Read Paite Chin JOHAN 3 Bible Online

JOHAN 3 - Paite Chin bible

JOHAN 3

¹Pharisaite lak a mi, Judate vaihawmpa, a min Nikodem a om hi.

²Huai mi zan in Jesu kiang ah a hong a, a kiang ah, “Rabbi, Pathian a kipan hongpai sinsakpa na hi chih ka thei uhi. Pathian na kiang a omlou hileh hiai thillamdang na hihte kuamah in a hih theikei ding” a chi hi.

³Jesu’n a dawng a a kiang ah, “Chihtaktak in, chihtaktak in k’on hilh ahi, Mi kuapeuh a pianthak kei leh Pathian gam a mu theikei” a chi hi.

⁴Nikodem in a kiang ah, “Mi a teknung in bangchi’n a piangthak thei dia? A nu sung a nihvei lut in a piang thei dia hia?” a chi hi.

⁵Jesu’n a dawng a, “Chihtaktak in, chihtaktak in k’on hilh ahi, Kuapeuh tui a leh Kha a a pianthak kei leh Pathian gam a lut theikei hi.

⁶Sa suan peuhmah sa ahi a, Kha suan peuhmah kha ahi.

⁷Na pianthak ngeingei ding ahi k’on chih lamdang sa ken.

⁸Huih a utna na ah a nung a, a ging na za hi, himahleh koi a kipan hongpai ahia, koi ah ahia a hoh ding chih na thei ngalkei a; kuapeuh Kha a piang huchibang mah in a om hi” a chi hi.

⁹Nikodem in a dawng a, “Hiai bangchi’n a omthei dia?” a chi hi.

¹⁰Jesu’n a dawng a a kiang ah, “Israelte sinsakpa na hi ngal a, huaite na theikei maw?

¹¹Chihtaktak in chihtaktak in k’on hilh ahi, kou ka theih uh ka gen ua, ka muh uh ka theisak uh; himahleh ka thu theihsak uh na sangkei uhi.

¹²Khovel thil k’on hilh bawn gingtaloute’n, vanlam thil honhilh leng bangchi’n na gingta ding ua?

¹³Mihing Tapa van a ompa leh van a kipan hongsukpa kia loungal kuamah van ah a kahtou ngeikei uhi.

¹⁴“Mosi in gamdai a gul a khaikang bang in, Mihing Tapa khaikang in a om ding hi.

¹⁵Kuapeuh a gingta in amah ziak a tangtawn hinna a neihna ding in.

¹⁶Pathian in khovel a it mahmah ziak in a Tapa tang neihsun a pia hi. Kuapeuh amah gingtate a manthat louh ua, tangtawn hinna a neih zawkna ding un.

¹⁷Khovel siamlouh tangsak ding in Pathian in a Tapa khovel ah a sawl kei, khovel amah vanga a hin theihna ding in a sawl ahizaw hi.

¹⁸“Kuapeuh amah gingta siamlouh in a omkei ding a, kuapeuh a gingtalou, tu a kipan siamlouh in a ompah ngal hi, Pathian Tapa tang neihsun min a gintak louh ziak in.

¹⁹Hiai siamlouhna ahi, vak khovel ah a hong a, himahleh min vak sang in mial a itzaw uh, a thilhihte uh a gitlouh ziak in.

²⁰Kuapeuh thil gilou hih in vak a hawnak, vak ah leng a hongpai kei hi; huchilou in zaw a thilhihte a lang kha ding hi.

²¹Himahleh kuapeuh a dik hihte a thilhih uh Pathian ziak a hih chih a latna ding in vak ah a hongpai uhi” a chi hi.

²²Huaikhit in Jesu a nungzuite toh Judia gam ah a hoh ua, huai ah Jesu a kiang uah a om nilouh a, a baptist zel uhi.

²³Johan in leng Ainon ah, Salim khaw kiang ah a baptist sam a, huai a tui a tam ziak in mi a hong ua, baptisma a tang uhi.

²⁴Hiai hun in Johan suangkulh a khum ahi naikei hi.

²⁵Huan Johan nungzuite leh Juda khenkhat silsiang thu ah a kisel uhi.

²⁶Johan kiang ah a hongpai ua, a kiang ah, “Rabbi, Jordan gal a na kiang a om, a thu mi na theihsakpan, ngai dih, mi a baptist a, mi tengteng a kiang ah a hongpai uh” a chi uhi.

²⁷Johan in a dawng a, “Van apan a piak ahihkeileh mihing in bangmah a nei theikei uhi.

²⁸Kei Khrist ka hi kei hi, a ma a misawl ka hi, ka chih, noumau mahmah hon theihpihte na hi uhi.

²⁹Mouneipa mounu pasal ahi; himahleh mouneipa lawm ding a a thu za mouneipa aw ziak in a kipak mahmah a; En un ka kipahna a tungta ahi.

³⁰Amah a lian semsem ding a, kei bel ka neu hiaihiai ding hi” a chi hi.

³¹Tunglam a kipan hongpai zaw mi tengteng sang a tungnungpen ahi; lei a kipan bel lei a ahi a, leithu a gen a, van a kipan a hong paipa zaw mi tengteng sang a tungnungpen ahi.

³²A muh leh a zak peuh a theisak hi; kuamah in a thu theihsak a taksang kei uhi.

³³A thu theihsak taksang in, Pathian midiktat ahi, chih a kipsak hi.

³⁴Pathian sawl in Pathian thu a gen hi; aman zaw teh chitchiat in Kha a pe ngalkei hi.

³⁵Pa in Tapa a it a, a khut ah bangkim avek in a peta hi.

³⁶Kuapeuh Tapa gingta in tangtawn hinna a nei; himahleh Tapa gingtalou in hinna a neikei ding a, Pathian thangpaihna a tung ah a omzaw” a chi hi.