Read Paite Chin JOHAN 2 Bible Online

JOHAN 2 - Paite Chin bible

JOHAN 2

¹Huan ni thum ni in, Galili gam a Kana khua ah kitenna a om a, huai ah Jesu nu a om hi.

²Jesu leh a nungzuite leng kitenna ah a chial uhi.

³Uain a beitakin Jesu nun a kiang ah, “Uain a tasamta uh e,” a chi hi.

⁴Jesu’n a kiang ah, “Numei, nang n’on theihsak ding bang ahia om? Ka hun a tung naikei hi” a chi hi.

⁵A nu’n sikhate kiang ah, “Na kiang ua a gen peuhmah hihzel un” a chi hi.

⁶Huan Judate silsiang dan bang in suang tuibel guk, buk sawmli mun nih hiam, mun thum hiam ta chiat, huai ah a tung uhi.

⁷Jesu’n a kiang uah, “Tuibelte tui in dimsak un” a chi hi. A gong toh kikim in a dimsak chiat uhi.

⁸A kiang uah “Tuin dim unla, nekbawl thusa kiang ah paipih un” a chi hi. Huchi in a paipihta uhi.

⁹Nekbawl thusa in, tui uain a hongsuak a chiama, a hong kipatna a theikei a, tuidim sikhate’n a thei uhi, mouneipa a samta a, a kiang ah,

¹⁰“Michih in a tung in uain hoih a hawm ua, a tam deuh a dawn nung un, a hoihlou a hawm uh; nang bel tutan in uain hoih na kem lailai a” a chi hi.

¹¹Jesu’n hiai a thillamdang hihpatna Galili gam Kana khua a a hih ahi; a thupina a langsakta a; a nungzuite’n amah a gingta uhi.

¹²Huan huaikhit in Kapernaum khua ah a hohsuk a, amah leh a nu toh, a unaute toh a nungzuite toh; huai ah ni tamlou chik a om uhi.

¹³Huan Judate Paikan Ankuangluina a naita a, Jesu Jerusalem khua ah a hohtou hi.

¹⁴Pathian biakin a bawng, belam leh vakhu zuak leh dangka kheng a tute a mu hi.

¹⁵Huan khauhual in zepna ding a bawl a, belam leh bawng avek un Pathian biakin a kipan a delhkhia a, dangka khengte dangka a sungbua a, a dohkante uh leng a sawnpuk sak hi.

¹⁶Vakhu zuakte kiang ah, “Hiai thilte hiai a kipan paipih un, ka Pa inn sumsinna mun in bawlkei un” a chi hi.

¹⁷Huan “Na inn a ka phatuamngaihna in a hon gai ding” chih gelh ahi chih a nungzuite’n a theinawnta uhi.

¹⁸Huchi in Judate’n a kiang ah, “Hiai na thilhih chiamtehna bang ahia n’on lah theih?” chi in a dong uhi.

¹⁹Jesu’n a kiang uah, “Hiai in hihse le uchin, ni thum sung in ka tung ding nawn ding” chi in a dawng hi.

²⁰Huan Judate’n, “Hiai in kum sawmli leh guk lam ahi, nang ni thum sung in na tungding ding maw?” a chi uhi.

²¹Himahleh amah sapum inn thu gen ahizaw hi.

²²Huaiziak in, misi lak a kipan a thohnawn in, a nungzuite’n huai thugen a theinawnta uhi. Laisiangthou thu leh Jesu thugen a gingta uhi.

²³Huan Paikan Ankuangluina Jerusalem khua a omlai in, a thillamdang hihte a mu ua, mi tampi in a min a gingta uhi.

²⁴Himahleh Jesu bel a lak uah a kikangkoih a, mi tengteng a thei hi.

²⁵Mihing thu kuamah hilhchet a kiphatmawh louh ziak in; Amahmah in mihing sung a om peuhmah a thei ngal hi.