Read Paite Chin DIUTERONOMI 30 Bible Online

DIUTERONOMI 30 - Paite Chin bible

DIUTERONOMI 30

¹Huan, hichi ahi ding a, hiai thil tengteng na ma ua ka omsak, vualzawlna leh hamsiate na tung ua a hongtun a, TOUPA’N a hon delh zakna nam tengteng lak a na theih khiak nawn ua,

²TOUPA na Pathian lam na ngat nawn ua, tua thu k’on piak bang a nou leh na tate utoh na lungtang tengteng uh leh na lungsim tengteng ua a aw na zuih hun chiang un:

³TOUPA na Pathian un na salhihna uh a hihmang dia, a hon hehpih dia, TOUPA na Pathian un namchih lak a a hon dalhsakna apan a hon pikhawm nawn ding hi.

⁴Na lak ua mi van tawppha a delhkhiak a om uleh, TOUPA na Pathian un huai apan a hon pikhawm ding, huai apan a hon pikhe ding hi.

⁵TOUPA na Pathian un na pi leh pute un a luah gam ah a hon pilut nawn dia, na luah ding uh. Aman a hon lamzang sak dia, na pi leh pute uh khup in a hon pungsak ding hi.

⁶Na hin theihna ding ua TOUPA na Pathian uh na lungtang tengteng uh leh na lungsim tengteng ua na it theihna ding un, TOUPA na Pathian un na lungtang uh leh na suante lungtang a hon sumsak ding hi.

⁷TOUPA na Pathian un hiai hamsia tengteng a hon simmawhte, na melmate uh leh a hon hawte tung ah a tungsak ding hi.

⁸Na hong kihei nawn ding ua, TOUPA aw na zui ding ua, tuni a thu k’on piak, a thupiak tengteng na zui ding uhi.

⁹TOUPA na Pathian un na khutngakna tengteng uah, na gil ua gah ah, na ganhon gah uah leh na gam gah uah hoih a tungsak dia, na pi leh pute uh tung a a kipah bang in na tung uah TOUPA a kipak nawn ding hi.

¹⁰Hiai dan bu a tuang a thupiakte, a dante zui dia TOUPA aw na zuih ua, na lungtang tengteng uh leh na lungsim tengteng ua TOUPA na Pathian uh lam na ngat phot uleh.

¹¹Hiai thupiak, tua k’on piak nou adin a haksa law kei a, gamlat leng a hon gamlat kei hi.

¹²I zak ua i zuih theihna din, “Kua ahia van a hon kahsak a, hon laksak ding?” chih din van a om ahi kei hi.

¹³I zak ua i zuih theihna din tuipi gal ah “Kuan ahia hon va hohsak dia, hon laksak ding?” chih din tuipi gal a om leng ahi sam kei.

¹⁴Na zuih theihna ding un thu in a honnaih mahmah a, na kam uh leh na lungtang uah a om hi.

¹⁵Tuin na ma uah hinna leh hoih, sihna leh hoihlou ka koih hi.

¹⁶TOUPA na Pathian uh it ding, a lampi zui ding, a thupiak, a dan, a vaihawm, zui dia tua k’on thupiak na zuih uleh na hing ding ua, na hongpung ding ua, na valuah ding gam ah TOUPA na Pathian un a hon vualzawl ding hi.

¹⁷Himahleh na lungtang uh a ki heimang a, na ngaihkhiak kei ua, pimang a na om ua, pathian dangte na biak ua, a na uh na sep uleh;

¹⁸na mangthang ngeingei ding uh, chih tuin k’on hilh ahi. Jordan lui kan a, luah dia na va lutna gam ah na damsawt kei ding uhi.

¹⁹Na ma uah hinna leh sihna, vualzawlna leh hamsia ka koih chih tu a hon theihpih ding in lei leh van ka sam ahi. Huchi in hinna tel un, na hinna ding un nou leh na suante uh toh.

²⁰TOUPA na Pathian uh it in, a aw zui in, amah len chinten un, amah na hinna uh, na damsawtna uh lah ahi ngal a. Huchi in na pu uh Abraham, Isak leh Jakob kiang a kichiam a piak gam ah na teng ding uhi, a chi hi.