Read Paite Chin JOHAN 16 Bible Online

JOHAN 16 - Paite Chin bible

JOHAN 16

¹“Lungkia a na paimang louhna ding un na kiang uah hiai thute ka genta hi.

²Kikhopnainte ah a hon nongsak ding ua; kuapeuh nou honthat Pathian tung a thil hoih hih in a kithei ding ua huai bang hun hongtung ding ahi.

³Huai thilte a hih ding ua, Pa leh kei hon theihlouh ziak un.

⁴Hiai thute na kiang uah ka genta hi, a hun a hongtun chiang a, k’on hilhkhinta chih na theihnawnna ding un. Hiai thilte na kiang ua ka om takdih ziak in a tung a k’on hilhlouh him na hi uhi.

⁵“Tuin hon sawlpa kiang ah ka pai ding a noute kuamah in, koi a hoh ding? chi in, n’on dong kei uhi.

⁶Hiai thute na kiang ua ka gen ziak in na lungtang uh lungkhamna in a dimzou hialta hi.

⁷Himahleh thutak k’on hilh ahi; ka pai nou ding in a hoihzaw hi; ka paikei leh Khamuanpa na kiang uah a hong tungkei ding a; ka pai leh bel na kiang ua honsawl ding ka hi.

⁸Amah a hongtun chiang in, khelhna, diktatna, leh vaihawmna thu ah khovel a siamlouh dan a theisak ding hi;

⁹Khelhna thu ah siamlouh ahi ding uh, kei hon gintak louh ziak un.

¹⁰Diktatna thu ah siamlouh a tang ding uh; Pa kiang a ka pai ding a, nou kei n’on muhnawn taklouh ding ziak un.

¹¹Vaihawmna thu ah siamlouh ahi ding uh, hiai khovel lal siamlouh a a puktak ziak in.

¹²“Na kiang ua thugen ding tampi ka neilai a, himahleh tuin zaw na chin tadih kei uhi.

¹³Himahleh amah Thutak Kha a hongtun chiang in, thutak tengteng ah nou a honpi ding; amah phuahtawm in thu a genkei dia; a zak peuhmah a genzaw ding, thil hongtung dingte leng nou a hon theisak ding hi.

¹⁴Aman kei a hon pahtawi ding a; kei a a la ding a, nou kiang ah a hon theisak ding hi.

¹⁵Pa’n thil a neih tengteng kei a ahi; huaiziak in kei a a la ding a, na kiang uah a hon theisak ding, ka chi hi.

¹⁶“Sawtlouchik in nou kei n’on mu kei ding ua; sawtlouchik mah in nou kei n’on munawn ding uh, a chi hi.

¹⁷“A nungzuite khenkhat in, i kiang ua a thugen bang ahi, sawtlouchik in nou kei n’on mu kei ding uh, sawtlouchik mah in n’on munawn ding uh a chih leh, Pa kiang a ka hohdek ziak in, a chih? a kichi uhi.

¹⁸Amau mah in, sawtlouchik, a chih bang chihna ahia? A thugen i theisiam kei uh, a chi uhi.

¹⁹“Huan amah dot ut a nei uh chih Jesu’n a thei a, a kiang uah, sawtlou chik in nou kei n’on mu kei ding uh, sawtlou chik mah in nou kei n’on mu nawn ding uh chi a ka thugen na kidong umaw?

²⁰Chihtaktak in, chihtaktak in, k’on hilh ahi, na khitui uh a ke ding a, na kap huphup ding uh, khovel bel a kipak ding; na lungkham ding ua, himahleh na lungkham uh kipahna a suak ding hi.

²¹Numei nau nei ding in a veilai in a lungkham nak hi, a hun a tuntak ziak in; himahleh nau a suahtakin a lunggimna a thei nawnta kei hi, khovel a naungek mel hongpian a a kipah ziak in.

²²Tuin nou na lungkham uh; himahleh k’on munawn ding a, na lungtang uh a kipak ding, na kipahna uh kuamah in hon laksak kei ding hi.

²³Huai ni chiang in nou kei bangmah n’on ngen kei ding uh. Chihtaktak in, chihtaktak in, k’on hilh ahi, Pa kiang a bangpeuh ka min a na nget uleh a honpe ding hi.

²⁴Tu tan in ka min in bangmah na ngen nai kei uh. Ngen un, huchi in na mu ding uh, na kipah uh a kimna ding in.

²⁵“Huai thute a hem in na kiang uah ka genta hi; a hun a tung dekta, huai hun chiang in na kiang uah a hem in thu ka gen nawn kei ding a, chiantak in Pa tanchin k’on hilh ding hi.

²⁶Huai ni chiang in keimah min in thil na ngen ding uhi; Pa kiang ah ken k’on ngetsak ding ka chikei hi.

²⁷Pa in amah ngei in nou a hon it ngal a, nou kei n’on it ua, Pa a kipan ka hi chih n’on gintak ziak un.

²⁸Kei Pa kiang a kipan hongpawt a, khovel a hongpai ka hi a; khovel paisan a, Pa kiang a pai nawn ding ka hi, a chi hi.

²⁹Huan a nungzuite’n a kiang ah, “Ngai dih tuin teltak in a genta, a hem in na gen ta kei hi a chi uhi.

³⁰Nang bangkim na thei a, kuamah hondot na kiphamoh kei chih tuin ka theita uhi; hiai ziak in Pathian kiang a kipan hongpai na hi chih ka gingta uhi, a chi uhi.

³¹Jesu’n a dawng a a kiang uah, tuin na gingta u maw?

³²“Ngai un, a hun hong tungding ahi, tuin leng a tungta hi, huai hun chiang in noumau in chiat ah na dalh vek ding ua, keimah kia n’on nuse ding uh. Himahleh Pa ka kiang a om ziak in keimah kia in ka omkei hi.

³³Hiai thute na kiang uah ka genta hi, keimah a na khamuanna ding un. Khovel ah gimthuakna na neiding uh, himahleh khamuangtak in om un, ken khovel ka zouta, a chi hi.