Read Paite Chin DIUTERONOMI 25 Bible Online

DIUTERONOMI 25 - Paite Chin bible

DIUTERONOMI 25

¹Mi a kinak ua, vaihawmna mun a a hoh uleh, vaihawmte’n a na gensak ding ua, mi diktat siam a tangsak ding ua, migilou mawh a tangsak ding uhi.

²Hichi ahi ding a, migilou zep tuakmah ahihleh, vaihawm min a lumsak dia, a ma ah a zep ding ahi. A gitlouh dungzui a zep ding zah bikhiah ding ahi.

³Sawmli vei tan zep theih ahi dia, huai val zaw hilou in. Hiai sang a val a zep leh na unaupa uh na zahlaksak lawkha ding uh.

⁴Bawngtal in buh a chil lai in a muk na gak ding uh ahi kei.

⁵Unaute teng khawm uhenla, tapa neilou in a lak ua khat si leh, a sipa zi in pawlam a midang a kitenpih ding ahi kei. A pasal unaupa in a luah dia, zi in a nei dia, a pasal unau mohpuakna tung ah a hih ding ahi.

⁶Hichi ahi ding a, a tachil suansak in Israel lak a, a min a manlouhna din a unau sip a min a pu ding ahi.

⁷Aman a unaupa zi kitenpih a utkei leh, a unaupa zi kulh kongpi a upate kiang ah a hohtou dia, “Ka pasal unaupa’n Israel lak a a unaupa min omsak zel a utkei a, ka pasal unaupa hih ding ka tung ah a hih nuam kei” a va chi ding hi.

⁸Huchi in a khaw upate un amah a sam ding ua, a houpih ding ua aman, “Ka kitenpih nuam kei” chi a apan leh;

⁹A unaupa zi a kiang ah upate ma ah a hong dia, upate ma a va naihtou dia, a khedap a suahsak dia, a mai ah a chil a se ding hi. “A unaupa inkuan khotuah nuam loupa tung ah hichibang a hih hi ngeingei hen” a chi ding hi.

¹⁰Huchi in, inkuan khedap suahsakpa, chi in Israelte lak ah a min putsak ahi ding hi.

¹¹Mi kilai uhenla, a khat penpa zi in a kilaih pihpa apan a pasal hon khe din a zahmoh kaihsakta leh;

¹²a khut na tansak ding uh ahi. Na hehpih ding uh ahi kei.

¹³Na ipsung uah bukna suang chi tuamtuam, a gik leh a zang na nei ding uh ahi kei.

¹⁴Na inn uah tehna chi tuamtuam, a lian leh a neu na kem ding uh ahi kei.

¹⁵Bukna diktak leh hoihtak na nei ding uh ahi. Tehna diktak leh hoihtak na nei ding uh ahi. Huchi in TOUPA’N a hon gam piak ah na damsawt ding uhi.

¹⁶Huchibang hihmi, diktatlou tak a hih tengteng TOUPA na Pathian un a kih hi.

¹⁷Aigupta gam apan na hong pawtna lampi ua Amalekte’n a hon na bawl dan uh:

¹⁸Pathian leng lau lou a, na bahlai uh leh na nguailai ua lampi a hon kituahpih a, na lak ua a nanungpente, na nunglam ua hatloute, na bahlai leh na gimlai ua a hon na sualdante uh theigige un.

¹⁹Huaiziak in hichi ahi ding a, TOUPA na Pathian un luahdia gam a honpiak chiang in, na kim ua na melma tengteng ua pan TOUPA na Pathian un galmuanna a honpiak chiang in van nuai a Amalekte theihgigena na hihmang sipsip ding uhi. Na mangngilh ding uh ahi kei.