Read Paite Chin JOHAN 13 Bible Online

JOHAN 13 - Paite Chin bible

JOHAN 13

¹Paikan Ankuanglui kipat ma in, Jesu’n hiai khovel nusia a Pa kiang a a pai hun hongtungta chih a thei a; khovel a a itte, a tawppha in a it hi.

²Huan nitak annek lai in, Diabol in Simon tapa, Judas Iskariot, lungtang a Jesu zuausan a matsak lungsim a koihsak khitnung in,

³Pa’n a khut ah thilbangkim a peta chih leh Pathian a kipan hongpai ahi a, Pathian kiang a pai ding ahi chih Jesu’n theigige in,

⁴Nitakan umlai ading a, a puante a suahkhia a, kinulna puan a la a, a teng hi.

⁵Huan kisilna kuang ah tui asung a, nungzuite khe a silta a, kinulna puan a ten in a nul zel hi.

⁶Huchi in Simon Peter kiang ah a honghi; “Aman Toupa, nang tel in ka khe na sil dia hia?” a chi hi.

⁷Jesu’n a kiang ah, “Ka thilhih tun ah na theikei; himahleh tunung chiang in na thei ding” a chi a, a dawng hi.

⁸Peter in a kiang ah, “Ka khe na silkei hial ding” a chi hi. Jesu’n a kiang ah, “Na khe ka sil kei leh ka kiang ah tan na neikei ding” a chi hi.

⁹Simon Peter in a kiang ah, “Toupa, ka khe kia hilou in, ka khutte leh ka lutang leng aw” a chi hi.

¹⁰Jesu’n a kiang ah, “Kisil khinsa a khe loungal sil a kiphamoh kei, a pumpi in a siang; nou na siang uh, na vek un zaw ahi kei” a chi hi.

¹¹A mansakpa dingpa a thei ngal a; huaiziak in, na vek un zaw na siangkei uh, a chi ahi.

¹²Huchi in a khete uh a silkhit a, a puante a lak a, a tutnawn in a kiang uah, “Na tung ua ka thilhih na thei uhia?” a chi hi.

¹³“Nou Toupa leh heutupa n’on chi ua; na chidik uhi, ka hihna mah ahi.

¹⁴Kei Toupa leh na heutupa un na khe uh ka sil leh nou leng na khe uh na kisilsak ding uh ahi.

¹⁵Na tung ua ka hihbang in, nou leng na hihsam ding un, hih ding dan honhilh ka hi.

¹⁶Chihtaktak in, chihtaktak in, k’on hilh ahi, sikha a toupa sang in a thupizaw kei a; sawl a om leng a sawlpa sang in a thupizaw sam kei hi.

¹⁷Huai thilte na theih ua, na hih uleh mi nuamsa na hi uhi.

¹⁸Na vek ua thu ka genkei a; ka telte ka thei; himahleh Ka tanghou nepa’n ka tung ah a khetul a likta chih, Laisiangthou a hongtun theihna ding ahi.

¹⁹Tuin a hong tunma in k’on hilh ahi, a hongtun hun chiang a kei amah ka hi chih na gintakna ding un.

²⁰Chihtaktak in, chihtaktak in, k’on hilh ahi, kuapeuh ka sawl kipahpih, kei hon kipahpih ahi; kuapeuh kei hon kipahpih, hon sawlpa kipahpih ahi,” a chi hi.

²¹Jesu’n huai thu a genkhit in, a lungsim a mangbang a, “Chihtaktak in, chihtaktak in, k’on hilh ahi, Na lak ua mi khat in kei hon mansak ding” chi in a theisakta hi.

²²Huan nungzuite’n a chihpen a theikei ua, a ki en tuah chiat uhi.

²³A nungzuite lak a khat, Jesu’n a itpa, dohkan sik ah Jesu angsung ah kingai in a om hi.

²⁴Simon Peter in huai mi kiang ah, kua pen thu ahia a gen dong ding in a khutvan hi.

²⁵Jesu awm ngai mah in a awnphei a, a kiang ah, “Toupa, kuapen ahia?” a chi hi.

²⁶Jesu’n, “Tanghou them ka diah a, ka piakpa ahi ding” chi in a dawng hi. Huchi in tanghou them a diah nung in, Iskariot, Simon tapa Judas kiang ah a pia hi.

²⁷Tanghou them a piak nung in Setan asung ah a lutta hi. Huchi in Jesu’n a kiang ah, “Na hih ding hihmeng in” a chi hi.

²⁸Dohkan a omte’n bang tuma hiai thu gen hiam chih a theikei uhi.

²⁹A khen in Judas in dangka ip a vom ziak in, Jesu’n Ankuangluina ading thil kiphamoh peuh lei in, chi hiam, mi gentheite kiang ah banghiam piak ding, chi hiam a sa uhi.

³⁰Huan tanghou them la in, a pawtkhe paha; huai zanlai ahi.

³¹Huaiziak in a pawtnungin, Jesu’n a gen a, “Tuin Mihing Tapa pahtawi in a omta a, Pathian leng amah ziak in pahtawi in a om hi.

³²Amah a Pathian pahtawi a a om leh amah leng Pathian mahmah in a pahtawi ding, a pahtawi pah ding hi.

³³Naute aw, hun tomchik na kiang uah ka omlai tadih hi. Nou n’on zawng ding uh; Judate kiang a, ka paina ding ah nou na hongpai theikei ding uh chih ka gen bang in, tuin huchi mah bang in na kiang uah ka gen ahi.

³⁴Thupiak thak konpia ahi, ki-ittuah un; ken nou k’on it bang in, nou leng ki-ittuah un.

³⁵Na ki-ittuah uleh mi tengteng in ka nungzuite na hi uh chih hiai ah a thei ding uh” a chi hi.

³⁶Simon Peter in a kiang ah, “Toupa, koi a hoh ding na hia? a chi hi. Jesu’n, ka hohna ding ah nang tuin n’on zui theikei ding; tunung chiah zaw n’on zui ding” chi in a dawng hi.

³⁷Peter in a kiang ah, “Toupa, bangding in ahia tua leng k’on zuih theihlouh ding? Nangmah ziak in ka hinna ka koihkhe ding” a chi hi.

³⁸Jesu’n “Keimah ziak in na hinna na koihkhe ding maw? Chihtaktak in, Chihtaktak in, k’on hilh ahi, nang thumvei n’on kitheihmohbawl ma in ak a khuangkei ding” chi in a dawng hi.