Read Paite Chin DIUTERONOMI 27 Bible Online

DIUTERONOMI 27 - Paite Chin bible

DIUTERONOMI 27

¹Huan Mosi leh Israel upate’n mipite thu a pia ua, tuni a k’on piak thupiak tengteng zui un.

²TOUPA na Pathian un a hon gam piak a lut dia Jordan na kan ni chiang un hichi ahi dia, suang liantakte na phut ding ua, suanglou na nuh ding uh ahi.

³Na galkah khit chiang un a tung uah hiai danthu tengteng na gelh ding uh ahi. Huchi in TOUPA, na pi leh pute uh Pathian in a hon na chiamsa bang in nawitui leh khuaizu luanna gam, TOUPA na Pathian un a honpiak gam ah na paithei ding uhi.

⁴Jordan lui na galkah khit chiang un hichi ahi ding a, tuni a k’on thupiak bang in Ebal tang ah suangte na phut ding ua, suanglou na nuh ding uh ahi.

⁵Huai ah TOUPA na Pathian uh ading in maitam, suang maitam na bawl ding uh ahi. Vanzat ding in sik na zang ding uh ahi kei.

⁶TOUPA na Pathian uh maitam suang seklouh in na bawl ding uh ahi. Huai ah TOUPA na Pathian uh adin haltum thillatte na lan ding uhi.

⁷Kilepna thillatte in na kithoih ding ua, huai ah na ne ding ua, TOUPA na Pathian uh ma ah kipaktak in na om ding uh ahi.

⁸Suangte ah hiai danthu tengteng teltak in na gelh ding uh ahi, a chi hi.

⁹Mosi leh siampu Levite’n Israel mi tengteng a houpih ua, Israel mite aw, hoihtak in ngaikhia un. Tuni in TOUPA na Pathian uh mite na hong hita uhi.

¹⁰Huaiziak in, TOUPA na Pathian uh thu na zuih ding uh ahi. Tuni a k’on thupiakte leh a dante na zuih ding uh ahi, a chi uhi.

¹¹Huai ni mah in Mosi in mipite thu a pia a,

¹²Jordan luigal na kahkhit chiang un mipite vualzawl ding in Gerizim tang ah hiaite adin ding uh ahi: Simeon nam, Levi nam, Judah nam, Issakar nam, Joseph nam leh Benjamin nam.

¹³Hamsiat ding in hiaite Ebal tang ah adin ding uh ahi: Reuben nam, Gad nam, Asher nam, Zebulun nam, Dan nam leh Naphtali nam.

¹⁴Levite’n a hon gen pan ua, Israel mi tengteng kiang ah aw ngaihtak in,

¹⁵“Khutsiamte khutsuak TOUPA adia kihhuai milim tunkhiak tawm hiam, gukkep peuhmah hamsethuak in om hen” a chi ding ua, mipi tengteng in, “Amen” chi in a na dawng ding uhi.

¹⁶“A nu hiam, a pa hiam zahtaklou peuhmah hamsethuak in om hen” a chi ding ua, mipi tengteng in, “Amen!” a na chi ding uh.

¹⁷“A invengte gamgi suan mi hamsethuak in om hen” a chi ding ua, mipi tengteng in, “Amen!” a na chi ding uh.

¹⁸“Lampi apan mittaw lampi lou a paisak mi hamsethuak in om hen” a chi ding ua, mipi tengteng in, “Amen!” a na chi ding uhi.

¹⁹“Gamdang mi, pa neilou leh meithai vai dikloutak a hawmsak mi hamsethuak in om hen” a chi ding ua, mipi tengteng in, “Amen!” a na chi ding uhi.

²⁰“A pa zi luppih mi hamsethuak in om hen” a pa niklem a hih ziak in, a chi ding ua, mipi tengteng in, “Amen!” a na chi ding uh.

²¹“Bang gan peuhpeuh luppih mi hamsethuak in om hen” a chi ding ua, mipi tengteng in, “Amen!” a na chi ding uhi.

²²“A sanggamnu, a pa tanu hiam, a nu tanu hiam, luppih mi hamsethuak in om hen” a chi ding ua, mipi tengteng in, “Amen!” a chi ding uhi.

²³“A sungnu luppih mi hamsethuak in om hen” a chi ding ua, mipi tengteng in, “Amen!” a na chi ding uh.

²⁴“A invengte gukthah mi hamsethuak in om hen” a chi ding ua, mipi tengteng in, “Amen!” a chi ding uhi.

²⁵“Poikhoihlou thahna dia golhna lami hamsethuak in om hen” a chi ding ua, mipi tengteng in, “Amen!” a chi ding uhi.

²⁶“Hiai danthute zui dia pom kiplou mi hamsethuak in om hen” a chi ding ua, mipi tengteng in, “Amen!” a chi ding uhi.