Read Paite Chin DIUTERONOMI 23 Bible Online

DIUTERONOMI 23 - Paite Chin bible

DIUTERONOMI 23

¹Chiltang kitam ahihkeileh zahmoh atkhiat mi kuapeuh TOUPA mi kikhawmte lak ah a tel ding ahi kei.

²Sawn TOUPA mi kikhawmte lak ah a tel ding ahi kei. Suan sawm tan in a suante TOUPA mi kikhawmte lak ah a tel ding ahi kei hi.

³Ammonte leh Moabte TOUPA mi kikhawmte lak ah a tel ding uh ahi kei. Suan sawmna tan in a lak ua mi TOUPA mi kikhawmte lak a, a tel mahmah louh ding uh ahi.

⁴Aigupta gam apan na hong pawtlai ua tanghou leh tui a, a hon na dawnlouh ziak un leh hon hamsiat dia Mesopotamia gam a Pethor khua a Beor tapa Balaam a goih ziak un.

⁵Himahleh TOUPA na Pathian un Balaam thu a ngaikhe nuam kei a, TOUPA na Pathian un nou a hon it ziak in TOUPA na Pathian un huai hamsia nou adin vualzawlna a suaksak zaw hi.

⁶Na damsung teng un a khamuanna ding uh leh a lohchinna ding uh na ngaihtuahpih ding uh ahi kei.

⁷Edomte na kih ding uh ahi kei, na unaute uh lah ahi ngal ua. Aigupta mite na kih ding uh ahi kei, a gam ua mikhual na hihtak ziak un.

⁸A suan uh thumna apan TOUPA mi kikhawmte lak ah a tel ding uh ahi.

⁹Na melmate uh dou dia giahphual na sat chiang un thil sianglou chiteng apan na kihuikhiak ding uh ahi.

¹⁰Na lak ua kuapeuh zan chiang a amah apan bawtui pawt ziak a thanghuai na om uleh, giahphual apan a pawt dia, giahphual ah a lutnawn ding ahi kei.

¹¹Himahleh ni a hong kai chiang in, a kisil dia; nitum chiang in giahphual ah a lut nawn ding ahi.

¹²Giahphual pawlam ah zun leh ek thakna ding mun na sep ding uh ahi.

¹³Na vanzat lak uah ninluahna na nei ding ua; hichi ahi ding a, na dailen chiang un, huai in lei na khuak ding ua, zun leh ek na thak uh na vuk nawn ding uhi.

¹⁴TOUPA na Pathian un lah na giahphual uah nou hon humbit ding leh na melmate uh honpe din a hongtel ngal a. Huaiziak in, na giahphual uh a siangthou ding ahi. Huchilou in zaw na lak ua thil sianglou a mu dia, a hon paimangsan ding hi.

¹⁵Na kiang ua sikha, a pu hon taikhiak san na pe kiknawn ding uh ahi kei.

¹⁶Na omna ua a deihpen a tel peuhpeuh ah na lak uah a omsam ding ahi. Amah na nuaisiah ding uh ahi kei.

¹⁷Israel tanute lak ah kizuak a om ding ahi kei a, Israel tapate lak ah leng pasal kizuak a om ding ahi kei.

¹⁸Kizuak man hiam, tawkaw man hiam thuchiamna din TOUPA na Pathian inn ah na tawi ding uh ahi kei. TOUPA na Pathian uh adin thil kihhuai ahi.

¹⁹A pung delh in na unau na leitawisak ding ahi kei. Dangka lam a pung hiam, nekding lam a pung hiam, bangpeuh a pung delh a leitawisak louh ding ahi

²⁰Gamdang mite bel a pung delh in na leitawi sak thei ding uh. Himahleh na unaute a pung delh in na leitawi sak ding ahi kei. Huchi in na va luah ding uh gam a na khut ngakna tengteng uah TOUPA na Pathian un a hon vualzawl ding hi.

²¹TOUPA na Pathian uh kiang a thu na chiam un sawt hallou in na pepah ding uh ahi. TOUPA na Pathian un lah hon phutngei ding ahi ngal a. Khial in na mawh kha ding hi.

²²Thuchiam lam a na kidek uleh nou adin khelhna ahi kei ding.

²³Na kam ua pawtsa na hih ding uh ahi: Ut thu a thillat na kam ua na chiam uh TOUPA na Pathian uh kiang a na chiam bang ua na lat pah ding uh ahi.

²⁴Na invengte grephuan a na hoh chiang un na deih zah uh na ne ding ua, himahleh na seng ua na guanlouh ding uh ahi.

²⁵Na invengte buh ding lai mun a na hoh chiang un a vui na khiakthei ding uh. Himahleh na invengte buh ding lai ah kawite na zang ding uh ahi kei hi.