Read Paite Chin DIUTERONOMI 4 Bible Online

DIUTERONOMI 4 - Paite Chin bible

DIUTERONOMI 4

¹Huaiziak in, Israelte aw, TOUPA na pi leh pute uh Pathian in a honpiak gam dam a na luah theihna ding ua na zuih ding uh k’on hilh dante leh vaihawmte ngaikhia un.

²TOUPA na Pathian uh thupiak ka honpiak na zuihtheihna ding un, k’on thupiak na behlap ding uh ahi kei a, na kiamsak ding uh leng ahi sam kei.

³Baal-peor ziak a TOUPA thilhih na mit un na mu ua; Baal-peor bemi tengteng TOUPA na Pathian un na lak ua pan a hihmangta hi.

⁴TOUPA na Pathian uh lenkip peuhmahte bel tutan in dam in a omlai chiat uhi.

⁵Ngai un, na va luah ding gam ua leng na zuih zel ding un TOUPA ka Pathian in thu a honpiak bang geih in dante leh vaihawmte k’on hilh hi.

⁶Hiai dan leh thuseh tengteng za a; “Hiai nam thupi, a pil leh a theisiam mite ahi taktak uh” chi ding namte kiang a hiai in na pilna uh leh na theihsiamna uh lak ding a hih ziak in pilvang tak in hiaite zui un.

⁷I sap peuhmah chiang ua TOUPA i Pathian in a honnaih bang a amau naihzel pathian nei nam thupi kua a om ua?

⁸Hichitak a dik, dan leh vaihawmna, tua na ma ua ka khun tengteng bang dan nei nam thupi dang kua a om a?

⁹Bangteng hiheh, pilvang unla, ngenteltak in kikem phot un. Huchilou in zaw na mit un a thilmuhte na mangngilh ding ua, na damsung un na lungtang ua pan a mangkha ding hi. Na tate uh leh na tute uh sinsak un.

¹⁰Horeb tang a TOUPA na Pathian uh ma a na din ua, TOUPA’N ka kiang a, “Mite hon sap khawmsak in, leitung a a om sungteng ua hon kihtak dan a kisin theihna ding uh leh a tate uh sinsak ding in ka thute k’on zasak ding, a honchih ni na mangngilh kha ding uhi” a chi hi.

¹¹Huchi in na hongnaih ua, huai tangbul ah na hong ding uhi. Huailai in mei in vansun zenin huai tang a kang a, meipi vom leh mial in a khuhlai hi.

¹²TOUPA’N mei apan a hon houpih a; a thugen naza ua, himahleh lim bangmah na mu kei ua, aw ging lel naza uhi.

¹³A thukhun zui dia nou thu a honpiak, thupiak sawm na kiang uah a genkhia a, suang pek nih ah a gelh hi.

¹⁴Huailai in luahdia na va galkahna gam ua na zuih ding un dante leh vaihawmte sinsak di’n TOUPA’N thu a honpia hi.

¹⁵Huaiziak in, pilvang mahmah un. Horeb tang a mei apan TOUPA’N nou a hon houpih ni’n lim bangmah na mu kei uhi.

¹⁶Nou leh nou kihihsia in, milim gelh kibawl in, lim kibatpih, a pa lim hiam, a nu lim hiam,

¹⁷lei tung a om gamsa kibatpih, huihkhua a leng kha nei vasa kibatpih,

¹⁸lei a vak thilte kibatpih, lei nuai a tui a om ngasa mawngmawng kibatpih na kibawl kha ding uhi.

¹⁹Vanlam na nga un, ni, kha, aksite, van a om tengteng leng na mu un, TOUPA na Pathian un van nuai a mi tengteng a hon sehsakte un honhip in, hiaite bia in a na uh na sepsak kha ding uh.

²⁰TOUPA’N a mite, a gou hi ding in sik haltuina apan, Aigupta gam apan nou a hon pikhe zawta ahi, tu a na hih mah bang un.

²¹Hiai kia leng hilou in, noute ziak in TOUPA ka tung ah a heh a, Jordan lui ka galkah louh a, na luah ding ua gam hoihtak TOUPA na Pathian un a honpiak a ka lutlouhna di’n leng a kichiam hi.

²²Kei zaw hiai gam a si ding ka hi a, Jordan luigal kahlou ding ka hi. Nou bel na galkah ding ua, hiai gam hoihtak na luah ding uhi.

²³Pilvang mahmah un, TOUPA na Pathian uh thukhun, na kiang ua a khun na mangngilh ding ua, TOUPA na Pathian un a kibatpih himhim bawl a phallouh milimte na ki bawltawm kha mahmah ding uh.

²⁴TOUPA na Pathian uh katmanghat mei, mullithat Pathian ahi.

