Read Paite Chin DIUTERONOMI 20 Bible Online

DIUTERONOMI 20 - Paite Chin bible

DIUTERONOMI 20

¹Na Melmate uh dou dia na kuan ua, sakol, kangtalai, mipi nou sang a tamzaw na muh chiang un, na lau ding uh ahi kei. Aigupta gam apan nou hon pikhepa TOUPA na Pathian uh na kiang uah a om hi.

²Kidou dia na kuan dek chiang un siampu in mipi vanaih henla, houpih henla, a kiang uah,

³“Israelte aw, za un, tuin na melmate uh dou ding na hi ua, na lungtang uh patau sak kei un. Lau kei unla, ling sam kei un, amaute lauhsak in omkei un.

⁴Noute hon tonpih a na melmate uh hon dousak a, hon hondam ding TOUPA na Pathian uh ahi, chi hen.

⁵Heutute’n mipite kiang ah, “Inn thak lam a lan nailou na om uhia? A inn ah paikik nawn hen. Kidouna ah a va si kha dia, midang in a lan kha ding hi.”

⁶“Grephuan bawl a, a gah ne nailou na om uhia? A inn ah pai kiknawn hen, kidouna ah a va si kha dia, midang in a ne kha ding hi.”

⁷“Zi kham a kiteng nailou na om uhia? A inn ah pai kiknawn hen. Kidouna ah a va sikha dia, midang in a kitenpih kha ding” chi in gen hen.

⁸Heutute’n mipite kiang ah, “Lau leh patau na om uhia? A inn ah pai kiknawn hen, a unaute uh lungtang amah lungtang bang in a zulsak kha ding” chilai uhen.

⁹Hichi ahi ding a, heutute’n mipite kiang a thu a gen khit un mipite makaih ding sepaih heutute a sep ding uhi.

¹⁰Dou ding khaw kim na vatun chiang un lemna thu gen phot un.

¹¹Hichi ahi ding a, a hon kileppih ua, a na kihon uleh hichi ahi ding a, huai a mi om tengteng nasem dia na goih ding uh ahi dia, na nna a sem ding uhi.

¹²Hon kileppih utlou a, a hon na dou ding uleh um un.

¹³TOUPA na Pathian un na khut ua a honpiak hun chiang in pasal tengteng namsau in na thatvek ding uh ahi.

¹⁴Numei leh a ta neu chik chikte uh, gante leh khua a thil omte leh huai a gallak thil tengteng nou a tuam dia na lak ding uh ahi. TOUPA na Pathian un a honpiak na melmate uh apan gallak thil na ne ding uhi.

¹⁵Hiai namte khua hilou, na tenna ua kipan a khaw gamla tengteng huchibang in na hihzel ding uhi.

¹⁶TOUPA na Pathian un luah dia a honpiak hiai namte khuate zaw TOUPA na Pathian un thu a honpiak bang in a hing peuhmah bangmah na hawi ding uh ahi kei.

¹⁷Hitte, Amorte, Kanante, Perizte, Hivte leh Jebuste na hihmang vek ding uhi.

¹⁸A pathiante uh tung a a hih zel uh thil kihhuai tengteng a hon sinsak louhna ding un hihmang vek un. Huchilou in zaw TOUPA na Pathian tung ah thil na hihkhial kha ding uhi.

¹⁹Lak tuma na dou uh khua sawtpi na um chiang un, a singte uh heipi in na phuk ding uh ahi kei, na nekding uh ahi ngal a. Huai khopi douna a zat ding in leng na phuk ding uh ahi kei, huai gam a singte mihing hinna ahi ngal a.

²⁰Himahleh gah neilou singte bel phuk in na hihse thei ding ua, na doute khua na lakzoh masiah uh a douna vanzat in na zang ding uhi.