Read Paite Chin DIUTERONOMI 5 Bible Online

DIUTERONOMI 5 - Paite Chin bible

DIUTERONOMI 5

¹Huan, Mosi in Israel tengteng a samkhawm a, a kiang uah: Israel mite aw, Na sin ua na zuih ding uh dante, vaihawmte tuni a na bil ua na zak ua ka gen ngaikhia un.

²TOUPA Pathian in Horeb ah eite toh kikal ah thu a khung hi.

³TOUPA’N hiai thu i pi leh pute kiang ah a na khungkei a, eite, tu tan a hingdam a omlai tengteng kiang ah ahi, a khun zawk.

⁴TOUPA’N tang ah mei apan kimaituah in a hon houpih a,

⁵Huailai in TOUPA thu nou hon kawkmuh di’n TOUPA toh na kikal uah ka ding a; mei ziak in lah na lau ngal ua, tang ah na hohtou kei uhi.

⁶Kei TOUPA Pathian, Aigupta gam a saltanna inn apan hon pikhepa ka hi.

⁷Kei loungal pathian dangte na nei ding uh ahi kei.

⁸Milim bawl tawm, tunglam van a om hiam, nuai lam lei a om hiam, lei nuailam a tui a om hiam, a koi batpih mahmah na kibawl ding ahi kei.

⁹Huaite ma ah na kun ding uh ahi kei a, a na uh leng na sem ding uh ahi kei. Kei TOUPA na Pathian uh Pathian mullithat, pate khelhna ziak a tate gawtzel, hon mudahte suan thumna leh suan lina tan a gawtzel leh;

¹⁰a hon itte, ka thupiakte zuimi sang tampite tung a hehpihna langsak zel ka hi.

¹¹TOUPA na Pathian min na lou mawkmawk ding ahi kei. TOUPA’N a min lou mawkmawkte lah mawhlou in a khah ngal kei ding hi.

¹²TOUPA na Pathian in thu a honpiak bang in Sabbath ni tang siangthou in.

¹³Ni guk sung nna nasem dia, nna tengteng na sem ding ahi.

¹⁴A ni sagih ni, TOUPA na Pathian ading in Sabbath ahi. Huai ni’n nang, na tapa, na tanu, na sikhapa, na sikhanu, na bawngtal, na sabiltung, na gan lak a a koi mahmah in leng, na inn a gamdang mite’n leng nna himhim a sem ding ahi kei. Nangmah bang in na sikhapate, na sikhanute leng a khawl ding uh ahi.

¹⁵Nang leng Aigupta gam ah sikha na hikhin a, TOUPA na Pathian in huai apan khut hat leh banzak a, a hon pikhiak na hi, chih theigige in. Huaiziak in ahi, TOUPA na Pathian in Sabbath ni tang dia thu a honpiak.

¹⁶TOUPA na Pathian in thu a honpiak bang in na nu leh na pa zahtak in. Huchi in TOUPA’N gam a honpiak ah lamzang in, na damsawt ding hi.

¹⁷Tual na that ding ahi kei.

¹⁸Ang na kawm ding ahi kei.

¹⁹Na gu ding ahi kei.

²⁰Na invengte tung ah theihpih taklou in na pang ding ahi kei.

²¹Na invengte zi na eng ding ahi kei, na invengte inn hiam, a lou hiam, a sikhapa hiam, a sikhanu hiam, a bawngtal hiam, a sabiltung hiam, na invengte thil bangmah na eng ding ahi kei, a chi hi.

²²Hiai thute tang a mei, meipi leh mialsah bikbek apan TOUPA’N aw ngaihtak in na vek ua kikhawmte kiang ah a gen a, a behlap nawn tuankei hi. Huaite suangpek nih ah a gelh a, a honpia hi.

²³Tang a kat lai a, mial apan aw na zak un, hichi ahi a, na nam ua intekpen teng leh na upate un honnaih uhen.

²⁴Nou ngai in, “TOUPA i Pathian in i kiang uah a thupidan leh a letdan a langsak a, mei apan a aw i za uh. Pathian in mihing a houpih a leng na sih tuanlouh dan uh tuni in na theita uhi.

²⁵Huaiziak in bangdia si ding i hi ua? Hiai mei thupitak in a hon kangmang mai ding. TOUPA i Pathian aw i zak nawn leh zaw i si mai ding uhi.

²⁶Mei apan Pathian hing aw i zak bang a za sam a lah hing ngal mihing tengteng lak ah kua a om a?

²⁷Nang va naih inla, TOUPA i Pathian in a gen ding tengteng va ngaikhe dihve. TOUPA i Pathian in na kiang a, a gen tengteng kou kiang ah na gen dia; Huchi in ka na ngaikhe ding ua, ka zui ding uh” na chi uhi.

²⁸N’on houpih lai ua na thugen uh TOUPA’N a naza a; Huchi in TOUPA’N ka kiang ah, “Hiai mipite’n na kiang a thu a gen uh ka naza a; a thugen tengteng uh a gen hoih uhi.

²⁹Huchibang lungsim pu gige le uh aw, laudan a honsiam ding ua, ka thupiak a zui gige ding ua, amau leh a tate uh tangtawn in a lamzang ding uhi.

³⁰Pai inla, a puanbuk ua kiknawn di’n amau hilh in.

³¹Himahleh a luah ding ua ka piak ding gam a a zuih ding ua na sinsak ding thupiak, danthuseh leh dante tengteng k’on piak theihna ding in nang zaw hiai ah om tadih in” a chi hi.

³²Huaiziak in TOUPA na Pathian un thu a honpiak bang a hih ding in pilvang un. Taklam ah hiam, veilam ah hiam na pial ding uh ahi kei.

³³Na va luah ding uh gam a na hin ua, na lamzanna ding uh leh na ten sawt theihna ding un, TOUPA na Pathian un thu a honpiak lampi na zuih tawnsuak ding uh ahi.