Read Paite Chin DIUTERONOMI 29 Bible Online

DIUTERONOMI 29 - Paite Chin bible

DIUTERONOMI 29

¹Horeb tang a a kiang ua thu a khun simlouh, TOUPA’N Moab gam a Israel suante kiang a Mosi thu a khunsak, a thukhun thu hiaite ahi.

²Mosi in Israel mi tengteng a sam a, a kiang uah, Aigupta gam a Pharo, a sikha tengteng leh a gam tengteng tung a na mitmuh ngei ua TOUPA’N thil a hih tengteng na mu uhi.

³Khemna thupi mahmahte, chiamtehnate leh thillamdangte na mit mahmah ua na muh uh.

⁴Himahleh TOUPA’N tunitan in theisiam ding lungtang, mu thei ding mitte, za thei ding bilte a honpe naikei hi.

⁵Gamdai ah kum sawmli ka honpi a; na puansilhte uh na silh tul kei ua, na khedapte uh leng na buntul kei lai uhi.

⁶Kei, TOUPA na Pathian uh ka hi, chih na theihna ding un tanghou na nekei ua, uain hiam zu khauh hiam leng na dawn kei uhi.

⁷Hiai mun na hongtun un Heshbon kumpipa Sihon leh Bashan kumpipa Og hondou din a hong kuan ua, amau i na zou uh.

⁸A gam uh i la ua, Reubente, Gadte, Manasseh nam kimkhatte luah din i pia uhi.

⁹Na thilhih tengteng ua na lamzan zel theihna ding un hiai thukhun thute pom unla, zui un.

¹⁰Tuni in na vek un, na nam lupente uh, na upate uh, na heutute uh leh Israelmi tengteng, TOUPA na Pathian ma ah na ding ua;

¹¹na ta neute uh, na zite uh, na tenna ua gamdang mi na om pih uh, na singphukmi uh leh na tuitawi mite uh nangawn in;

¹²TOUPA na Pathian uh kichiamna leh a thukhun tuni a nou toh a bawl a na lut theihna ding un:

¹³Na pipute uh Abraham, Isak leh Jakob kiang a a na kichiam bang leh na kiang ua a na gensa bang a a mite hidia tuni a a hon hihkip theihna ding leh na Pathian uh a hihtheihna ding in;

¹⁴Hiai kichiamna leh thukhun na kiang kia ua khung ka hi kei;

¹⁵tuni a TOUPA i Pathian uh ma a dingte leh tua i kiang ua om loute kiang ah leng ahi.

¹⁶Aigupta gam a i omdan, namdangte pal paisuak a i paidan bang uh na thei ua;

¹⁷a lak ua a thil kihhuaite uleh a milimte uh, sing leh suang, dangka chi leh dangkaeng leng na mu uh.

¹⁸Huchilou in zaw na lak ua pasal hiam, numei hiam, inkuan hiam, nam hiam, huai pathiante be din a lungtang un tuin TOUPA i Pathian uh kiheisan in, na lak uah thil kha leh gamsai selkhiakna bulte na hongom kha ding uh.

¹⁹Huchi ahihleh zaw, hiai hamsia thusamte a zaktak in, amah ki vualzawl tawm in “Paupeng in pai teitei leng le ka bit na ding” chi in a kingaihtuah kha ding.

²⁰TOUPA’N a ngaidam hetkei dia, TOUPA hehna leh a mullitna in huai mi a khuh dia, hiai laibu a hamse tuang tengteng a tung ah a tung dia, TOUPA’N van nuai apan a min a thaimang zaw ding hi.

²¹Hiai dan bu a tuang hamsia thukhun tengteng bang in Israel nam tengteng lak apan hihtuam in thil hoihlou lam ah TOUPA’N a khenkhe ding hi.

²²Khangthak hongom ding, nanung ua na tate uh hongom ding leh gam gamlapi apan a hongpai dingte’n, huai gam a hipi leh TOUPA’N natna a veisakte a mu ding uhi.

²³A gam pumpi mei kat siat leh chi leh kat a dim, haichi lah kipawi lou, bangmah pou lou, sing leh lou mah bang omlou hi ding. TOUPA heh leh thangpaihna Sodom leh Gomorrah, Admah leh Zeboim a lumlet lai a siatna bangmah ahi ding.

²⁴“Nam teng in bangziak in ahia hiai gam hichitel a TOUPA’N a bawl? Hiai thangpaihna thupi bangchi dan ahia?” a chi ding uh.

²⁵Mite’n, “Aigupta gam apan a pikhiak lai a TOUPA, a pipute uh Pathian thukhun amau toh a khun a mangngilh ziak un.

²⁶pathian dangte, a theih ngeilouh uh pathiante, aman a sehsak louhte na sem a, a biak ziak un.

²⁷Hiai laibu a tuang hamsia tengteng tungsak din hiai gam tung ah TOUPA a heh hi.

²⁸Thangpai, heh leh thangpai mahmah in a gam ua kipan a botkhe vek a, gamdang ah a sawnlut hi, tua a omdan bang uh” a chi ding uhi.

²⁹Thil kiselte TOUPA i Pathian a ahi, thil hihlatte bel hiai danthu tengteng i zuih theihna dia eite leh i suante a ahi gige ding ahi.