Read Paite Chin JOHAN 17 Bible Online

JOHAN 17 - Paite Chin bible

JOHAN 17

¹Huai thute Jesu’n a genkhit in vanlam nga in, “Pa a hun a tungta; na Tapa pahtawi in, Tapa in nang hon pahtawi theihna ding in;

²Huchi a mi tengteng tung a thunei a na bawl in, a kiang a na piak peuhmahte tangtawn hinna a piak theihna ding in.

³Hiai tangtawn hinna ahi, Nang Pathian tak kia leh na sawl Jesu Khrist theih.

⁴Nang thilhih ding n’on piakte ka hihkhinta a, khovel ah k’on pahtawita hi.

⁵Pa aw, khovel omma a na kiang a thupina ka neih in, tuin nangmah kiang ngei ah hon pahtawi in.

⁶“Nang khovel a kipan a mi kei n’on piakte kiang ah na min ka hihlangta; amau nang a ahi ua, nang amau kei n’on piak ahi uh; amau lah na thu a zuita uhi.

⁷Nang kei n’on piak tengteng nang a kipan ahi chih a theita uhi.

⁸Nang thu n’on piakte a kiang uah ka peta a; huaite a kem ua, nang a kipan ka hi chih diktak in a theita uh, nang n’on sawl chih leng a gingta uhi.

⁹Amau dia ka ngetsak zaw; khovel a dia ngetsak ka hi kei, nang n’on piakte ading ahizaw, nang a ahi uhi.

¹⁰Thil tengteng kei a peuhmah nang a ahi a, nang a lah kei a ahi a; amau ziak in pahtawi in ka om hi.

¹¹Huan kei zaw khovel ah ka omta kei ding, hiaite bel khovel ah a om ding uh; kei na kiang ah ka hong paidekta hi. Pa Siangthou aw, nang kei n’on piakte na min in hum in pumkhat a hihtheihna ding un, eimah pumkhat i hih bang in.

¹²A kiang ua ka om sung in, nang kei n’on piakte na min in ka hum a; amau ka don a, a lak ua khat leng a mangthang kei hi, mangthang tapa loungal, Laisiangthou a tun theihna ding in.

¹³Himahleh tuin na kiang ah ka hong paidekta; khovel ah hiai thute ka gen ahi, ka kipah amau ua a neih kimna ding un.

¹⁴Na thu a kiang uah ka peta hi; khovel in amau a hua a, khovel a a hihlouh ziak un, kei khovel a ka hihlouh mah bang in.

¹⁵Nang amau khovel a kipan na lakkhiak ding ngen ka hi kei a, migilou lak ah na hum ding ka chi ahizaw hi.

¹⁶Amau khovel a a hi kei ua, kei khovel a ka hihlouh mah bang in.

¹⁷Amau thutak in hihsiangthou in, na thu thutak ahi.

¹⁸Nang khovel a kei n’on sawl bang in, amau khovel ah ka sawl hi.

¹⁹Amau ziak in ka ki hihsiangthou a, amau leng thutak a a sianthouna ding un.

²⁰“Hiaite ading kia a ngetsak ka hi kei, a thugen ziak ua kei hon gingta lai dingte ading in ngetsak ka hi; avek ua pumkhat a hihna ding un;

²¹Pa, nang keimah a na om leh, kei nangmah a ka om bang in, amau leng eimah a a omna ding un; nang kei n’on sawl chih khovel in a taksan theihna ding in.

²²Huan nang thupina n’on piak ken amau ka peta; amau pumkhat a hihna ding un, ei pumkhat i hihmah bang in.

²³Kei amau ah, nang kei ah, amau pumkhat a a om ua a bukim theihna ding un; nang kei n’on sawl chih leh, n’on it bang in amaute na it chih khovel in a theihtheihna ding in.

²⁴“Pa, nang kei n’on piakte, ka omna a ka kiang a om ding in ka deih; leilung pian ma a itna a nang n’on piak ka thupina a muhtheihna ding un.

²⁵Pa diktat aw, khovel in zaw nang hon theikei a, ken zaw k’on thei hi; hiaite’n leng nang kei n’on sawl chih a thei uhi.

²⁶Huan a kiang uah na min ka theisakta a, ka theisak lai ding, nang kei n’on itna bangbang na itna amau a a om a, keileng amau a ka om theihna ding in” a chi hi.