Read Paite Chin DIUTERONOMI 34 Bible Online

DIUTERONOMI 34 - Paite Chin bible

DIUTERONOMI 34

¹Huan, Mosi Moab phaizang apan Jeriko zawn a Nebo tang, Pisgah tang vum ah a hohtou a; TOUPA’N Gilead gam tengteng, Dan pha in a ensak hi.

²Naphtali leh Ephraim gam tengteng, Manasseh leh Judia gam tengteng, a tumlam tuipi pha in.

³Sim gam leh tum khopi Jeriko phaizang, Zoar pha in.

⁴TOUPA’N a kiang ah, “Hiai gam ahi, Abraham, Isak leh Jakob kiang a, ‘Na suante ka pe ding,’ chi a kichiam a ka na chiam. Muh ahihleh k’on musak peuhmah a, himahleh huai ah na paikei ding,” a chi hi.

⁵Huchi in TOUPA sikha Mosi TOUPA thu bang in Moab gam ah a sita hi.

⁶Beth Peor zawn a Moab gam phaizang ah Toupa’n a vui a; himahleh tunitan in kuamah in a han a theikei uh.

⁷Mosi a sih in kum za leh sawmnih a upa ahi; a mit a mial kei a, a tha leng a kiam tuankei hi.

⁸Israel suante’n Mosi Moab phaizang ah ni sawmthum a kah ua, Huchi in Mosi sun a a kah nite uh a hong beita hi.

⁹Nun tapa Joshua pilna kha in a dim a; Mosi in a tung a, a khut a koih ziak in. Israel suante’n a thu a zui ua, TOUPA’N Mosi thu a piak bang in a hih uhi.

¹⁰Huai nung in Israelte lak ah Mosi bang a TOUPA’N kimaituah a a houpih zawlnei himhim a omta kei hi;

¹¹Chiamtehna leh thillamdang tengteng, Pharo leh a sikha tengteng kiang leh Aigupta gam tengteng a ensak a,

¹²khut hattak leh lauhuai pipi a Israel mi teng mitmuh a Mosi in a hih bang hih a omkei uhi.