Read Paite Chin DIUTERONOMI 26 Bible Online

DIUTERONOMI 26 - Paite Chin bible

DIUTERONOMI 26

¹Huan hichi ahi ding a, TOUPA na Pathian un gouluah dia gam a honpiak na va lut ua, na vaten chiang un;

²TOUPA na Pathian un a honpiak na gam leigah tung masapen chiat uh na hontawi ding ua; bawm ah na koih ding ua, TOUPA na Pathian un a min omsakna dia a seh ding ah na hoh ding uhi.

³Huai hun a siampu kiang ah na hoh ding ua, a kiang ah, honpiak dia i pi leh pute kiang a, a chiamna gam ka hongtungta uh, chih tuni in TOUPA na Pathian uh kiang ah i hihlang uhi, na chi ding uh.

⁴Siampu in na khut ua kipan bawm a la dia, TOUPA na Pathian uh maitam bul ah a nga ding hi.

⁵Nou TOUPA na Pathian uh ma ah, “Ka pu uh Suria mi, mi vakvai ahi a, Aigupta gam ah a paisuk a, a vateng a, tawmchik ahi ua; huai ah nam thupitak, thilhihtheitak, tamtak a hong hita uhi.

⁶Aigupta mite’n a hon simmawh ua, a hon hihgenthei ua, nasep haksa pipi a hon semsak uh.

⁷Huchi in TOUPA i pi leh pute Pathian i sam ua, TOUPA’N i aw uh a naza a, i gentheih dan, i gim dan, leh nuaisiah a i omdan a mu hi.

⁸TOUPA’N Aigupta gam apan khut hattak, banzak, thillauhuai tak, chiamtehnate leh thillamdangte in a hon pikhia a;

⁹hiai mun ah a hon pilut a, hiai gam, nawitui leh khuaizu luanna gam a honpia hi.

¹⁰Ngai in, TOUPA aw, nang na honpiak leigah masapen chiatte ka hontawi uhi” na vachi ding uhi. TOUPA na Pathian uh ma ah na vual ding ua, TOUPA na Pathian uh bia in na kun ding uhi.

¹¹TOUPA na Pathian un na inkuante, noute, Levi mite, na lak ua gamdang mite thil hoih a honpiak tengteng ah kipaktak in na om ding uhi.

¹²Kum thum kum, sawm a khat piak kum a na thil tung tengteng uh sawm a khat na piakkhit uleh, Levi mite, gamdang mite, pa neiloute, meithaite’n na omna uah a ne ding uh, a hong khosak theih samna ding un.

¹³TOUPA na Pathian uh ma ah, thu na honpiak tengteng bang in ka inn ua kipan thil siangthoute ka sepkhia ua, Levi mite, gamdang mite, pa neiloute leh meithaite ka peta uh. Na thupiak a koi mahmah ka bohse kei ua, ka mangngilh kei uhi.

¹⁴Ka dahlai un huai ka ne kei ua, ka sian louhlai un ka thehthang sam kei ua. Misi tuam adin leng ka pe kei uhi. TOUPA ka Pathian uh aw ka dawp ua, n’on thupiak tengteng bang in ka hih uhi.

¹⁵Na omna siangthou van apan hon en inla, nawitui leh khuaizu luanna gam, ka pi uh leh pute piak dia na kichiamsa bang in na mi Israelte leh na gam honpiak vualzawl in, na chi ding uh.

¹⁶Tuni in TOUPA na Pathian un hiai dan leh vaihawmte zui ding in thu a honpia hi. Huaiziak in, na lungtang tengteng uh leh na lungsim tengteng ua pom in na zui ding uh ahi.

¹⁷Tuni in TOUPA lampite zui a, a dante, a thupiakte leh a vaihawmte zui a, a aw dawptum in na Pathian ding un na telta uh.

¹⁸Thu a hon chiamsa bang in leh a thupiak tengteng na zuihna ding un TOUPA’N tuni in amah a tuambik hi ding in nou a hon na telta hi.

¹⁹A na gensa bang a TOUPA na Pathian uh adia a Mi Siangthou na hihtheihna ding un leh nam a bawl tengteng tung a phat, min hoih, leh pahtawi a na om theihna ding un, a chi hi.