige dia, a damsung teng a, a simzel ding ahi. Huchi in Toupa a Pathian laudan a sinthei dia, hiai danthu tengteng leh danthusehte pilvangtak in a zuithei dia,

²⁰a unaute tung ah a lungtang a kisathei kei dia, dan apan taklam hiam, veilam hiam ah a pialkei ding hi. Huai nung in a lalgam Israel tung ah amah leh a suante’n sawtpi vai a hawm ding uhi.