Read Paite Chin JOHAN 12 Bible Online

JOHAN 12 - Paite Chin bible

JOHAN 12

¹Huan Paikan Ankuangluina ding ni guk a omlai a, Jesu’n misi lak a kipan a a kaihthoh Lazar omna khua Bethani a hongtung hi.

²Huai ah amah adin nitakan a bawl ua, Martha in nek a bawl hi, Lazar bel a Ankuang umpih khat ahi.

³Mari in spiknardi buk kimkhat thaunamtui manphatak a hontawi a, Jesu khete a nuh a, a sam in a nul a, huai thaugim in insung a dimta hi.

⁴Himahleh Judas Iskariot, a nungzuite lak a khat, a mansak dingpa’n,

⁵“Hiai thaunamtui bangdia makhai za thum a zuak a migentheite kiang a pe zawlou uh ahia?” a chi hi.

⁶Mi gentheite a awlmoh ziak a hiai thugen ahi kei; guta ahi a, dangka ip a kem a, asung a koih a lak zel ziak ahizaw hi.

⁷Jesu’n, “Hih hen aw, ka kivui ni adia a sit ahi, sen hen aw.

⁸Mi gentheite na kiang ua om gige ahi ua, kei bel na kiang ua om gige ding ka hi kei” a chi hi.

⁹Huan huai mun ah Jesu a om chih Juda mipi’n a theih un; a hong ua, Jesu ziak kia hilou in, misi lak a kipan a kaihthoh, Lazar mah leng a muhnop ziak uh ahi.

¹⁰Huan siampu liante Lazar leng that ding in a kihou uhi;

¹¹Amah ziak a Judate tampi in lang kaisana, Jesu a gintak ziak un.

¹²A zing in, Ankuangluina a hong mipi tampi’n Jesu Jerusalem khua ah a hongpai ding chih a zak un,

¹³Tumnahte a tawi ua, dawn ding in a pawtkhia ua, Hosanna, Toupa min a Israelte Kumpipa hongpai a hampha e, chi in, a kikou uhi.

¹⁴Huan Jesu’n sabiltung nou a mu a, a tung ah a tuang hi.

¹⁵Lau ken, Zion tanu; en in, na Kumpipa, sabiltung nou tung a tuang in, a hongpai ding, chih gelh a hih bang in.

¹⁶Huai thute a tung in a nungzuite’n a theisiam kei ua; himahleh, Jesu pahtawi a hih nung in, a tanchin ah huai thugelh ahi chih leh, a tung ah huai thilte a na hihngei uh chih a theita uhi.

¹⁷Huan Lazar hana kipan a sapkhiakpa, misi lak a kipan a kaihthoh lai a a kiang a mipi omte’n, a thu a theihpih uhi.

¹⁸Huaiziak in ahi, mipite’n leng amah a vadawn uh, huai thillamdang a hih chih a theih ziak un.

¹⁹Huchi in, Pharisaite’n, thei un, bangmah na hih theihlouh uh, en un, khovel in amah a zuita hi, a kichi uhi.

²⁰Huan Ankuangluina a Pathian be ding a hohtoute lak ah Grik kuate hiam a om uhi.

²¹Huaite Galili gam a Bethsaida khua a mi Philip kiang ah a hong ua, a kiang ah, “Pu, Jesu ka mu nuam uh” a chi ua, a thum uhi.

²²Philip in Andru a honghilha; Andru leh Philip in Jesu a honghilh uhi.

²³Jesu’n a dawng a, a kiang uah, “Mihing Tapa pahtawi a a omna ding hun a tungta hi.

²⁴Chihtaktak in, chihtaktak in, k’on hilh ahi, Buhtang lei a a kiaka, a sihphot keileh, amah kia in a om tawntung hi; a sih inbel, tampi in a gah hi.

²⁵Kuapeuh a hinna it in a mangsak ding a; kuapeuh hiai khovel a a hinna ngaineu in tangtawn hinna ah a kem ding hi.

²⁶Kuapeuh in ka nna a sepleh honzui hen; ka omna ah ka sikha leng a om ding hi; kuapeuh in ka nna a sep leh Pa’n amah a pahtawi ding hi.

