Read Paite Chin DIUTERONOMI 18 Bible Online

DIUTERONOMI 18 - Paite Chin bible

DIUTERONOMI 18

¹Siampu Levite, Levi nam tengteng in Israelte lak ah tantuan leh goutan a nei ding uh ahi kei. TOUPA kiang a mei a thillat leh amau a tuam pen a ne ding uhi.

²A unaute uh lak ah goutan a nei ding uh ahi kei. A goutan ubel a kiang ua a gen bang in TOUPA ahi ngal a.

³Mipite lak apan kithoihna lanpa siampu a tuam ding hiaite ahi: Bawngtal leh belam liang leh a biangtuai lang nih leh a gilpi siampu a piak ding uh ahi.

⁴Na buh na bal, na uain, na thau tung masate uh, na belam mulmet masak pente uh leng na piak ding uh ahi.

⁵TOUPA na Pathian un TOUPA min a nasem a om tawntung ding in nam tengteng apan amau leh a tapate utoh a tel ahi ngal ua.

⁶Levi mi kuapeuh a tenna Israel gam na tenna ua a koipeuh pawtsan a, a lungsim a kilawptak a TOUPA’N a seh ding mun a a hongpai leh;

⁷Huai a TOUPA ma a om Levite, a unaute mah bang in TOUPA a Pathian min in na a sem ding ahi.

⁸A siamput man uh simlouh in midang tuam nek ding a tang sam himhim ding uhi.

⁹TOUPA na Pathian un a honpiak ding gamsung a na lut chiang un, huai gam a namte thilhih kihhhuaite zuikei un.

¹⁰Na lak uah mi kuamah a tapa hiam, a tanu hiam mei a paisuaksak, mi kuamah aisan ching, mi kuamah mangsan ching hiam, bum hiam, mitkhialdawi tawi hiam,

¹¹Zawl aitawi hiam, mi sisa houpih hiam, khate zawl hiam, misisate dong thei hiam na om ding uh ahi kei.

¹²Hichibang thilhih chingte peuhmah TOUPA adin mi kihhuai ahi ngal ua. Hiai thil kihhuaite ziak in ahi, TOUPA na Pathian un amau a hon delh khiak sak.

¹³TOUPA na Pathian uh ma a na hoihkim ding uh ahi.

¹⁴Huai na valuah ding uh gam a namte’n mitkhialdawi leh aisan chingmite a ngaikhia ua; nou zaw TOUPA na Pathian un huchibang hih a hon phalkei hi.

¹⁵TOUPA na Pathian un keimah bang na unaute uh lak a mi zawlnei a hon bawlsak dia, a ma thu na ngaikhe ding uh ahi.

¹⁶“TOUPA i Pathian aw zaw hon zasak nawn kenla, hiai mei thupi hon musak nawn kenla, ka si kha ding uh” chi a Horeb tang a kikhop khawm ni a TOUPA na Pathian uh na deih dan bang un.

¹⁷TOUPA’N ka kiang ah, a thugen uh a gen hoih ngel uhi.

¹⁸A unaute uh lak ah nangmah bang zawlnei ka bawlsak dia, a kam ah ka thute ka koih dia, a kiang a ka thupiak peuhmah a kiang uah a gen ding.

¹⁹Hichi ahi ding a, ka min a ka thu a gen zuilou peuhmah ka ngaihtuah ding hi.

²⁰Ka min a gen ding ka piaklouh gen teitei zawlnei hiam, pathian dangte min a thugenmi zawlnei hiam, huai zawlnei hihlup ding ahi.

²¹Na lungtang ua, bangchi’n ahia a thu TOUPA gen ahi kei chih i theih ding? na chih uleh,

²²Zawlnei in TOUPA min a thu a gen a, a thilgenpen a hong tangtun kei a, a lohchin kei leh, huaitak ahi, TOUPA gen louh. zawlnei in kiuangsaktak in a gen mawkmawk ahi a, amah na lau ding uh ahi kei, a chi hi.