Read Paite Chin DIUTERONOMI 32 Bible Online

DIUTERONOMI 32 - Paite Chin bible

DIUTERONOMI 32

¹Bil na doh un, vante aw, ka gen ding hi. Lei aw, ka kam a thu za in.

²Vuahtui bang in ka thu a zu ding a, Daitui bang in ka thugen a tak ding. Loupa nou dipdip tung a vuah bang leh lounah tung a vuah phin bang in.

³TOUPA min ka phuan ding ziak in Thupina i Pathian pia un.

⁴Amah suangpi ahi, A thilhih a dik kim sipsip hi. A omdan tengteng dan ahi. Pathian muanhuai, thulimlouhna neilou, diktat leh hoih ahi.

⁵Amau leh amau a kihihsia ua, a tate ahi kei uh, gensiat a lohna uh ahi, suan ginalou leh genhak ahi uhi.

⁶Mihai leh pilloute aw, huchi in maw, TOUPA na thuk ding uh? Nou honsuang, na pa uh ahi kei maw? A honbawl a, a hon ding kipsak hi.

⁷Nidanglai nite theigige inla, suan tampi kumte ngaihtuah dih. Na pa dong in, a hon kawkmuh ding, na upate’n leng a honhilh ding uhi.

⁸Tungnung Pen in namte gam a piaklai a, mihing tate a khenlai in namte gamgi Israel suante zah in a khung hi.

⁹TOUPA tantuan zaw a mite ahi ua; Jakob lah a goutan ahi.

¹⁰Gamdai gam ah a mu a, gamdai sia mau honhon ah, a kim ua omkhum in a kem a, A mit laivom bang in a kem hi.

¹¹Muvanlai in a bu a a nou tokthou a, a nou tung ah kha a zap a, a khate a zak a, a tuah a, a kha a a puak bang in;

¹²Gamdang pathian hilou in TOUPA kia in a pi zel hi.

¹³Lei munsangte ah a tuangsak a, lou a thil tung a ne zel a; suangpi apan khuaizu a kikhoh khesak zel a, suangtak apan thau toh;

¹⁴Bawng nawitui khal, belam nawitui, belamnou thau toh, Bashan uain na dawn ding.

¹⁵Himahleh Jeshurun a hongthau a, a hong kipek a; na thau a, na sapha a, na maitai a; a bawlpa Pathian a lehngatsanta, hotdamna Suangpi a ngaineu hi.

¹⁶Gamdang pathiante’n i Pathian mullitna a tokthou a, thil kihhuai in a hehsak hi.

¹⁷Pathian hilou, dawite kiang ah a theih ngeilouh uh pathiante kiang ah, a hong khonung om phing pathian thakte, na pi, na pute un a kihtak ngeilouh uh kiang ah.

¹⁸Nang honsuang Suangpi na ngaisang kei, nang hon bawlpa Pathian na mangngilh lai hi.

¹⁹Huai TOUPA’N a mu a, a mudah a, a tanu leh tapate’n a hih heh ziak un.

²⁰Ka bukmang san dia, a tawpna uh bang ahi dia chih ka en ding a chi. Suan thulimlou ginna neilou tate ahi uhi.

²¹Pathian hilou thil in ka mullitna a tokthou ua; a thil ginalou un a hon hehsak uh; chi a genlouhte ka mullitsak dia, nam haite in ka hehsak ding hi.

²²Ka hehna a kuang a, gawtmun nuainung pen tan in a kang a, lei leh a thilpung a kang ding, tangte kingaknate mei in a kang ding hi.

²³A tung uah siatna ka chiangkhawm dia, a tung uah thal ka khah ding.

²⁴Gilkial in a gongthak ding ua, meisa leh siatna in a kang mang ding ua, a tung uah gamsa hate ka sawl dia, leivui a gulte gu toh.

²⁵Nungak, tangval, nawi nelai, lu a kelsam poute tanpha’n pawlam ah namsau in a si ding ua, sung lam ah launa in.

²⁶Ken, ka delhzak vek ding, mihing lak a amau theihgigena ka hihmang vek ding.

