Read Paite Chin DIUTERONOMI 3 Bible Online

DIUTERONOMI 3 - Paite Chin bible

DIUTERONOMI 3

¹Huaikhit in i kihei ua, Bashan lampi ah i paitou uhi. Bashan kumpipa Og leh a mi tengteng Edre-i ah ei dou ding in a hong kuan uhi.

²TOUPA’N ka kiang ah, “Amah lau ke’n, amah leh a mi tengteng leh a gam na khut ah k’on pekhinta hi. Heshbon a om Amorte kumpipa Sihon tung a na hih bang in amah tung ah na hih ding” a chi hi.

³TOUPA i Pathian in Bashan kumpipa Og leng, a mi tengteng toh i khut ah a honpia hi. Huchi in khat lel leng hawilou in i that vek uhi.

⁴Huailai in a khua tengteng khaw sawmguk, Argob gambup a Bashan kumpipa Og gam tengteng i la vek ua, i lak saklouh khua khat lel leng a omkei hi.

⁵Hiai khua tengteng kulh sang pipi, kongpi leh kalhna neichiat ahi a, kulh neilou khua tampi simlouh in leng.

⁶Heshbon kumpipa Sihon tung a i hih bang in khua a pasal tengteng, numei leh a ta neu chikchikte uh tan in i hihmang sipsip uhi.

⁷Himahleh gan tengteng leh khua a gallak a i lak thilte ei a tuam ding in i la uhi.

⁸Huailai in Jordan gal a om Amorte kumpipa nihte apan Arnon guam apan Hermon tang pha in gam i la uhi.

⁹Hermon Jidonte’n Sirion a chi ua, Amorte’n Senir a chi uhi.

¹⁰Phaigam a khua tengteng leh Gilead gam tengteng leh Bashan gam tengteng toh, Bashan gam a Og gam a khuate, Salek leh Enderi tan in i la uhi.

¹¹Milian a sibangte lak a a khosuak sun Bashan kumpipa Og kia ahi a, ngai dih, a lupna sik ahi a; Ammon suante khua Rabath ah tutan in a om ahi kei maw? Huai lupna mihing tong a teh in a dunglam tong kua, a vailam tong li ahi.

¹²Huai tung in huai gam i luah ua; Arnon guam kiang Aroer apan Gilead tanggam kimkhat tan in, khua omte toh Reubente leh Gadte ka pia hi.

¹³Gilead gam omlai teng leh Og gam Bashan tengteng Manasseh nam kimkhatte ka pia hi, Argob gam tengteng leh Bashan gam tengteng Rephaimte gamchih in a om hi.

¹⁴Manasseh tapa Jair in Argob gam tengteng Geshurte leh Makatte gam tan in a la a, Bashan pen, amah min tam in Havothjair a sa a, tunitan in a chilai uh.

¹⁵Gilead kiang ah Makir ka pia hi.

¹⁶Reubente leh Gadte bel Gilead apan Arnon guam, guam laitak tan in a gam ding un ka pia a; Ammon suante gamgi, Jabok lui tan in.

¹⁷A tumlam gamgi Arabah a Jordan lui, Kinereth apan Arabah Tuipi tan, Pisgah mualpang ken nuai a pai ahi. Arabah Tuipi, Chi Tuipi ahi.

¹⁸Huailai in, TOUPA na Pathian un “Hiai gam nou a tuam ding in a honpia hi. Israelte, na unaute uh ma ah na mihangsan tengteng uh kigalvan in va hohtou sam uhen.

¹⁹Himahleh, na zite uh leh na ta neu chikchikte uh leh na gante uh, gan na hau uh chih ka thei, na khua uah, k’on piaksa ah a na om ding uhi.

²⁰Nou bang a na unaute uh TOUPA’N galmuanga a bawl ma leh TOUPA na Pathian un Jordan gal a gam a piak a luahsam matan uh; Huchi in nou a tuam ding ua ka honpiak ah na hongpai nawn ding uh, chi in thu ka honpia hi.

²¹Huailai mah in Joshua bel, TOUPA na Pathian un huai kumpipa nihte tung a thilhih tengteng na mit in a muvek a; huchi mah bang in na lutna ding gam tengteng tung ah TOUPA’N a hih ding hi.

²²Amaute lau ke’n; a hon doupihpa TOUPA na Pathian uh ahi ngal a” chi in thu ka pia hi.

²³Huailai mah in TOUPA ka ngen a,

²⁴“TOUPA Pathian aw, na sikha kiang ah na thupidan leh na khut hattak na langsak ahi peuhmah ngei hi. Van ah hiam, lei ah hiam na thilhih bang leh na thilhih thupitak bang hihthei pathian kua a om a?

²⁵Hon galkah sak inla, Jordan gal a gam hoihtak, huai tang kilawm tak leh Lebanon hon musak in,” ka chi hi.

²⁶Himahleh noute ziak in ka tung ah TOUPA a heh mahmah a, ka thu a ngaikhe kei a; Huchi in TOUPA’N, “Hunta hen, hiai thu ah hon houpih nawn ke’n, a chi hi.

²⁷Pisgah tangvum ah va paitou inla, tumlam, mallam, simlam, leh suahlam na mit in en inla, en vialvial in. Jordan kanlou ding na hi.

²⁸Himahleh Joshua thupia inla, hanthawn inla, hatsak in. Hiai mipite a pi galkai dia, na va muhtouh ding gam a luah ding uhi” a honchi hi.

²⁹Huchi in Beth peor kiang chin a guam ah i omta uhi.