Read Paite Chin DIUTERONOMI 8 Bible Online

DIUTERONOMI 8 - Paite Chin bible

DIUTERONOMI 8

¹Chidam ludam a na om ua, na hong tam semsem ua, nou honpe dia na pi leh pute uh kiang a TOUPA’N a kichiamna gam na va luah theihna ding un k’on thupiak tengteng zui ding in pilvang un.

²A thupiakte na zui ding uhia, zui lou ding, na lungsim uh theihna dia ze-et ding leh hon hihgim dia gamdai a kum sawmli sung nou a hon pina lampi tengteng theigige un.

³Mihing tanghou kia in a hing kei. TOUPA kam a thu chih pawt in a hing zaw, chih nou a hon theihsak theihna di’n a hon hihgim a, na kial uh a phal a, na theih ngeilouh uh, na pi leh pute un leng a theih ngeilouh uh manna in a hon vak hi.

⁴Hiai kum sawmli sung in na puansilhte uh na silh tulkei ua, na khete uh leng a bawkkei hi.

⁵Min a ta a sawi bang in TOUPA na Pathian un nou a honsawi ahi, chih na lungsim un thei un.

⁶A lampi zui dia amah laudan siam di’n TOUPA na Pathian uh thupiakte na zui ding uh ahi.

⁷TOUPA na Pathian un guam leh tang apan hong pawtkhia luitui, tuikhuk leh tui thukpi omna gam;

⁸buh, barli buh, grep, theipi leh theibuhfai te omna gam; thaunei olive leh khuaizu omna gam;

⁹kitatlak lou a tanghou na nekna ding gam uh, bangmah na taksap louhna ding uh, a suangte bang sik, a tangte dal laihkhiak theihna gam hoih mahmah ah nou a hon pilut ding ahi ngal a.

¹⁰Na neih ua, na tai mahmah chiang un, gam hoih mahmah a honpiak ziak in TOUPA na Pathian uh na phat ding uh ahi.

¹¹A thupiakte, a danthusehte leh a dante, tuni a ka honpiak zuilou in TOUPA na Pathian uh na mangngilh kha mahmah ding uh, pilvang un.

¹²Huchilou in zaw na nek ua, na tai ua, in hoih taktak na lam ua, na luah chiang un;

¹³na ganhon uh, na belamhon uh a hongtam a, na dangka uh, na dangkaeng uh a hongtam a, na thilneih tengteng uh a hongtam hun chiang in na lungtang uh a kisathei kha dia,

¹⁴Aigupta gam a saltanna inn apan nou hon pikhepa TOUPA na Pathian uh na mangngilh mai kha ding uhi.

¹⁵Aman gamdai zatak leh lauhuai tak, gul gukhahte leh aikamte omna, tui omlouhna, gamkeu ah a honpi paisuak a;

¹⁶meisahsuang suangpi apan tui a hon pawtkhesak a, na pi leh pute uh theih ngeilouh, manna in nou a honvak a, tunung chiang khualna a na hoih theihna ding un nou a hon hihgim a, a hon ze-et theihna ding in.

¹⁷“Hiai i sum leh paite eimah hatna leh i khut hatna in a sep khiak ahi” na lungtang un na chi kha ding uh, pilvang un.

¹⁸Tua na kip bang ua na pi leh pute uh kiang a kichiam a thu a khun a hih kipna di’n TOUPA na Pathian uh theigige un, sum leh pai muhkhiak theihna hon pepa lah amah a hingal a.

¹⁹Hichi ahi dia, TOUPA na Pathian uh na mangngilh ua, pathian dangte na zuih ua, a na uh nasep ua, na biak uleh, na mangthang ngeingei ding uh, chih tuni in k’on theisak ahi.

²⁰Na ma ua namdangte a hih manthat bang in noute leng na mangthang ding ua, TOUPA na Pathian aw ngaikhe utlou na hih ding ziak un.