²⁷Melma thangpaihna laulou hileng, a melmate un theikhial in, i khut uh tawisang in a omta, huai teng TOUPA hih ahi kei, a chi kha ding uhi, ka chi hi.

²⁸Pilna neilou namte ahi ua, amau ah theihsiamna a omkei.

²⁹Aw, pil le uh hiaite a theisiam ding ua, a tunung thu uh ngaihtuah ding hive un!

³⁰Bangchi’n khat in sang a delh dia, nih in sing a taikek sak ding ua, a Suangpi un amaute a khawngkhinta hi, TOUPA’N amau a piakkhiak kei ngal leh?

³¹A suangpi uh lah i melmate mahmah theihdan in leng i Suangpi bang ahi kei hi.

³²A grepgui uh Sodom grepgui ahi a, a loute uh Gomorrah loute ahi. A grepte uh sinkha grepte ahi uh, a gahbomte a kha hi.

³³A uainte uh dragon gu leh gulgial gu khatak ahi.

³⁴Hiai ka kholkhawm, ka goubawm a bilh bikbek ahi kei maw?

³⁵Phulak leh thuk zaw kei hih ding ahi, a siksan uh a teu hun chiang in; a siatna ni uh a hong naita, a tung ua thil hongtung dingte a hong tungpahta ding hi.

³⁶TOUPA’N a mite a vaihawm ding, a sikhate leng a lainat ding, a thilhihtheihna uh a bei chih leh kuamah sikha leh noplen a omkei, chih a muh chiang in.

³⁷Aman a pathiante uh koi ah, a muan suangpi uh koi ah;

³⁸a kithoihna thau netute, a dawn thillat uain dawntute? Hong thou in nou hong panpih uhenla, nou hon humbittute hile uh a ke, a chi ding.

³⁹Kei, kei mahmah ka hihthei unla, pathian dang a omkei. Ka that a, ka hingsak a, ka liamsak a, ka damsak hi. Ka khut apan noute hon hunkhe thei kuamah a omkei uhi

⁴⁰Vanlam ah ka khut ka zak a, Keimah hinna lou in ka kichiam hi.

⁴¹Ka namsau tat-hiam a, ka khut a vaihawmna ka let leh ka melmate tung ah phu ka la dia, kei hon hawte ka thuk ding hi.

⁴²Ka thaltangte a sisan uah ka diah dia, ka namsau in sateng ka that bei dia; thahte leh salte sisan toh melmate tung a phulakna a kipan, a chi ding hi.

⁴³Aw, nou nam chihte aw, a mite toh kipak un; a sikhate sisan phuba a la ding hi. Amah doute tung ah phu a la ding, a gam leh a mite adin kilemna bukim a bawl ding.

⁴⁴Huchi in mipite zak in Mosi leh Nun tapa, Joshua in hiai la thu tengteng a gen uhi.

⁴⁵Mosi in huai thu tengteng Israel mi tengteng kiang a a genkhit in, a kiang uah;

⁴⁶Tua na kiang ua k’on thu theihsak ah na lungtang uh koih kip unla, hiai dan tengteng pilvang mahmah a zui din na tate uh thupia un.

⁴⁷Nou adin thil bangmahlou lel ahi kei a, na hinna uh ahi ngal a. Hiai thilhih in luah dia Jordan na va galkahna gam uah na damsawt ding uhi, a chi hi.

⁴⁸Huai ni mah in TOUPA’N Mosi a houpih a,

⁴⁹Moab gam a Jeriko zawn a Abarim tang dung a Nebo tang ah va hohtou inla, Israel suante luah dia ka piak Kanan gam va gal et in.

⁵⁰Na unaupa Aron Hor tang a si a, a chipihte kiang a pi a hihtak mah bang in na kahtouh na tang ah na si dia, na chipihte kiang a pi na hita ding hi.

⁵¹Jin gamdai a Kadesh a Meribah tui a Israel suante lak a ka tung a na khelh ziak in leh Israel suante lak a n’on pahtawilouh ziak in.

⁵²Tua gam na va galmuh dia; himahleh Israel suante ka piak gam ah na lut kei ding, a chi hi.