Read Paite Chin DIUTERONOMI 24 Bible Online

DIUTERONOMI 24 - Paite Chin bible

DIUTERONOMI 24

¹Pasal khat in zi a neih a, amah a sianglou banghiam khat a muh ziak a a lungtun kei leh hichi ahi dia, kimakna lai a gelhsak dia, a pedia, a inn apan a pawtsak ding hi.

²A inn apan a pawt nung in midang a vanei thei ding hi.

³A pasal nanungpen in a zakdah a, kimakna lai a gelhsak a, a piak a, a inn apan a pawtsak hiam, a pasal nanung zaw, zi a neipa a si hiam ahihleh;

⁴a pasal masa, amah paisakpa’n a hih nitsa ahi a, a nei nawn theikei ding. TOUPA mitmuh in hiai thil kihhuai ahi. TOUPA’N luah dia a honpiak gam ah khelhna na lutsak ding uh ahi kei.

⁵Pasal zi nei tung sepaih in a kuan ding ahi kei a, bang nasem dia phut ding leng ahi kei. A inn ah kum khat zalen in a om dia, a zi lungnuam tak in a omsak ding hi.

⁶Buh gawizanna hiam, a tunglam suang hiam kichiamna ding in kuamah apan na lentang ding uh ahi kei; mi hinna lettang sak na hi ngal ua.

⁷Kuapeuh, Israel suan, a unaute lak a mi gu a, sal a zat hiam, zuak hiam theihkhiak ahihleh huai gutapa hihlup ding ahi. Huchibang na lak ua kipan thil hoihlou na hihmang ding uh ahi.

⁸Phak hipi tung tang thu ah hoihtak a ettel a, siampu, Levite sinsak dan bangzel a hih din pilvang un. Amau thu ka piak bang in pilvang tak in na hih ding uh ahi.

⁹Aigupta gam apan na hong pawtna lampi a TOUPA na Pathian un Miriam tung a a hih dan theigige un.

¹⁰Bangpeuh na invengte uh na leitawi sakleh a khamna la din a inn ah na lut ding ahi kei.

¹¹inn pua ah na ding dia, leitawi sakmi in tua khamna inn pua ah a hon tawikhe ding ahi.

¹²Mi zawng ahihleh a khamna kem in na giahpih ding ahi kei.

¹³Bang teng hileh nitum chiang in a kichiamna thil a kiang ah pekik in. Huchi in a puantual silh in a ihmu thei dia, nang a hon phatthei ding hi. Huai khamna thilpen na Pathian ma ah nang ading in diktatna ahi ding hi.

¹⁴Na mi goih, mi genthei leh tasam na unau hiam, na gam ua na tenna ua om gamdang mi hiam leng hita leh na simmawh ding uh ahi kei.

¹⁵A sep ni’n a loh na pe ding uh; ni’n a tumkhum ding ahi kei. Mizawng ahi a, huai ah a lungtang a koih hi. Huchilou in zaw na tungtang uah TOUPA a sam dia, nou adin khelhna ahi ding hi.

¹⁶Tate ziak in pate hihlup ding ahi kei a, pate ziak in tate leng hihlup ding ahi sam kei. Michih amah khelhna ziak a hihlup ding ahi.

¹⁷Gamdang mite leh pa neiloute dikloutak a na gensak ding ahi kei. Meithai puan leng khamna din na laksak ding ahi kei.

¹⁸Nou leng Aigupta gam ah sikha na hi ngeita ua, TOUPA na Pathian un huai apan a hontat na hi uh, chih na theihgige ding uh ahi. Huchi in TOUPA na Pathian un na khutngakna chiteng uah a hon vualzawl ding hi.

¹⁹Na lou ua buh na lak un, buhphal na khop maih uleh na lak nawn ding uh ahi kei. Gamdang mite, pa neiloute, meithaite ading ahi. Huchi in TOUPA na Pathian un na khut koihna tengteng uh a vualzawl ding hi.

²⁰Na Olive sing uh na sat chiang un a hiangte na sat ding uh ahi kei. Gamdang mite, pa neiloute leh meithaite ading ahi.

²¹Na grephuan ua na loh chiang un a sang na zong ding uh ahi kei. Gamdang mite, pa neiloute leh meithaite ading ahi.

²²Aigupta gam ah sikha na hita uh, chih na theigige ding uh ahi. Huaiziak in, ahi, hiai thilhih dia thu k’on piak.