Read Paite Chin DIUTERONOMI 19 Bible Online

DIUTERONOMI 19 - Paite Chin bible

DIUTERONOMI 19

¹TOUPA na Pathian un a gam uh nou a honpiak namte TOUPA’N a hih manthat khopite na luah ua, a innte ua na ten chiang un;

²TOUPA na Pathian un luah dia nou a hon piakna gam ah nou ading in khopi thum na sep ding uhi.

³Huai khopite zotna ding lampite sial unla, TOUPA’N a hon luahsak ding gam sehthum suah un. Huchi in mi that kha kuapeuh huaite ah a tailut thei ding uhi.

⁴Huai a tailut mi that kha bitthei ding hiaite ahi: Mi a invengte tuma lam a huatna leng nei khollou a that kha peuh mahte;

⁵a invengte toh sing phuk dia gamlak a kuan a sing phuk dia a heipi a sat a, heipi tang kitol in a invengte a denlup khakte ahi ding ua hiai khopite lak a khatpeuh ah a taithei ding uhi.

⁶Sisan phulami in a heh na a pailai a mithatmi a delh a, lampi a sau ziak a delhpha in a va satlum kha ding hi. Tuma lam a huatna na nei khollou a hih ziak in sitak ahi kei hi.

⁷Huaiziak in, Khopi thum nou adin na sep ding uh, chi in thu k’on pia hi.

⁸TOUPA na Pathian un na pi leh pute uh kiang a, a na kichiam bang a na pi leh pute uh piak a na chiam gam a honpiaka;

⁹TOUPA na Pathian uh it ding leh a lampi zui gige dia, tuni a k’on thupiak tengteng na zuih uh leh hiai khopi thumte simlouh in nou ading in khopi thum dang na behlap nawn ding uh.

¹⁰Hiai bel TOUPA’N luah dia a honpiak na gam sung ua poikhoih lou sisan suah a omlouh a, na tung ua sisan a omlouhna ding ahi.

¹¹Himahleh min a invengte a huat a, a tan a, a sual a, si khophial a a vuak a, huai khopite lak a khat a a tai leh;

¹²a khaw upate un mi sawl uhenla, huai mipa vapi uhenla, hihlup ding in sisan phulami khut ah pe khia uhen.

¹³Amah na hehpih ding uh ahi kei a, nou adia hoih ding in Israel gam apan poikhoih lou sisan suahna na hihmang ding uh ahi.

¹⁴TOUPA na Pathian un luah dia a honpiak gam ah a na phuhsa uh na invengte gamgi na suan ding uh ahi kei.

¹⁵Mi a thulimlouhna hiam, a khelhna himhim hiam theihpih khat a hun kei dia; theihpih nih kam hiam, theihpih thum kam hiam a thu hihkip ding ahi.

¹⁶Mi khatpeuh thil hihkhial a ngohdia tup gilou nei theihpih mi adin leh,

¹⁷huai bang a kingohna neite gel TOUPA ma leh huai hun a siampute leh vaihawmte ma ah ading tuak ding uhi.

¹⁸Vaihawmte’n ngenteltak in thu a dong ding ua, ngai in, theihpihmi thu theihpih zuau a hih a, a unau zuau a ngoh ahihleh;

¹⁹a unau tung a hih a tup bangbang amah tung ah na hih ding uh. Huchibang in na lak ua thil hoihlou na hihmang ding uhi.

²⁰Midangte’n a za ding ua, a lau ding uh. Huchi in tunung chiang in huchibang thil hoihlou mawngmawng na lak uah a hih nawn kei ding uh.

²¹Na hehpih ding uh ahi kei. Hinna tang in hinna, mit tang in mit, ha tang in ha, khut tang in khut, khe tang in khe ahi ding ahi.