Read Paite Chin DIUTERONOMI 9 Bible Online

DIUTERONOMI 9 - Paite Chin bible

DIUTERONOMI 9

¹Israel mite aw, ngaikhia un, nou sang a thupizaw leh thilhihtheizaw namte, khopi vansun a kulh daikaih leh thupi luah di’n tuni in Jordan galkah a, na kuan ding uh ahi.

²“Milian leh sang, Anak suante, Anak suante ma ah kua ading zou dia?” a chih uh na theih uh leh zaksa uh ahi.

³Huaiziak in, TOUPA na Pathian uh kattum hat mei bang a na ma ua pai ahi, chih tuni in thei un. Aman amaute a hih mangthang dia, a hon hihniam sak ding. Huchi in TOUPA’N na kiang ua a gensa bang in, amau na delh khe ding ua, na hih mangthang pah ding uhi.

⁴TOUPA na Pathian un a hon delh khiaksak khit chiang in, “I diktat ziak a hiai luah dia TOUPA’N hon pilut ahi, na lungsim un chi kei hial un.” Hiai namte a gitlouh ziak un ahizaw, TOUPA’N a hon delhkhiak sak ding.

⁵Na diktat ziak u hiam, na lungsim uh dik ziak hiam in, a gam uh na luahkei ding ua, hiai namte gitlouh ziak leh TOUPA’N na pu uh Abraham, Isak leh Jakob kiang a, a kichiamna hihkip ding in TOUPA na Pathian un amau a hon delh khiaksak ahizaw hi.

⁶Huaiziak in, hiai gam hoih mahmah na diktat ziak ua luah di’n TOUPA’N honpia ahi kei chih thei un. Nam paupengpi lah na hi ngal ua.

⁷Gamdai a TOUPA na hehsak nak dante uh theigige unla, mangngilh kei un. Aigupta gam apan na pawt ni ua kipan hiai mun na hongtun tan un TOUPA tung a helhat na hi uhi.

⁸Horeb ah leng TOUPA na hehsak ua, nou honhih mangthang ding khop hial in TOUPA a heh hi.

⁹Suangpek, na kiang ua TOUPA’N thu a khunna suangpek la dia tang a ka va hohtouh lai in, ni sawmli leh zan sawmli tang ah ka va om a; tanghou lah ka nekei a, tui leng ka dawn sam kei hi.

¹⁰TOUPA’N suangpek nih, Pathian khut zung a gelh a honpia a; huai ah na kikhop khawm ni ua tang tung a mei apan TOUPA’N na kiang ua thu a gen tengteng a tuang hi.

¹¹Ni sawmli leh zan sawmli khit in hichi ahi a, suangpek nih, thukhun suangpek a honpia hi.

¹²TOUPA’N ka kiang ah, “Thou inla, hiai apan paisuk meng in, Aigupta gam apan na pikhiak na mite a kihihse khinta uhi. Zuih dia k’on thupiak lampi apan a pialmangta uh, milim suntawm a kibawl uh” a chi hi.

¹³Huaite ban ah, “TOUPA’N, hiai mite ka etet leh, ngai in, nam paupeng ahi uh.

¹⁴Amau hih mangthang ding leh van nuai apan a min uh thaimang ding in ka hih dandan in ka hih mai ding. Amau sang a nam thilhihtheizaw leh thupizaw in nang k’on bawl ding” chi’n leng a hon houpih lai hi.

¹⁵Huchi in tang apan ka kihei a, ka paisuk a, tang a kangta, thukhun suangpek nihte ka khut lang nih in ka tawi hi.

¹⁶Huchi in ka en a, ngai un, TOUPA na Pathian uh tung ah na khialta uhi. Bawngnou lim suntawm na kibawl ua; TOUPA’N thu a honpiak lampi na pialsanta uhi.

¹⁷Suangpek nihte ka dom a, ka khut lang nih apan ka pai a, na mitmuh un ka hihkhamta hi.

¹⁸Tuma a ka hih bang in ni sawmli leh zan sawmli TOUPA ma ah ka khupboh hi. Amah hihheh dia TOUPA mitmuh a na thilhih khelhsa uh, nou khelhna tengteng ziak in tanghou ka ne kei a, tui leng ka dawn sam kei hi.

¹⁹Nou honhih mangthang dia TOUPA hehna, a thangpaihna leh a lungkimlouhna mahmah lah ka lau ngal a. Himahleh huailai in leng TOUPA’N ka thu a hon ngaihkhiak sak hi.

²⁰TOUPA bel Aron hih mangthang nuam hial khop in a heh a; himahleh Aron mah leng ka thumsak pah ngal hi.

²¹Na khelhna uh ziak a na bawl uh bawngnou lim ka la a, ka hal a, ka satzan a, leivui bang in ka gawinel dimdem a; a nel tang apan a lui hongluang ah ka pai hi.

²²Taberah, Massah leh Kibroth-hattaavah ah leng TOUPA na hih heh uhi.

²³TOUPA’N, K’on gam piak valuah un, chi a, Kadesh-barnea apan a honsawllai in, TOUPA na Pathian uh thupiak na helsan ua, Amah na gingta kei ua, A aw lah na ngaikhe sam kei uhi.

²⁴K’on theih tung apan TOUPA tung a helhat mi na hi gige uh.

²⁵Huchi in TOUPA’N, Ka hih mangthang ding, a honchih ziak in TOUPA ma ah ni sawmli leh zan sawmli sung ka khupboh hi.

²⁶TOUPA kiang ah ka thum a, TOUPA Pathian aw, na thupina a tat, khut hattak a Aigupta gam apan na tatkhiak, na mite leh na goutante hih mangthang ken.

²⁷Na sikha Abraham, Isak leh Jakob theigige inla, hiai mite phengphit dan, gitlouh dan leh a khelh dante uh en ken.

²⁸Huchilou in zaw n’on pikhiakna gam a mite’n TOUPA’N a gam chiam a a pi lut theihlouh ziak leh a muhdah ziak in gamdai a thah di’n a pi khia, a chi kha ding uh.

²⁹Na thilhihtheihna thupitak leh na banzak a na pikhiak, na mite leh na goutante lah ahi ngal ua, ka chi hi.