Read Paite Chin DIUTERONOMI 7 Bible Online

DIUTERONOMI 7 - Paite Chin bible

DIUTERONOMI 7

¹Nava luah ding uh gamsung a TOUPA na Pathian un a hon pilut a, na ma ua nam tampi, Hitte, Girgaste, Amorte, Kanaante, Perizte, Hivte leh Jebuste, nou sang a thupizaw leh hatzaw nam sagihte, a delhkhiak a;

²TOUPA na Pathian un amaute nou a honpiak a, na thahgam chiang un amaute na hihgam sipsip ding ua; amaute toh thukhun na bawl ding uh ahi kei.

³Zi leh ta in na nei ding uh ahi kei. Na tanute uh a tapate uh toh na kiteng sak ding uh ahi kei. A tanute uh na tapate uh toh na kiteng sak ding uh ahi kei.

⁴Na tapate uh, kei hon zuilaite pathian dangte biakna ah a pikawi mai ding uhi. Huchi in TOUPA na tung uah a heh dia, a hon hihmang pah ding hi.

⁵A tung uah hichibang in na hih zaw ding uh ahi. A maitam uh na hihchim ding ua, a suangphuhte uh na kitam zansak ding ua, a Aserte uh na phuk ding ua, a milim bawl tawmte uh na halvek ding uhi.

⁶TOUPA na Pathian uh ading in lah nam siangthou na hi ngal ua. Leitung a nam tengteng tung a Amah a tuam dia TOUPA na Pathian un a hon tel na hi uhi.

⁷Namdang sang a na tamzawk ziak ua TOUPA’N na tung uah a itna tusak in, a hon tel ahi kei a, namdang tengteng a nam tawmpen na hi zawmah uhi.

⁸TOUPA’N nou a hon it ziak in leh na pi leh pute uh kiang a, a na kichiamna tangtun a ut ziak in ahizaw, TOUPA’N Aigupta kumpipa Pharo khut apan leh saltanna inn apan khut hat mahmah a hon tatkhiak.

⁹Huaiziak in, TOUPA na Pathian uh Pathian ahi chih thei un. Pathian muanhuai, amah it a a thu zuimi tung a suan sang khat tan a a thukhun leh hehpihna zui gige.

¹⁰Amah hawte hihmang dia a maitang mahmah ua thukzel ahi. Amah hawte a halsawt kei dia, a maitang mahmah uah a thuk ding hi.

¹¹Huaiziak in, a thupiakte, a dante, a danthusehte, zui dia tuni a thu k’on piak na zuih ding uh ahi.

¹²Huan, hichi ahi ding a, a vaihawmte na ngaihkhiak ua, na zuih ua, na hih ziak un TOUPA na Pathian un na pi leh pute uh kiang a, a na kichiamna thukhun leh hehpihna na tung uah a zui ding hi.

¹³Noute a hon it dia, a hon vualzawl dia, a hon hihpung ding hi. Piak dia na pi leh pute uh kiang a, a na kichiamna gam ah na gil ua gah leh na leigah uh leng a vualzawl lai ding. Na buhte uh, na uainte uh, na thaute uh; na bawngnou uh leh na belamnoute uh leng a vualzawl ding hi.

¹⁴Nam tengteng tung ah vualzawl na hi ding ua; na lak uah numei hiam pasal hiam, na gan lak uah leng ching himhim a omkei ding hi.

¹⁵TOUPA’N hipi tengteng a hon hihtheng sak vek dia, na theih sa uh Aigupta gam hipite na tung uah a tungsak kei dia, nou honhawte tengteng tung ah a tungsak zaw ding hi.

¹⁶TOUPA na Pathian un a honpiak ding nam tengteng na hihmang vek ding uhi. Na hehpih ding uh ahi kei a, a pathiante uh nna nasem ding uh ahi kei; huaite nou adia thang a hih ding ziak in.

¹⁷Na lungsim ua, “Hiai namte lah ei sang in a tamzaw ngal ua, bangchi’n i hawlkhe thei dia?” chi na hih uh leh,

¹⁸Amau kihta kei un. TOUPA na Pathian un Pharo leh Aigupta mi tengteng tung a a thilhihte theigige un.

¹⁹Ze-etna thupitak na mit mahmah ua na muhte uh, chiamtehnate, thillamdangte, khut hat takte leh banzakte a TOUPA na Pathian un nou a honpi khiak; huchibang in TOUPA Pathian in na mi lauhte uh tung ah a hih ding hi.

²⁰Noumau apan kibute leh a khosuak sunte a manthat vek tan un TOUPA na Pathian un a lak uah tunpite a sawl ding hi.

²¹Amau na lau ding uh ahi kei. Pathian thupitak leh lauhuaitak TOUPA na Pathian uh na lak uah a om hi.

²²TOUPA na Pathian un huai namte awlawl in a hon delhkhiak sak ding. Amau na hihmang pah ding uh ahi kei, huchilou in zaw nou adin gamsate a hong tam lawkha ding uhi.

²³Aman masiah uh TOUPA na Pathian un a honpe dia, buai petmah in a hihbuai ding hi.

²⁴A kumpipate uh na khut uah a honpe dia, a min uh van nuai apan na thaimang sipsip ding uh ahi. Na hih man sipsip tan un kuamah in a hondal zoukei ding hi.

²⁵A pathian lim bawltawmte uh na hal ding uh ahi. Huaite dangkasik hiam, dangkaeng hiam na enlah ding uh ahi kei. Nou adia na lak ding uh ahi kei. Huchilou in zaw na awk kha ding uhi; TOUPA na Pathian uh adia thil kihhuai ahi ngal ua.

²⁶Na inn sung ua thil kihhuai lalut in huai thil bang in hamsiat thuak ding in na kibawl ding uh ahi kei. Kih petmah a kih in na mudah mahmah ding uh ahi, hamsiat thuakna thillah ahi ngal ua.