Read Paite Chin JOHAN 19 Bible Online

JOHAN 19 - Paite Chin bible

JOHAN 19

¹Huchi in Pilat in Jesu a pi a, a zep hi.

²Huan sepaihte’n linglukhu a phan ua, a khusak ua, puan sandup leng a silh sak uhi.

³A kiang ah a hongpai ua, “Chibai, Judate Kumpipa”; a chi ua, a beng uhi.

⁴Huan Pilat a pawt nawn a, a kiang uah, “En un, bangmah a gitlouhna ka mu kei chih na theihna ding un, na kiang uah k’on pikhia hi,” a chi hi.

⁵Jesu linglukhu khu in leh puan sandup silh in a hongpawt hi. Pilat in a kiang uah, “En un, Mihing!” a chi hi.

⁶Huan siampu liante leh heutute’n amah a muhtak un a kikou ua, “Kros ah kilhlum in, Kros ah kilhlum in” a chi uhi. Pilat in a kiang uah, “Noumau paipih unla, Kros ah kilhlum un; ken zaw bangmah a gitlouhna ka mu ngalkei hi” a chi hi.

⁷Judate’n a kiang ah, “Ka dan uh khat a om, huai dan bangzel in Pathian Tapa a a kibawl ziak in a si ding ahi” a chi ua, a dawng uhi.

⁸Pilat in huai thu a zak in a launawn semsem hi;

⁹Amah Inpi sung ah valut nawn in Jesu kiang ah, “Koi a hong kipan na hia?” a chi hi.

¹⁰Himahleh Jesu’n a dawngkei hi. Pilat in a kiang ah, “Nang kei hon houpih lou ding maw? Honkhah thei leh Kros a hon kilhlum thei ka hi chih na theikei ahia?” a chi hi.

¹¹Jesu’n, “Tunglam a kipan piak hi kei lechin, ka tung ah hihtheih na neikei ding. Huaiziak in na kiang a hon pekhepa’n khelhna lianzaw a pua hi” a chi hi.

¹²Huai nungsiah Pilat in khah a tuma; himahleh Judate a kikou ua, “Hiai mi na khah leh Kaisar lawm na hi kei; kuapeuh kumpipa a kibawl Kaisar dou ahi” a chi uhi.

¹³Pilat in huai thu a zak in Jesu a pikhia a, a min Suanglep, Hebru pau a Gabbatha a chih uh, huai mun ah thukhenna tutphah ah a tu hi.

¹⁴Huan huai ni Paikan Ankuangluina kiginni ahi a, dak gukna ding ahi. Huan aman Judate kiang ah, “En un, na Kumpipa uh” a chi hi.

¹⁵Huan amau a kikou ua, “Hih mangthang in, hih mangthang in, Kros ah kilhlum in” a chi uhi. Pilat in a kiang uah, Na kumpipa uh Kros ah ka kilhlum ding maw? a chi hi. siampu liante’n, “Kaisar loungal kumpipa dang ka neikei uh” a chi ua, a dawng uhi.

¹⁶Huchi in Pilat in Kros a kilhlup ding in amah a kiang uah a peta hi. Huchi in Jesu a pi ua, a paikhiak pih uhi.

¹⁷Aman Kros kipuak in Luguh Mun, a chih uh, Hebru pau a Golgotha a chih mun tan a pai hi.

¹⁸Huai ah Kros ah a lai ah Jesu midang nih a sik ah khat tuaktuak toh a kilhden uhi.

¹⁹Pilat in lai a gelh a, Kros ah a tak a, “NAZARET JESU JUDATE KUMPIPA” chi in a gelh hi.

²⁰Huai laigelh Judate tampi in a sim ua; Jesu Kros a kilhlupna mun uh khopi kiang ahi a; Hebru pau, Grik pau leh Latin pau a gelh ahi.

²¹Huchi in Judate siampu liante’n Pilat kiang ah, “Judate Kumpipa, chi in gelh ken; Judate Kumpipa ka hi” a chi, chi in, gelh zaw in, a chi uhi.

²²Pilat in “Ka gelhkhit, gelhkhit ahita ” a chi a, a dawng hi.

²³Huan sepaihte’n Kros a Jesu a kilhlup khit un a puansilh phel li a suah ua, phel khatchiat in a tang uhi; a puanak leng a la uh. Puanak khui louh puanak ahi a a ngawng a kipan a pum a gatthoh ahi;

²⁴Huaiziak in amau, “I botkek kei dia, kua tanding ahi hiam ai i san ding uh” a kichi uhi. Laisiangthou a, “Ka puansilhte a kihawm ua, ka puanak ding in ai a san uh” chih a tunna ding in hiai thil sepaihte’n a hih uhi.

²⁵Huan Jesu Kros kiang ah a nu leh a nu sanggam, Mari Kleopa zi leh Mari Magdalin ading uhi.

²⁶Huan Jesu’n a nu leh nungzui a itpa a kiang a ding a mu a, a nu kiang ah, “Numei, en in, na tapa” a chi hi.

²⁷Nungzuipa kiang ah, “En in, na nu” a chi hi. Huai dak apan huai nungzui in a in ah amah pita hi.

²⁸Huai nung in, Jesu’n thil bangkim hihzoh ahita chih a thei a, Laisiangthou a tunna ding in, “Ka dang a tak” a chi hi.

²⁹Huai ah bel khat uain thuk a dim a tung ua, huchi in spanji khat uain thuk a diahdim in, hussop chiang dawn a tak in, a muk ah a tulhtou uhi.

³⁰Huan Jesu’n uain thuk a dawn khitin, “Zoh ahita” a chi hi. A lu a kun a, a kha a khahta hi.

³¹Huan kiginni a hih ziak in, luangte khawlni a Kros a a omlouhna ding in, huai khawlni ni thupi ahi ngal a. Judate’n Pilat kiang ah a khete uh hihtan a a luang uh paipih ding in a ngen uhi.

³²Sepaihte a hongpai ua, a kiang a Kros a kilhlup tuah masakpen leh mi khat a khe uh a hihtan uhi.

³³Himahleh Jesu kiang a hongtun un, a na sita chih a thei ua, a khete a hihtan tuankei uhi.

³⁴Himahleh sepaihte lak a mi khat in a nak ah tei in a dawt a, huchi in sisan leh tui a hong luangkhia hi.

³⁵A mupa’n a theisakta, a thu theihsak a dik ahi; a gendik chih a kithei a, nou leng na gintakna ding un.

³⁶Laisiangthou in, “A guh khat lel leng hihtan ahi kei ding” a chih tunna ding in huai thil a hong omta hi.

³⁷Huan Laisiangthou dang in, “A sutpa uh lam a en ding uh” a chi hi.

³⁸Huan huai thilte khit in, Joseph, Arimathai mi, Jesu nungzui, Judate kihtak ziak a sim om in Jesu luang paipih ding in Pilat kiang ah a ngen hi. Pilat in a phal a, huchi in a hongpai a, a luang a paipihta hi.

³⁹Huan Nikodem, a tung a zan a a kiang a hong in, murra leh aloe kihelsa buk sawmnga vel tawi in a hongsam hi.

⁴⁰Jesu luang a la ua, Judate kivui dan bang in gimlimte toh puanmalngat hoih in a tuam uhi.

⁴¹Huan Kros a a kilh lupna mun uah huan khat a om a; huan ah kuamah sialna ngei nailouhna han thak khat a om hi.

⁴²Judate kiginni a hih ziak in, han a kiang chin uh a hih toh, huai ah Jesu a sialta uhi.