Read Paite Chin DIUTERONOMI 21 Bible Online

DIUTERONOMI 21 - Paite Chin bible

DIUTERONOMI 21

¹TOUPA na Pathian un luah dia a honpiak gamsung a thahsa mi a na om a, a that mi theihlouh ahihleh,

²na upate uh leh na vaihawmtute uh a hongpai ding ua, a thahna kim khua apan a teh ding ua,

³Hichi ahi ding a, a luang apan khaw naipen khua a upate’n bawnghon lak a bawngla, zat nailouh, hakkol paw nailou a kai ding uhi.

⁴Huai khua upate’n bawngla, tuiluanna, lei lehlouh leh bangmah chinlouhna guam ah a kaisuk ding ua, guam ah a ngawng a tan ding uh.

⁵Levi tapa siampute’n a honzuan ding ua, amau TOUPA na Pathian un a nasemmi leh TOUPA min a vualzawlmi dia a sehte uh lah ahi ngal ua; thubuai leh kivuak thu a gen bangbang uh ahi ding ahi.

⁶Luang naihpen khua upa tengteng in guam a bawngla ngawng a tan tung uah a khut uh a sil ding uhi.

⁷“Ka khut un hiai sisan a suahkei a, ka mit un leng a mu sam kei.

⁸TOUPA aw, na tatkhiak, na mi Israelte lak ah poikhoihlou sisan suahna mawh hon khusak ken” chi in a pang ding uhi. Huchi in sisan thu ah ngaihdam ahi ding uhi.

⁹Huchibang in TOUPA mitmuh a thil hoih hih in poi khoihlou sisan suahna na lak ua kipan na koihmang ding uhi.

¹⁰Na melmate uh dou dia na kipat khiak ua, TOUPA na Pathian un na khut ua a honpiak a, sal a na pi ua,

¹¹sal lak a numei melhoih tak, na mi deihlam, zi dia na mi deihlam tak na muh leh,

¹²na inn ah na pi dia; a lu a met dia, a khutchin a tan ding hi.

¹³A sal puanak a suahkhe dia, na inn ah a om dia, kha khat sung a nu leh a pa a sun dia, huaikhit in, na luppih dia, a pasal na hidia, amah na zi ahi ding hi.

¹⁴Amah a kipahna na neih kei leh a ut utna a pai na phal ding ahi, sum leh pai in na zuak ding ahi kei a, sumsinna in na zang ding leng ahi kei, amah na daisakta ngal a.

¹⁵Min zi nih nei henla, khat pen deih in khat pen hawta leh, a deihnu leh a huatnu in ta suansak tuakta leh; a upapen a huatnu tapa hita leh;

¹⁶a gou neih a tapate a khopsak hun chiang in a deihpen tapa, a tapa upa a huat pen ta sang a deihsakna a piaktuam ding ahi kei.

¹⁷A huat pen ta, a ta upapen, a neih tengteng apan tan nih huai adia a bawl ding ahi; a hatna bul ahi a, tachil hihna a ma a tuam ahi.

¹⁸Min tapa phengphitak, helhattak nei henla, a nu leh a pa thumanglou in, a sawina uh limsakta kei leh;

¹⁹a nu leh apan a kai ding ua, a khaw upate uh kiang ah a khaw kulh kongpi bul ah a pi ding uhi.

²⁰A khaw upate uh kiang ah, hiai ka tapa uh phengphitak leh helhattak ahi a, ka thu uh leng a mang nuam kei a; kizatbei hat leh khamhat mi ahi, a chi ding uhi.

²¹Huchi in khua a mi tengteng in suang in a denglum ding uhi. Huchibang in na lak ua kipan thil hoihlou na hihmang ding uh ahi. Israel mi tengteng in a za ding ua, a lau ding uhi.

²²Min sihna khop khelhna a hih a, thah a om a, singdawn a na khai uleh;

²³a luang sing ah zankhua in a om ding ahi kei. Huai ni mahmah in na vui ding uhi. Sing a khai peuhmah lah Pathian hamsethuak ahi ngal a. TOUPA na Pathian un luah ding a a honpiak na gam uh na hihnit louhna ding un.