²⁵Tu leh tate na neih ua, huai gam a sawt kuam na ten nung ua, na kihih thulimlouh ua, banghiam a kibatpih peuh a milim bawltawm lelte na bawl khiak ua, hihheh dia TOUPA na Pathian uh mitmuh a thil hoihlou na hih maizen uleh;

²⁶Jordan kan a na va luah ding uh gam apan na mangthang pah ding uh, chih na tungtang thu ua hon theihpih di’n tuin lei leh van ka chial ahi. Sawt na teng kei ding ua, na mangthang vek mai ding uh.

²⁷TOUPA’N namchih lak ah a hon dalhsak dia, TOUPA’N a hon paimang sakna namte lak ah tawmchik kia na teng ding uh.

²⁸Huai ah, sing leh suang a a bawl uh pathiante, mu theilou peuh, za theilou peuh, ne theilou peuh, dik theilou peuh na be ding uh.

²⁹Himahleh huailai mah a TOUPA na Pathian uh na zon ua, na lungtang tengteng uh leh na lungsim tengteng ua na zon uh leh na mu ding uh.

³⁰Haksa a na om ua, na tung ua hiai thil tengteng a hongtun chiang in, TOUPA na Pathian uh lam na hong nga khongkhong ding ua, a thu na zuita ding uhi.

³¹TOUPA na Pathian uh lah chitna a dim Pathian ahi ngal a; a hon donsak lou kei dia, a hon hihmang kei ding. Na pi leh pute uh kiang a kichiam a a thukhun a mangngilh hetkei ding hi.

³²Na omma uh, nidanglaite sui le uchin leitung a Pathian in mihing a siam nungsiah van nuai ah, hichibang a thil thupi a om ngei in, zak ahi ngei ahia?

³³Na zak bang un, mei apan Pathian aw min a za ngei mawngmawng in, a hing uhia?

³⁴Namdang lak apan khemna, chiamtehna, thillamdang, kidouna, khut hattak, banzak, thil mulkimhuai a TOUPA na Pathian un na mitmuh ua Aigupta gam a a hih tengteng bang a nam pikhe ngam Pathian a om ngei hia?

³⁵TOUPA Pathian ahi, chih na theih theihna ding ua na kiang ua hihlat ahi a; amah loungal a dang a omkei.

³⁶A hon sinsak theihna ding in van apan a aw a hon zasak a, leitung ah a mei thupi a hon musak a, mei apan a thu na za uhi.

³⁷Na pi leh pute uh a it ziak in a nung ua a suante uh a hontela, a mitmuh in a thilhihtheihna thupitak in Aigupta gam apan a honpi khia hi.

³⁸Namdang nou sang a thupi leh thilhihthei zaw a hon delh khiaksak a, a gam uh a hon luahsak a, tua na hih mah bang un a hon lutsak hi.

³⁹Huaiziak in, tuin na lungtang un vom unla, tunglam van ah leh nuailam lei ah TOUPA zaw Pathian ahi, chih thei un. A dang himhim kuamah a omkei hi.

⁴⁰Tangtawn a dia TOUPA na Pathian un nou a honpiak gam ah noumau leh na suante uh adia hoih ding leh na tensawt theihna ding un, a dante leh a thupiakte, tua ka honpiakte na zuih ding uh ahi.

⁴¹Huchi in Mosi in Jordan gal, nisuahna lam pang ah khopi thum a sep hi.

⁴²Tualthatmi, a invengte, tuma lam a leng mudah khollou, mi thatkha humbitna ding in, hiai khua khat peuhpeuh a, a tailut leh humbit in a om ding.

⁴³Huai khuate hiaite ahi uh: Reubente gam a Bezer khopi; Gadte gam Gilead a Ramoth khopi leh Manassehte gam Bashan a Golan ahi uhi.

⁴⁴Hiai Mosi in Israel suante a piak dan ahi.

⁴⁵Hiaite Mosi piak theihsaknate, danthusehte leh dante ahi. Huai bel Aigupta gam apan a hongpawt khiak lai uleh,

⁴⁶Sihon gam, Jordan lui suahlam a Beth Peor kiang phaizang a, a omlai ua a piak ahi. Sihon bel Amorte kumpipa, Heshbon a vaihawmpa, Mosi leh Israelte’n Aigupta apan a hongpaikhiak lai ua a zohpa uh ahi.

⁴⁷Amau Sihon gam leh Bashan kumpipa Og gam a luah uhi. Amau nihte Jordan lui suahlam a Amor kumpipa nihte ahi uhi.

⁴⁸Hiai gam ahihleh Arnon guam gei a Aroer apan Sion tang, Hermon leng a chih uh, pha a kizalh ahi. Sion tang in min dang a nei a, Hermon ahi.

⁴⁹Huai gam in Jordan lui suahlam a Arabah luipiau tengteng, Pisgah tang a tuinakte nuai a Arabah tuipi tan a huap hi.