Read Paite Chin DIUTERONOMI 33 Bible Online

DIUTERONOMI 33 - Paite Chin bible

DIUTERONOMI 33

¹Hiai vualzawlna in ahi, Pathian mi Mosi in a sih ma a Israel suante a vualzawlna:

²Sinai apan TOUPA a hongpai a, Seir apan a kiang uah a thou khia a, Mi Siangthou sang sawm lak apan a hongpai; A khut taklam apan amau adin meikuang bang dan a om.

³Ahi, a mite a it a, Mi Siangthou tengteng na khut ah a om uh. Na khebul ah a tu ua; na thute a zuichiat ding uh.

⁴Mosi in eite dan a honpia, Jakob mipite gouluah ding.

⁵Jeshurun ah amah kumpipa ahi, mipite intekpen leh Israel chi tengteng a omkhawm lai un.

⁶Reuben hing hen, silou in, a mite ahihleh tawm kei uhen.

⁷Hiai Judah vualzawlna ahi. TOUPA Judah aw ngaikhia inla, a mite kiang ah pilut in. A khut amah adin kiching henla, nang a melmate doupihpa hi in.

⁸Levi tungthu ah, na Thummim leh na Urim, na Mi Siangthou kiang ah omsak in, Massah ah na ze-et a, Meribah tuite ah na dou hi.

⁹Ka nu leh ka pa ka theikei, chi in; a unaute leng a thei sam kei hi. Amah tate ngeileng a thei tuankei; na thu a pom ua, na thukhun a zui ngal ua.

¹⁰Na vaihawmte Jakob a sinsak ding ua, Israelte, na dan. Na ma ah gimlim a koih ding ua, na maitam ah haltum thillat.

¹¹A neihte vualzawl in, TOUPA, a khut nasepte a na pom inla; amah doute kawng sat inla, amah hawte kawng toh, adin nawnlouhna ding un.

¹²Benjamin tungthu ah zaw, TOUPA deihtak zaw a kiang ah bit in a teng ding. Nitum in amah a khuh dia, a liangte kikal ah a teng ding.

¹³Joseph tungthu ah zaw, a gam TOUPA vualzawl in om hen, van thil mantam daitui in, tui thuk mahmah nuai lam a tui in.

¹⁴Nisa in a piansak gah manphate leh khapi in a omsak thil mantamte in.

¹⁵Nidanglai tangte a thil deihhuaipente in, tangtawn tang a thil mantamte in.

¹⁶Lei leh a tung a thil mantamte in, loubuk a ompa deihsakna in. Vualzawlna Joseph lu tung ah hongom hen, a unaute apan hihtuam a ompa lusip ah.

¹⁷A thupina bawngtal piang masa thupina bang ahi a, a kite gam bawngtal kite bang ahi. Huai in namchih a si a, kawlmong tan in a si ding. Amaute Ephraim sang sawmte ahi ua, Manasseh sangte ahi uhi.

¹⁸Zebulun tungthu ah, Kipak in, Zebulun, na vakkhiaknate ah, Issakar, na puaninte ah.

¹⁹Tang ah chichih a sam ding ua, huai ah diktatna kithoihnate a lan ding uh. Tuipi buchinna ne ding ahi ngal ua, piaunel a gou kiselte toh, a chi hi.

²⁰Gad tungthu ah, Gad hihlianpa phat in om hen, humpinelkai bang in a teng a, a luzang in a ban a hamkek hi.

²¹Amah adin a hoihna pen a tel a, Dan pepa tantuan mun a amah a tut ziak in, intekpente toh a hoh a, TOUPA vaihawmna dik leh Israelte kiang a vaihawmnate a zui hi.

²²Dan tungthu, Dan humpinelkai nou ahi a, Bashan apan a hong tawm ding.

²³Naphtali tungthu ah, Naphtali aw, deihsakna a lungkim, TOUPA vualzawlna a tai, sim leh tum luah in.

²⁴Asher tungthu ah, Asher tate a vualzawl in om henla, a unaute lak ah tuitum henla; thau ah a khete diah hen.

²⁵Na khedap sik leh dal ahi dia, na damsung ni bang in na hatna leng a om ding.

²⁶Jeshurun Pathian nang hon panpih dia van a tuang, thupitak a van a tuang bang kua mahmah a omkei uhi.

²⁷Tangtawn Pathian na kibukna ahi a, nuai lam ah a tangtawn ban a om, melmate a hon satmang dia, Hihmang in, a chi ding hi.

²⁸Israel bel galmuangtak in amah kia in a teng dia, Jakob tui leh buh leh uain gam ah a om ding, a vante’n leng daitui a kesak ding uhi.

²⁹Na hampha hi, aw, Israel, nangmah bang a TOUPA’N a hotdam mite kua a om a? Nang hon panpihpa phaw, na thupina namsau ahi! Na melmate nang ah a hong kipe ding ua, nang a munsangte uh na tuanchil ding hi.