Read Paite Chin JOHAN 14 Bible Online

JOHAN 14 - Paite Chin bible

JOHAN 14

¹“Na lungtang uh hihmangbat in omkei hen; Pathian na gingta ua, keileng hon gingta sam un.

²Ka Pa inn ah tenna mun tampi a om; a omlou hileh, k’on hilhta ding hi; nou ading a mun khat bawl dia kuandek ka hi.

³Huan nou adia munbawl ding a ka kuan leh ka hong kiknawn ding a, ka kiang ah nou ka honla ding, ka omna a nou leng na om theihsamna ding un.

⁴Ka hohna ding a lampi na thei uh” a chi hi.

⁵Thomas in a kiang ah, “Toupa, koi a hoh ding na hia ka theikei uh, a lampi bangchi’n ka thei ding ua?” a chi hi.

⁶Jesu’n a kiang ah, “Keimah lampi, thutak leh hinna ka hi; keimaha pailou kuamah Pa kiang a tungkei a chi hi.

⁷Kei n’on theihkhit uleh ka Pa leng na theikhinta ding uh; tu a kipan amah na thei ua muh leng na muta uhi” a chi hi.

⁸Philip in a kiang ah, “Toupa, huai Pa kou hon ensak in, huchi in kou adin a hun ding” a chi hi.

⁹Jesu’n a kiang ah, “Philip, hiai tanpi na kiang ah ka om a, huchi in leng hon theilou maw? Kuapeuh kei honmu Pa mu ahi. Huai Pa kou hon musak in bangchi chih a na chih ahia?

¹⁰Kei Pa ah ka om a Pa keimah ah a om chih na gingta kei ahia? Na kiang ua thu ka gen, keimah phuahtawm in ka gen kei; Pa keimah ah a om gige a, thil a hihzaw nak hi.

¹¹Kei Pa a ka om leh Pa keimah a a om gingta un; ahihkeileh thilhih ziak bek in hon gingta un.

¹²Chihtaktak in, chihtaktak in, k’on hilh ahi, kuapeuh hon gingta in ka thilhihte a hih sam ding; hiai sang a thupizaw leng a hih ding, Pa kiang a ka pai ding ziak in.

¹³Huan ka min a na nget peuhmah uh ka hihzel ding, Pa, Tapa a pahtawi a a om theihna ding in.

¹⁴Nou ka min a bangpeuh n’on nget uleh, ka hihzel ding hi” a chi hi.

¹⁵“Nou n’on it uleh, ka thupiakte na zui ding uhi.

¹⁶Huan Pa ka ngen dia, aman Khamuanpa dang a honpe ding, tangtawn a na kiang ua om ding in;

¹⁷Huai thutak Kha; khovel in a neih theihlouh ahi, amah a muhlouh a, a theihlouh behlap ziak in; nou amah na thei ua, na kiang uah a om gige ngal a, noumau sung ah a om ding hi.

¹⁸“Tagah din k’on paisan kei ding; na kiang uah ka hongpai nawn ding hi.

¹⁹Sawtlou chik sung khovel in a hon munawn kei ding; himahleh nou zaw n’on mu ding uh; keimah ka hin ziak in nou leng na hing sam ding uhi.

²⁰Huai ni chiang in kei ka Pa a ka om leh nou keimah a na om bang un, kei noumau a ka omdan na thei ding uhi.

²¹“Kuapeuh ka thupiakte nei a, zui, kei hon it ahi; kuapeuh kei hon it ka Pa’n a it ding, ken leng amah ka it ding a, a kiang ah ka hihna ka kilak ding, a chi hi.

²²“Huan Judas, Iskariot loupen in a kiang ah, Toupa, kou kiang a na kilak dia, khovel kiang a, na kilaklouh se ding bangziak ahia? a chi hi.

²³“Jesu’n a dawng a a kiang ah, min hon it leh ka thute a zui ding a; ka Pa’n amah a it dia, a kiang ah ka hongpai ding ua, amah toh ka tengkhawm gige ding uhi.

²⁴Kuapeuh hon itlou in ka thu a zuikei; na thuzakte uh kei a ahi kei a, Pa hon sawlpa a ahizaw hi.

²⁵“Na kiang ua ka omtak dih sung in, hiai thute k’on hilh hi.

²⁶Khamuanpa, Kha Siangthou, Pa in ka min a honsawl ding in bangkim nou a hon sinsak ding a, na kiang ua ka gen tengteng nou a hon thei khesak nawn ding hi.

²⁷“Khamuanna k’on nutsiat a; keimah khamuanna k’on pia hi; khovel in a piak bang in k’on pe kei hi. Na lungtang uh hihmangbat in omkei hen, lau leng lau kei hen.

²⁸Ka paimang ding a, na kiang uah ka hongpai nawn ding, k’on chih omdan na theita uhi. Nou n’on it uh leh Pa kiang a ka paiding ziak in na kipak ding uh ahi; keimah sang in Pa a thupizaw hi.

²⁹Tuin hiai thil a hongtun chiang a na gintak theihna ding un hongtun ma in k’on hilh ahi.

³⁰Na kiang uah thu ka gen tam nawn kei ding, khovel vaihawmpa a hongpai dek ziak in; aman keimah ah bangmah a neikei hi.

³¹Himahleh ken Pa ka it chih leh Pa in hon thupiak bangzel in thil ka hih chih, khovel in a theihna ding uh eive. Ding dih ua, hiai a kipan i paikhe ding uh.