Read Paite Chin JOHAN 10 Bible Online

JOHAN 10 - Paite Chin bible

JOHAN 10

¹“Chihtaktak in, chihtaktak in, k’on hilh ahi, kuapeuh belam huang a kongkhak a lutlou a, lampi dang a kahlut mi guta leh suamhat ahi.

²Kuapeuh kongkhak a lut belamchingpa ahi.

³Kongkhak ngakpa’n amah a na honsak a; belamte’n a aw a za uh; aman belamte a min un a sam chiat a, a pikhe zel hi.

⁴Amah a tengteng a pawtsaktakin, a ma uh a kai a, belamte’n amah a zuizel uh, a aw a thei uhi.

⁵Midang zaw a zuikei ding uh, a taimangsan zaw ding uh; midangte aw a theihlouh ziak un” a chi hi.

⁶Hiai gentehna Jesu’n a kiang uah a gen hi; himahleh bang thu ahia a kiang ua a gen chih a theikei uhi.

⁷Huchi in Jesu’n a kiang uah a gen nawn a, “Chihtaktak in, chihtaktak in, k’on hilh ahi, Kei belam kongkhak ka hi.

⁸Ka ma a hongpai tengteng gutate leh suamhatte ahivek uh; himahleh belamte’n a thu uh a ngaihsak kei uhi.

⁹Kei kongkhak ka hi; keimah a mi a lutleh, humbit in a om ding a, a lut in a pawt ding a, nekding leng a mu ding hi.

¹⁰Guta zaw, gu ding leh that ding leh hihse ding lou in a hongpai kei; kei zaw hinna a neihna ding ua, tampitak a neihna ding ua, hongpai ka hi.

¹¹“Kei belamchingpa hoih ka hi; belamchingpa hoih in a belamte adin a hinna a pia hi.

¹²Kiloh, belamchingpa tak hilou, belamte amah a hilou in, ngia hongpai a muh in belamte a taisan a; huan ngia in amau a kei a, huchi in belamte a hihdalh hi.

¹³Kiloh ahi a, belamte ading a deihsakna himhim a neih louh ziak in a taimang hi.

¹⁴Kei zaw belamchingpa hoih ka hi;

¹⁵Pa in a hon theih leh ken Pa ka theih bang in kei a ka thei hi, kei a in leng a hon thei hi; huan belamte din ka hinna ka pia hi.

¹⁶Hiai belam huang a lou belam dangte ka nei hi; amau leng ka honpi ding a, ka aw a za ding ua, honkhat in chingpa khat toh a omkhawm ding uhi.

¹⁷Hiaiziakin Pa’n kei hon it ahi; laknawn ding a ka hinna ka piak ding ziak in.

¹⁸Kuamah in hon laksak kei ding, keimah thuthu in ka pe zaw ding hi. Pe thei ka hi a lanawn thei leng ka hi. Hiai thupiak ka Pa apat ka muh ahi” a chi hi.

¹⁹Hiai thu ziak in Judate a kikhen ua, a kilang nawnta uhi.

²⁰A khen tampi in “Dawizawl a hai eive; bangdia a thu ngaikhia na hi uh?” a chi uhi.

²¹A khen in hiai dawizawl thute hi kei e. Dawi in mittaw mit ahihvak thei ahia? a chi uhi.

²²Huan Jerusalem khua a Tempul latna Ankuanglui lai ahi a; huai hun phalbi lai ahi.

²³Pathian biakin, Solomon inlim ah Jesu a kivialleh leh hi.

²⁴Judate’n hongum pelpul ua, a kiang ah, “Bang tan ahia vanglak a n’on bawl ding? Khrist na hihleh chiantak in honhilh in” a chi uhi.

²⁵Jesu’n a kiang uah, “K’on hilhta hi, na gingta tuankei uh; ka Pa min a thil ka hih hiaite’n ka tanchin a theisak uhi.

²⁶Himahleh na gingta kei uhi, ka belam lak a mi na hihlouh ziak un.

²⁷Ka belamte’n ka aw a za uh, ken leng amau ka thei a, amau a honzui uhi.

²⁸A kiang uah tangtawn hinna ka pia; tangtawn in a mangthang kei ding ua, kuamah in ka khut a kipan honsut sam kei ding hi.

²⁹Amau hon pepa ka Pa, mi tengteng sang a thupizaw ahi; kuamah in Pa khut a kipan a sut theikei ding hi.

³⁰Kei leh Pa lah pumkhat ka hi uh” chi in a dawng hi.

³¹Huan Judate’n a denna ding in suang a tawm nawn uhi.

³²Jesu’n amau a houpih a, “Pa a kipan nasep hoih tampi k’on ensak a, huai nasepte lak ah bang nasep ziak in ahia suang a na honden dek uh?” a chi hi.

³³Judate’n a kiang ah, “nasep hoih ziak in suang in k’on dengdek kei uh; Pathian na gensiat ziak leh nang mihing hi ngal a, Pathian a na kibawl ziak ahizaw” chi in a dawng uhi.

³⁴Jesu’n a kiang uah, “Na dan uah, ‘noute pathiante na hi uh k’on chi’ chih gelh ahi ka hia?

³⁵Pathian thu tunnate bawn pathiante a chih leh, Laisiangthou bohsiat theih ahi kei hi.

³⁶Pathian Tapa ka hi, ka chih ziak in Pa’n a seh a, khovel a a sawlpa Pathian na gensia honchi na hi umaw?

³⁷Ka Pa nasem ka hihkeileh hon gingta kei un.

³⁸Himahleh sem ka hihleh kei hon gingta kei mahle uchin ka nasepte bek gingta un; huchi a Pa keimah ah a om chih leh kei Pa ah ka om chih na theihna ua, na theihsiamna ding un” chi in a dawng hi.

³⁹Huaitak in mat a tum nawn ua, himahleh a khut ua kipan a suakta hi.

⁴⁰Jordan luigal ah Johan in a tung a mi a baptisna lam ah a paimang nawn a, huai ah a om nilouh hi.

⁴¹Huan mi tampi a kiang ah a hongpai ua, “Johan in thillamdang bangmah ahihkei a; himahleh Johan in hiai mi tungtang thu a gen peuhmah a na dik mahmah hi” a chi uhi.

⁴²Huan huai ah mi tampi in amah a gingta uhi.