Read Paite Chin DIUTERONOMI 2 Bible Online

DIUTERONOMI 2 - Paite Chin bible

DIUTERONOMI 2

¹Huan, i kihei ua, TOUPA’N i kiang ua a gen bang in Tuipi San lam ah gamdai ah i lutta ua; Seir tang ni tampi i vel uhi.

²TOUPA’N a hon houpih a,

³“Hiai tang na vel sawt hunta uh. Mallam zuan in kihei un.

⁴Mipite, Seir tang a om, Esau suan na unaute uh gam ah na paisuak ding uhi. Amau a hon na lau ding ua; huaiziak in pilvang mahmah un.

⁵Kisual pih kei un. A gam uh koilai mah leng, khepek a sik khop lel leng nou k’on pekei ding. Seir tang zaw a ma a tuam di’n Esau ka pekhinta hi.

⁶Na nek ding un a an uh sum in na lei ding ua, na dawn ding un a tui uh leng sum in na lei ding uhi.

⁷TOUPA na Pathian un na khut nasep peuhmah uah a hon vualzawl zel a, hiai gamdai zapi na totsuak dante uh leng a thei hi. Hiai kum sawmli sungteng in TOUPA na kiang uah a om a, bangmah na tasam kei uhi, chi’n thupia in” a chi hi.

⁸Huchi in Elat leh Ezion-geber apan Arba lam a pai in Seir tang a om Esau suan i unaute gam i tawn paisuak uhi. I kihei ua, Moab gamdai lam ah i pai uhi.

⁹TOUPA’N ka kiang ah, “Moabte hihbuai kei unla, galsual in leng sual kei un. A gam uh nou a tuam ding in k’on pe kei ding, Lot suante a tuam di’n Ar ka pekhinta hi” a chi hi.

¹⁰Tuma lam in Eminte, huai ah a teng ua, amaute Anakimte bang a milian leh tam, mi sangpite ahi uh .

¹¹Huaite leng Anakimte mah bang a miliante ahi ua, himahleh Maobte’n Emimte a chi uhi.

¹²Tuma lam in Seir tang ah Horte leng a om ua; himahleh Esau suante’n a luahsak uhi. A that ua, a mun uah a tengta ua; Israelte TOUPA’N amau a tuam dia a piak gam mah bang in.

¹³Huchi in, “Thou unla, Zered phaizang kandih ua” a chi a; Huchi in Zered phaizang i kanta uhi.

¹⁴Kadesh-barnea apan i pawt a, Zered phaizang i kan ua, TOUPA’N a kiang ua a kichiam bang a mipi lak a misuan a galdouthei mi tengteng a beivek kikal uh kum sawmthum leh giat ahi.

¹⁵Mipite lak apan a bei sipsip ma uh amaute hihmang di’n TOUPA khut a tung uah a tu hi.

¹⁶Huchi ahi a, huchibang a mipi lak apan galdou thei tengteng a bei ua, a hong sihkhit nung un,

¹⁷TOUPA’N a hon houpih hi.

¹⁸“Tuni in Moab gam, Ar na khen paisuak ding uh ahi.

¹⁹Ammon suante kiang a va tun chiang un, hihbuai kei unla, kisual pih kei un. Ammonte gam nang a tuam ding in k’on pe kei ding. Lot suante a tuam di’n ka pekhinta” a chi hi.

²⁰Huai leng Rephaimte gam bang a sim ahi sam; huai ah tuma lam in Rephaimte a teng uhi. Himahleh Ammonte’n zaw Zamzummim a chi uhi.

²¹Anakte bang a mi lian leh tam leh mi sang pipi ahi ua; himahleh TOUPA’N a hihmang a, amau a luah leuleu ua, a mun uah a tengta uhi.

²²Seir tang a om Esau suante Horte a hihman saklai a, a hih bang in; Huchi in amau a luah ua, a mun uah tu dong in a tenglai uhi.

²³Gaza tan a khoneu chikchik a om Avite Kaptor apan a hongpawt Kaptorte’n a hihmang ua, a mun uah a teng uhi.

²⁴“Thou unla, paikhia unla, Arnon guam kan un; ngai dih ua, Amormi Heshbon kumpipa Sihon leh a gam k’on pekhinta hi; luah peuhmah unla, galsual in sual un.

²⁵Tuni in, van nuai a namchih tung ah nang hon lauhna uh leh hon kihtakna uh ka omsak pan dia, na tanchin a za ding ua, a ling ding ua nang ziak in gimthuak in a om ding uhi” a chi hi.

²⁶Kedemoth gamdai apan Heshbon kumpipa Sihon kiang ah lemna thu pua in mi ka sawl hi.

²⁷“Na gam ah hon paisuaksak dihve. Lamlian zel ah ka pai ding ua, a taklam ah hiam, a veilam ah hiam leng ka pial kei ding uh.

²⁸Ka nek ding un an sum in n’on lei sak dia, ka dawn ding un tui leng sum mah in n’on leisak ding hi.

²⁹Jordan ka kan ua TOUPA ka Pathian un a honpiak gam ka lut masiah uh, Seir a om Esau suante leh Ar a om Moabte’n a hon paisuaksak bang un hon paisuak saklel in” chi in.

³⁰Himahleh Heshbon kumpipa Sihon in a gam ah a hon paisuaksak nuam kei a; TOUPA na Pathian un na khut ua a honpiak theihna ding in a lungtang a khauhsak a, na theihsa uh bang un a paupeng sak hi.

³¹TOUPA’N ka kiang ah, “Ngai in, Sihon leh a gam honpe ding ka hita, a gam tang ding in luah peuhmah in” a honchi hi.

³²Sihon leh a mi tengteng Jahaz a hongsual di’n a hong kuan uh.

³³TOUPA i Pathian in a honpia a; amah leh a tate leh a mite tengteng i that uhi.

³⁴Huailai in a khua tengteng i la ua, huai khuate a mihing tengteng, numei leh a ta neu chikchikte uh tan in i hihmang vek ua, hawi mahmah i neikei uhi.

³⁵I lak khua a gallak a i lak thil leh gante kia ei a tuam ding in i la uhi.

³⁶Arnon guam a om Aroer apan leh guam a khaw om apan Gilead pha in ei adin khua sang lua a omkei hi, TOUPA i Pathian in a hon pevek hi.

³⁷TOUPA’N thu a honpiak bang in Ammon suante gam koimah, Jabok lui tan in mualtung a khuate kim leh kiang gam hitaleh na naih kei uhi.