Read Paite Chin DIUTERONOMI 22 Bible Online

DIUTERONOMI 22 - Paite Chin bible

DIUTERONOMI 22

¹Na unau bawngtal hiam, a belam hiam mang na muh leh na daih san ding ahi kei. Na unau inn ah na pi ngeingei ding ahi.

²Na unau inn kiang nai a om ahihlouh a, a neimi na theihlouh uh ahihleh, na inn ah na pitou dia, na kiang ah a om nilouh dia, na unau in a zon hunhun in na pe nawn ding ahi.

³Huchi mah bang in a sabiltung leng na hih ding ahi. Huai mah bang in a puansilh leng na hih ding ahi. Huchi mah bang in na unau thil mansak na muh peuhmah na hih ding ahi, na daihsan mawkmawk ding ahi kei.

⁴Na unau sabiltung hiam, bawngtal hiam, lampi a puk na muh leh na daihsan maimah ding ahi kei. Na phot pih ngeingei ding ahi.

⁵Numei in pasal van a silh ding ahi kei. Pasal in numei van silh ding ahi kei. Kuapeuh huchibang hihmi TOUPA Na Pathian uh adin mi kihhuai ahi.

⁶Lampi a vasabu, sing ah hiam, lei ah hiam, a nou hiam, a tui hiam om, a nou hiam a tui hiam, a pi in a opkhum lai na muh leh a nou a pi toh na lakkhawm ding ahi kei.

⁷A pi na khah ngeingei ding ahi. A nou bel na la thei ding hi. Huchi in nang adin a hoih dia, na damsung na sawtsak ding hi.

⁸inn thak na lam chiang in a tung apan mi kia a, a sisan mawh na khuklouhna din a tung na um ding ahi.

⁹Na grephuan ah thil chi nih na ching ding ahi kei. Huchilou in zaw na chi tuh gah leh na grephuan a gah teng sianglou ahi ding uhi.

¹⁰Bawngtal leh sabiltung lei na kaikhawm sak ding ahi kei.

¹¹Samul leh pat a gatkhawm puan na silh ding ahi kei.

¹²Na kituamna puan uh a gei li ah mong khih na bawl ding uh ahi.

¹³Pasal khat peuh in zi a neih a, a luppih a, a muhdah nawn thepthup a,

¹⁴hiai numei ka kitenpih a, ka luppih a, nungak siangthou a hihna ka mu kei, chi a zahlaktak a bawl a, a min a hihsiat leh,

¹⁵Nungak nu leh pa’n kulh kongpi ah huai khaw upate kiang ah nungak siangthou a hih kichetnate a hontawi ding uhi.

¹⁶Nungak pa’n upate kiang ah, “Hiai mipa ka tanu ka neisak a, a haw nawn thepthup hi.

¹⁷Ngai un, Na tanu nungak siangthou a hihna ka mu kei, chi in zahlaktak in a bawl a, himahleh hiaite ka tanu nungak siangthou a hihna ahi” a chi ding hi. Huchi in huai khaw upate ma ah tua puan a phah ding hi.

¹⁸Huai khaw upate’n huai mi paipih in a gawt ding ua;

¹⁹Israel nungak siangthou a suk minsiat ziak in dangka sekel za khat a liausak ding ua, nungak pa a pe ding uhi, amah zi ahi dia, a damsung in a khen theikei ding.

²⁰Himahleh huai mipa thu a na dik a, nungak siangthou a hih kichetnate muh ahihkeileh;

²¹nungak pen apan kongpi ah a pikhe dia, a tenna khua a mite’n amah suang in a denglum ding uh; a pa inn a kizuak a Israelte lak a thil gilou haihuai mahmah a hih ziak in. Huchibang in na lak ua kipan, huai thil hoihlou na hihmang ding uhi.

²²Pasal khat in pasal nei numei a luppih lai muh ahihleh a luppih pasal leh numei a nih ua a sih ding uh ahi. Huchibang in Israel apan huai thil hoihlou na hihmang ding uhi.

²³Nungak siangthou, mi zikham, pasal khat in khopi a a muh a, a luppih leh;

²⁴a nih un khaw kulh kongpi ah na pikhe ding ua, suang in na denglum ding uh; numei pen khua a om ngal a, a kikou louh ziak in. Pasal pen a invengte zi a hih minsiat ziak in. Huchibang in na lak ua kipan huai thil hoihlou na hihmang ding uh ahi.

²⁵Himahleh min gamlaka midang in zi dia a khamsa nungak a muh a, a pawngsual leh hiai thilhih pasal kia sihsak ding ahi.

²⁶Nungak pen bangmah lohlouh ding ahi. Nungak in sihna khop khelhna bangmah hihlou ahi. Hiai bang mi ahihleh min a invengte sual a, that toh kibang ahi.

²⁷Hiai bang thu ahihleh gamlak ah a vatuak kha a, mi zikham nungak a kikou a, panpih ding mi omlou a hih ziak ahi.

²⁸Min nungak siangthou kuamah khamlouh a muh a, a mat a, a luppih a muh uleh;

²⁹a luppih pasal in nungak pa dangka sekel sawmnga a pe ding ahi. Zi in a nei ding ahi, a hih minsiat tak ziak in. Huchi in a damsung in a khen theikei ding hi.

³⁰Pasal in a pa zi a kitenpih ding ahi kei. A pa lupna a buahsak ding ahi kei.