Read Paite Chin DIUTERONOMI 31 Bible Online

DIUTERONOMI 31 - Paite Chin bible

DIUTERONOMI 31

¹Huan, Mosi in, Israel mite teng kiang ah hiai thu a gen hi.

²“Tuin kum za leh sawmnih ka hita a; ka vialvak zou nawn kei. TOUPA’N ‘hiai Jordan lui na kan kei ding,’ a honchi hi.

³TOUPA na Pathian un na ma uh a pi dia, hiai namte a hon hihsiat sak dia, a gam uh na luah ding uh. TOUPA’N a na gensa bang in Joshua in na ma uh a pi ding hi.

⁴TOUPA’N Amorte kumpipa, Sihon leh Og leh a gam tung ua a hih bang in a tung uah a hih dia; amaute a hihse ding hi.

⁵TOUPA’N amau a honpe dia, thu ka honpiak thupiak tengteng a tung uah na hih ding uhi.

⁶Kuhkaltak leh hangsantak in om un. Lau kei unla, kihta sam kei un. Na kiang ua honpepa TOUPA na Pathian uh ahi ngal a. A hon vuallel sak kei dia, pai leng a hon paisan kei hial ding,” a chi hi.

⁷Mosi in Joshua a sam a, Israel mi tengteng mit muh in a kiang ah, “Hattak leh hangsantak in om in. Hiai mite toh a kiang ua a pi leh pute uh TOUPA’N kichiam a piak a na chiamsa gam ah na lut ngeingei ding uhi, amaute na luahsak ding ahi.

⁸Na ma uh pipa TOUPA ahi dia, na kiang ah a om zel dia, a hon vuallel sakkei dia, pai leng a hon paisan kei hial ding hi. Lau kenla, lunglel sam ken” a chi hi.

⁹Mosi in dan a gelh a, TOUPA thukhun bawm zawng Levi tapa siampute leh Israel upate tengteng a pia hi.

¹⁰Mosi in, amau thu a pia a, “Kum sagih kum, ngaihdam kum teng a bawkta Ankuangluina,

¹¹mun a seh dia Israel mi tengteng TOUPA na Pathian uh ma a hong kilat chiang un, hiai dan Israel tengteng zak in na sim ding uh ahi.

¹²Mipite, numei leh pasal, na ta neu chikchikte uh, na ompih uh gamdang mite, amau a ngaihkhiak ua, a kisin ua, TOUPA na Pathian uh laudan a siam ua, hiai danthu tengteng pilvangtak a a zuihtheihna ding uh leh

¹³a tate uh a theinailoute’n leng a zak ua, Jordan luikan a na valuah ding uh gam a na ten sungteng ua TOUPA na Pathian uh laudansiam a kisin theihna ding un samkhawm in” a chi hi.

¹⁴TOUPA’N Mosi kiang ah, “Ngai in, na sih hun a hong naita; Joshua sam inla, Kihoupihna puanin ah va kihil in, amau thu ka pe ding hi” a chi hi. Huchi in Mosi leh Joshua a hoh ua, kihoupihna puanin ah a va kihil uhi.

¹⁵TOUPA puanin ah meipi ding in a kilak a; meipi ding puanin kongpi lu tung ah ading hi.

¹⁶TOUPA’N Mosi kiang ah, “Ngai in, na pi leh pute kiang ah na ihmu ding hi. Hiai mite a thou ding ua, a va tenna dingte uh lak ah huai gam pathiante lak ah a angkawm ding ua, a hon lehngatsan ding ua, ka thukhun a kiang ua ka khun a bohse ding uh.

¹⁷Huchi in huai chiang in a tung uah ka heh dia, ka lehngatsan dia, ka kibuk mangsan dia, hihsiat in a om ding uh. Thil hoihlou leh mangbatna tampi a tung uah a tung ding hi. Huchi in huai ni’n, i Pathian uh i lak ua a omlouh ziak in hiai thil hoihlou i tung uah a hongtung ahi kei maw? a chi ding uh.

¹⁸Pathian dangte lam nga a thil hoihlou a hih ding tengteng uh ziak in huai ni’n ka kibuk san ngeingei ding hi.

¹⁹Huaiziak in, tuin ‘hiai la gelh inla, Israel suante sinsak inla, a kam uah koih in. Hiai la Israel suante kalhna a kei adia theihpihtu a hih theihna ding in.

²⁰A pi leh pute uh kiang a kichiam a ka chiam, nawitui leh khuaizu luang gam ah ka pi a, ne leh ta in a om ua, a tai ua, a hong thau hial chiang un pathian dangte lam a nga ding ua, a nna uh a sem ding ua, kei a hon hehsak ding ua, ka thukhun a bohse ding uh’.

²¹Hichi ahi ding a, thil hoihlou leh mangbatna tampi a tung ua a hongtun chiang in, hiai la a khelhna uh theihpihtu ahi ding. A suante kam apan mangngilh theih ahi kei ding hi. Tuin ka kichiam gam a ka pilut ma him in leng a lunggel uh a kawi dan ka thei hi,” a chi hi.

²²Huchi in Mosi in, huai la, huai ni mahmah in a gelh a, Israel suante a sinsak hi.

²³Nun tapa Joshua kiang ah hiai thupiak a pia hi. “Hattak leh hangsantak in om in. Israel suante kiang a ka kichiam bang in huai gam ah na pilut ding hi. Na kiang ah ka om ding,” a chi hi.

²⁴Hichi ahi a, Mosi in hiai danthute laibu a gelhkhit a mansa ahihvek nung in:

²⁵TOUPA thukhun bawm zawng Levite Mosi in thu a pia hi.

²⁶“Hiai dan bu la unla, noute kalh a theihpihtu hi din TOUPA na Pathian uh thukhun bawm sik ah koih un.

²⁷Na helhat dan uh leh na paupen dan uh ka thei hi. Ngai un, tua k’on dampih lai a bawn TOUPA tung a hel na hi ua; ka sih nung ngial in houh bangchi phet in a thupizaw diam aw?

²⁸A bil ua zak a hiai thu ka gen a, noute kalh a theihpihtu dia lei leh van ka sap theihna din na nam ua intekpen tengteng leh na heutute uh hon samkhawm un.

²⁹Ka sihnungin nakpitak in na kihihse ding ua, k’on thupiak lampi apan na pial ding uh chih ka thei kilkel hi. A tawp chiang ngial in houh thil hoihlou in a hon buak khum dia; na khut thilhih ua hihheh din TOUPA mitmuh a thil hoihlou na hih ding ziak un” a chi hi.

³⁰Mosi in, Israel kikhawm khawm tengteng zak in hiai la thu a bul apan a tawppha in a genvek hi.