Read Paite Chin JOHAN 18 Bible Online

JOHAN 18 - Paite Chin bible

JOHAN 18

¹Jesu’n huai thute a genkhit in a nungzuite toh a pawt ua, Kidron lui a kan ua, huai ah huan a om hi. Huai ah amah leh a nungzuite a lut uhi.

²Huan a mansak dingpa Judas in leng huai mun a thei a; Jesu a nungzuite toh huai ah a pawt zelzel uhi.

³Huchi in Judas in sepaih pawl, siampu liante leh Pharisaite kiang a om heutute a pi a, khawnvakte, meiselte, galvante tawi in huai ah a hongpai uhi.

⁴Jesu’n a tung a thil tungding tengteng a theigige a, a vapawt a, a kiang uah, “Kua ahia na zon uh?” a chi hi.

⁵Amau a kiang ah, “Nazaret Jesu a chi ua” a dawng uhi. Jesu’n a kiang uah, “Keimah ka hi” a chi hi.

⁶A mansakpa Judas leng a lak uah ading a. “Keimah ka hi” a chihtak in, a nungtolh ua, lei ah a puk duam uhi.

⁷Huan aman a kiang uah, “Kua ahia na zon uh?” chi in a dong nawn hi. Amau, “Nazaret Jesu” a chi uhi.

⁸Huan Jesu’n, “Keimah ka hi chih k’on hilhta a; nou kei hon zong na hih uleh hiaite hoihtak in khah un” a chi a a dawng hi.

⁹“Nang kei n’on piakte khat leng ka mangsak kei” chi a a thugen a tunna ding ahi.

¹⁰Huan Simon Peter in a namsau vom a dok a siampu lianpen sikha a sat a, a bil taklam a satkhiaksak hi. Huai sikha min Malka ahi.

¹¹Huchi in Peter kiang ah Jesu’n, “Na namsau a pai ah siat in; Pa in nou a honpiak ka dawn kei dia hia?” a chi hi.

¹²Huchi in sepaih pawl leh Judate heutute’n Jesu a man ua, a henta uhi.

¹³Ana kiang ah a pi masa ua, Kaiapha sungpa a hih ziak in. Kaiapha, huai kum a siampu lianpen ahi.

¹⁴Kaiapha bel, mitengteng sang a mi khat sih a hoih chi a, Judate hanthawn pa ahi.

¹⁵Huan Simon Peter in nungzui dang khat toh Jesu a zui hi. Huai nungzuipa siampu lianpen meltheih ahi a, siampu lianpen in huangsung intual ah, Jesu kiang ah a lutsam hi;

¹⁶Himahleh Peter pawlam ah kongkhak bul ah ading hi. Huchi in nungzui dang siampu lianpen meltheih, a vapawt a, kongkhak ngaknu a houpih a, Peter a pilut hi.

¹⁷Kongkhak ngak, nungak in Peter kiang ah, “Nang leng hiai mi nungzuite lak a pangsam na hi hia?” a chi hi.

¹⁸Aman “Ka hi kei” a chi hi. Sikhate leh heutute huai ah ading uhi. A vot ziak in meihol in mei a toh ua, meilum a awi uhi. Peter leng a kiang uah a om a, ding kawm in meilum a awisam hi.

¹⁹Siampu lianpen in Jesu a nungzuite tanchin leh a thuhilh a dong hi.

²⁰Jesu’n a dawng a a kiang ah, “Khovel kiang ah vantang theih in, thu ka gen gige hi; kikhopnain, Pathian biakin leh Judate omkhawmnate ah thu ka hilh zel a, a sim in bangmah ka genkei hi.

²¹Bang a chia kei hon dong? A kiang ua ka thugen ka thuzate dong in, ngai in, amaute’n ka thugen a thei uh a kei hiam” a chi hi.

²²Huan a gentakin a kiang a ding heutu khat in Jesu a beng a, “siampu lianpen hichibang in na dawng maw?” a chi hi.

²³Jesu’n a kiang ah, “Thudiklou gen ka hihleh, a gitlouhna hon theisak in. Himahleh, thupha ka gen in bang a chia hon beng?” a chi hi.

²⁴Huan Annas in hensa in siampu lianpen Kaiapha kiang ah a sawl hi.

²⁵Simon Peter in ding kawm in meilum a awi hi. “Nang leng a nungzuite lak a pangsam na hi hia?” a chi uhi. Aman, “ka hi kei” chi in, a kitheihmohbawl hi.

²⁶Huan siampu lianpen sikha khat Peter in a bil satkhiak sakpa sanggampa’n, a kiang ah, “Huan ah k’on mu kei maw?” a chi hi.

²⁷Huchi in Peter in a kitheihmohbawl nawn a; huan ak a khuangpah hi.

²⁸Kaiapha inn a apan in Vaihawmna inn ah Jesu a pinawn ua; zingsang ahi a; amau zaw Vaihawmna inn ah a lut kei uh, a lut un zaw buah in, Paikan Ankuanglui a ne theikei ding uhi.

²⁹Amaute kiang ah Pilat a vapawt a, “Hiai mi tung ah hekna bang ahia na neih uh?” a chi hi.

³⁰Amau a kiang ah, “Hiai migilou hikeileh na kiang ah k’on pi kei ding uh” chi in a dawng uhi.

³¹Huan Pilat in a kiang uah, “Nou pi unla, na dan bang un vaihawmsak un” a chi hi. Judate’n a kiang ah, “Kou thu in kuamah hihlup dan ahi kei” a chi uhi.

³²Hiai thu a sih ding dan, Jesu’n a gen bang a a tunna ding ahi.

³³Huchi in Pilat inn sung ah a lutnawn a, Jesu a sam a, a kiang ah, “Judate kumpipa na hi hia?” a chi hi.

³⁴Jesu’n “Hiai ka tungtang thu nangmah lungsim puak khiak a na gen hia, midang in honhilh?” chi in dawng hi.

³⁵Pilat in, “Kei Judami ka hi ahia? Nangmah chipihte leh siampu liante’n ka kiang ah a honpi ua ahi; thil bang ahia na hih?” chi in a dawng hi.

³⁶Jesu’n, “Ka kumpi hihna hiai khovel ahi kei; ka kumpi hihna hiai khovel hileh Judate kiang a piak a ka omlouhna ding in, ka sikhate’n a dou ding uh. Himahleh ka kumpi hihna hiai khovel a kipan ahi kei hi” chi in, a dawng hi.

³⁷Pilat in a kiang ah, “E, kumpipa na hi maw?” a chi hi. Jesu’n, “Kumpipa ka hi n’on chi ve. Thutak theihsak ka piansan leh khovel a ka hong paisan ahi. Kuapeuh thutak a om peuhmah in ka thu a sang uh” a chi hi.

³⁸Pilat in a kiang ah, “Thutak bang ahia?” a chi hi. Huan huai thu a genkhit in, Judate kiang ah a va pawtnawn a, a kiang uah, “Bangmah a gitlouhna ka mu kei a chi hi.”

³⁹Himahleh Paikan Ankuangluina ah mi khat k’on pawtsakna ding dan na nei uh; huchi in Judate kumpipa hon pawtsak leng na ut uhia? a chi hi.

⁴⁰Amau a kikou nawn ua, “Hiai mi zaw hi kei henla, Barabba pen hi hen” a chi uhi. Barabba suamhat ahi.