²⁷“Tun ah ka kha a mangbang hi; bang ka gen dia? Pa, hiai hun apan hon hondam in, ka chi dia hia? chilou e, hiai ding a hiai hun a hongpai ka hi.

²⁸Pa na min pahtawi in, a chi hi. Huchi in van a kipan in aw hongsuak a, ka pahtawita, ka pahtawi nawnlai ding a chi hi.

²⁹Mipi a kiang a dingte’n huai a za ua, Vanpiging ahi, a chi ua; midangte’n, Angel in amah a houpih ahi, a chi uhi.

³⁰Jesu’n a dawng a, huai aw kei adia hongsuak ahi kei, noumau ading ahizaw, a chi hi.

³¹Tu hiai khovel thukhensakna hun ahi; tu hiai khovel lal paihkhiak hun ahi.

³²Huan lei a kipan a khaikang a ka om leh, mi tengteng keimah kiang ah ka hip ding, a chi hi.

³³Huai thu a sih ding dan theihsakna dia a gen ahi.

³⁴Huan mipi’n a kiang ah, Khrist tangtawn in a om chih danbu ah ka thei uh, nang Mihing Tapa khaikang a om ding ka hi bangchi chih a chi na hia? Huai Mihing Tapa kua ahia? a chi ua, a dong uhi.

³⁵Huan Jesu’n a kiang uah, Vak na lak uah sawtlou a omtadih hi. Vak na neih lai un vak ah khosa un, huchilou in zaw mial in honlap ding hi. Kuapeuh mial a khosa in a paina a theikei hi.

³⁶Vak na neihlai un vak gingta un, vak tate na hong hih theihna ding un” a chi hi. Huai thute Jesu’n a gen a; huan a pai a, a muhlouh ding un a kiselta hi.

³⁷A ma uah huchitel a tam thillamdang hihmahleh, amah a gingta tuankei uhi:

³⁸Toupa, ka thugen uh kuan ahia gingta? Toupa khut leng kua kiang ah ahia latsak a a om? chi a zawlnei Isai thugen a tun na ding in.

³⁹Hiai ziak in ahi a gintak theihlouh uh, Isai in,

⁴⁰Aman a mit uh a hihtaw a, a lung tang uh a hihkhauh a; huchilou in zaw a mit un a mu khading ua, a lungtang un a thei kha ding uh, huan hong kihei nawn ding ua, ken amau ka hihdam khading chih, a gen nawn ziak in.

⁴¹Hiai thilte Isai in a thupina a muh a a tanchin a gen ahi.

⁴²Himahleh, heutute lak nangawn ah tampi in Jesu a gingta uhi; himahleh Pharisaite ziak in a kipulak nuam kei uh, huchilou in zaw kikhopnain a kipan a hawlkhe kha ding uhi:

⁴³Pathian pahtakna sang in mihing pahtakna a deih zaw uhi.

⁴⁴Huan Jesu a kikou a, “Kuapeuh hon gingta kei gingta ahi kei a, hon sawlpa gingta ahizaw hi.

⁴⁵Kuapeuh kei honmu hon sawlpa mu ahi.

⁴⁶Vak khovel a hongpai pen ka hi, kuapeuh kei hon gingta mial a a omlouhna ding in.

⁴⁷Kuapeuh ka thugen za in, gingta kei mahleh, ken siamlouh ka tangsak kei: khovel siamlouh tangsak ding a hongpai ka hi kei a, khovel humbit ding a hongpai ka hi zaw hi.

⁴⁸Kuapeuh kei hon deihlou a, ka thugente pomlou in, siamlouh tangsak khat a nei hi, ka thugen huai thu mahmah in, nitawpni chiang in amah siamlouh a tang sak ding hi.

⁴⁹Keimah phuahtawm in thu ka genkei a; Pa hon sawlpan ka thugen ding leh ka hih ding thu a hon pezaw hi.

⁵⁰Amah thupiak tangtawn hinna ahi chih ka thei; huaiziak in ka thugen, Pa honhilh bangzel in ka gen ahi” a chi hi.