Read Paite Chin DIUTERONOMI 6 Bible Online

DIUTERONOMI 6 - Paite Chin bible

DIUTERONOMI 6

¹Luah dia na va galkahna gam ua na zuih ding ua, TOUPA na Pathian un nou hon sinsak dia thu a honpiak, thupiak, danthuseh leh dan hiaite ahi uh.

²Huai bel nou leh na tapate uh leh na tupate un TOUPA na Pathian uh laudan na siam ua, na damsung teng ua a dan leh a thupiak k’on piak tengteng na zuihna ding uh leh na hong ten sawt theihna ding uh ahi.

³Huaiziak in, Israel mite aw, lamzang a TOUPA, na pi leh pute uh Pathian in a hon kamchiam bang a nawitui leh khuaizu luanna gam a nakpitak a na hongpun theihna ding un, ngaikhia unla, zui ding in pilvang un.

⁴Israel mite aw, ngaikhia un, TOUPA na Pathian uh kia TOUPA ahi.

⁵TOUPA na Pathian uh na lungtang tengteng un, na lungsim tengteng un, na hatna tengteng un na it ding uh ahi.

⁶Hiai thu, tuni a ka honpiak na lungtang uah a tam gige ding a;

⁷na tate uh phatuamngai tak in na sinsak ding ua, na in ua na tutlai un, lampi a na pailai un, na luplai un leh na thoh chiang un na gen ding uh ahi.

⁸Chiamtehna ding in na ban uah na vial ding ua, na mit kikal uah talgakna di’n a om ding ahi.

⁹Na inn kongkhak biang leh na kongkhak uah na gelh ding uhi.

¹⁰Hichi ahi ding a, TOUPA na Pathian un na pu uh Abraham, Isak leh Jakob kiang a kichiam a a honpiak gam, na bawlkhiak uh hi hetlou,

¹¹khaw thupi leh kilawm taktakte, na hihdim uh hi hetlou, thil hoih chiteng a dim innte, na leh uh hi hetlou, tuikhuk lehsate, na suan uh hi hetlou, grephuan leh olive singte omna a hon pilut a, na nek ua, na tai chiang un, pilvang mahmah un.

¹²Huchilou in zaw Aigupta gam a saltanna inn apan hon pikhia TOUPA na mangngilh kha mahmah ding uhi.

¹³TOUPA na Pathian uh laudan na siam ding ua, amah nna nasem ding ua, a minlou in na kichiam ding uh ahi.

¹⁴pathian dangte na zui ding uh ahi kei, na kim ua mite pathiante na be ding uh ahi kei.

¹⁵Na lak ua TOUPA na Pathian uzaw Pathian mullithat ahi; TOUPA na Pathian uh na tung uah a heh dia, lei apan a hon hihmang kha ding hi.

¹⁶Massah a na ze-et bang un TOUPA na Pathian uh na ze-et ding uh ahi kei.

¹⁷TOUPA na Pathian un a honpiak, a thupiakte, a thu theihsakte leh a dante pilvang tak in na zui ding uhi.

¹⁸TOUPA mitmuh a dik leh hoih na hih ding uh ahi. Huchi in nou ading in a hoih dia, TOUPA’N na pi leh pute uh kiang a, a chiam gam hoih a lut in, na luahthei ding uhi.

¹⁹TOUPA’N a gensa bang in, na ma ua kipan na melma tengteng uh a hawlkhe ding hi.

²⁰Na tate un, “TOUPA i Pathian un thu a honpiak, a thu theihsaknate, dante, thusehte, bangchidan ahia?” chi a tunung lam chiang a a hondot chiang un,

²¹Nou na tate uh kiang ah, “Aigupta gam ah Pharo sikha i na hi ua, TOUPA’N Aigupta gam apan khut hattak in a hon pikhia hi.

²²TOUPA’N i mitmuh un Aigupta gam tung ah, Pharo tung ah, a inkuanpih tengteng tung ah, chiamtehna leh thillamdang thupi mahmah a musak hi.

²³Eibel honpe dia i pi leh pute kiang a piak ding chi a a kichiam gam a honpiak theihna ding in huai gam apan a hon pikhia hi.

²⁴Huchi in hiai dan tengteng zui ding leh i hoih tawntungna dia TOUPA i Pathian laudansiam ding in TOUPA’N thu a honpia a, tuni a mihinga a honhawi theihna ding in.

²⁵A thu honpiak bang a TOUPA ma a thupiak tengteng zui dia i pilvan leh ei adin damna ahi ding” na chi ding uhi.