Read Paite Chin JOHAN 21 Bible Online

JOHAN 21 - Paite Chin bible

JOHAN 21

¹Huai thilte nung in, Tiberias dil ah Jesu a nungzuite kiang ah a kilak nawn a; hichibang in amah mah a kilak hi.

²Simon Peter, Thomas Didum a chih uh, Galili gam a Kana khua a Nathanael, Zebedai tapa nihte, a nungzui dang nihte toh a omkhawm uhi.

³Simon Peter in a kiang uah, “Ngasa beng ding in ka kuan dek” a chi a, amau a kiang ah, “Kou leng na kiang ah ka hong sam ding uh” a chi uhi. A pawtkhia ua, long ah a tuang ua, huai zan in bangmah a man kei uhi.

⁴Phalvak in Jesu piautak ah ading a; himahleh a nungzuite’n Jesu ahi chih a theikei uhi.

⁵Jesu’n a kiang uah, “Naute aw, nekding banghiam na nei uhia?” a chi hi. Amau a kiang ah, “Neilou” chi in, a dawng uhi.

⁶Huan a kiang uah, “Long sik taklam ah len pai le uchin na man ding uh” a chi hi. A pai ua, ngasa tam ziak in a kaikhe zoukei uhi.

⁷Huchi in nungzui Jesu itpa’n Peter kiang ah, “Toupa eive” a chi hi. Huchi in, Toupa ahi chih Simon Peter in a theih in, a puanak tungsilh a teng a, vuaktang a om ahi a, dil ah a tawmkheta hi.

⁸Himahleh nungzuite’n long neuchik in, len ngasa a dim toh kaikawm in a honzuan ua, gam a kipan in a gamla ngalkei ua, tong za nih hiam phet ahi.

⁹Huan gam a a hongsuah tak un, meihol a mei tohsa a tung a ngasa leh tanghou emsa a mu uhi.

¹⁰Huan Jesu’n a kiang uah, “Tuin na ngasa mat uh a khen hon latou un” a chi hi.

¹¹Huchi in Simon Peter a vatuang a, len ngasa lianpi pi a dim tuigei ah hon kaikhia a, za leh sawmnga leh thum a pha hi: huchi lawmlawm in tam mahleh len a kek kei hi.

¹²Huan Jesu’n a kiang uah, “Zingan na ne un” a chi hi. Nungzuite lak ah kuamah in a kiang ah, “Kua na hia?” chi in a dong ngamkei uhi, Toupa ahi chih a thei uhi.

¹³Huan Jesu a hongpai a, tanghou a la a, a kiang uah a pia a, ngasate leng huchi bangmah in a pe sam hi.

¹⁴Huai tuh Jesu misi lak a kipan a thohnawn nung a, a nungzuite kiang a a kilak thumveina ahi.

¹⁵Huan zingan a nekkhit un, Simon Peter kiang ah Jesu’n, “Simon, Johan tapa, nang hiaite sang in kei n’on itzaw hia?” a chi hi. Aman a kiang ah, “He, Toupa, k’on it chih na thei hi” a chi hi. Aman a kiang ah, “Ka belamnoute vak in” a chi hi.

¹⁶Huan a nihveina ding in a kiang ah, “Simon, Johan tapa, nang kei n’on it hia?” a chi nawn hi. Aman a kiang ah, “He, Toupa, k’on it chih na thei hi” a chi nawn hi. Aman a kiang ah, “Ka belamte ching in,” a chi hi.

¹⁷Huan a thumveina din a kiang ah, “Simon, Johan tapa, nang kei n’on it hia?” a chi hi. Huan thumveina a nang kei n’on it hia? A kiang a a chih ziak in Peter a lungkham a, a kiang ah, “Toupa, bangkim na thei a, k’on it chih na thei hi,” a chi hi. Jesu’n a kiang ah, “Ka belamte vak in.”

¹⁸“Chihtaktak in, chihtaktak in, k’on hilh ahi, na naupan lai in na tai ah na kigak a, na utna peuh ah na hoh a; himahleh na upat hun chiang in na khut na zak ding a, midang in a hon gaksak ding uh, na utlouhna lam ah a honkai ding uh, a chi hi.

¹⁹Huai thu bangchidan a si in ahia Pathian a pahtawi ding chih theihsakna ding a a gen ahi. Huai a genkhit in, a kiang ah, Honzui in” a chi hi.

²⁰Huaikhit in Peter a kihei a, Jesu nungzui itpa, nitak anneklai a a awm ngai a hong awnphei a, “A mansakpa ding kua pen ahia?” chi pa’n, honzui a mu hi.

²¹Peter in amah a muhtak in, Jesu kiang ah, “Toupa, hiai min bang a hih dia?” a chi hi.

²²Jesu’n a kiang ah, “Ka hongpai nawn tan a om nilouh din deih leng, huai nang bang lunghimawh zenzen? Nang honzui in” a chi hi.

²³Huchi in huai nungzuipa silou ding in a thu unaute lak ah a thangta a; himahleh Jesu’n a sikei ding chih a kiang ah a gen kei a, “K’ong pai nawn tan a om nilouh din deih leng huai nang bang lunghimawh zenzen?” chi lel ahizaw hi.

²⁴Huai nungzuipa “Hiai thu theisakpa leh gelhpa ahi; huan a thu theihsak a dik chih i thei uhi.”

²⁵Huan hiaite lou Jesu thilhih a dang tampi a omlai; huaite gelhvek ding hileh, laibu gelh ding tengteng khovel ah leng tazou in ka gingta kei hi. Amen.