Read Paite Chin JOHAN 4 Bible Online

JOHAN 4 - Paite Chin bible

JOHAN 4

¹Johan sang in Jesu’n nungzui tamzaw a bawl a, tam a baptist zaw chih Pharisaite’n a za uh chih Toupa’n a theih in,

²Jesu hial in zaw a baptist kei, a nungzuite’n a baptist zawzel uhi,

³Judia gam paisan in, Galili gam ah a kik nawnta hi.

⁴Huchi in Samaria gam tawnsuak a a pai teitei a kul hi.

⁵Huchi in Samaria gam khua khat, Saikar a chih uah a hongtung a, Jakob in a tapa Joseph kiang a mun a piakna kiang ahi;

⁶Jakob tuileh huai ah a om hi. Huchi in Jesu a paigim ziak in tuileh gei ah a tu a; sun annek hun ahi.

⁷Huchi in Samari numei khat tuitawi in a hong kuan a, Jesu’n a kiang ah, “Dawn ding honpia in” a chi hi.

⁸A nungzuite lah nekding lei in khua ah a hohta uhi.

⁹Huchi in Samari numei in a kiang ah, “Nang Judami hi chin a, kei Samari numei hi’ng a, bangchidan a ka kiang a dawn ding hon ngen na hia? a chi hi. Judate’n Samari mite bangmah in a ngai ngal kei ua” a chi hi.

¹⁰Jesu’n a dawng a a kiang ah, “Pathian thil thawnpiak leh dawn ding honpia in, na kiang a chipa thei leteh zaw nang a kiang a ngen zaw ding chin a, aman tuihing honpe ding ahi” a chi hi.

¹¹Huan numei in a kiang ah, “Pu, suahna ding bangmah lah na neikei a, tuileh a thukthuk toh, koi a kipan in ahia huai tuihing na muh ding?

¹²Ka pu uh Jakob sang in na thupizaw ahia? Aman hiai tuileh honpia a, amah leh a tate leh a gante’n leng a dawn uhi” a chi hi.

¹³Huan Jesu’n a kiang ah, “Kuapeuh hiai tui dawn a dangtak nawn ding uh;” chi in a dawng hi.

¹⁴“Kuapeuh a kiang a ka piak ding tuidawn bel, dangtak nawn ngeilou ding a; a kiang a tui ka piak ding pen amah ah tuinak a hong phulkhe ding a, tangtawn hinpha in a kikhohtou ding ahi” a chi hi.

¹⁵Huan numei in a kiang ah, “Pu, huai tui honpe ve, ka dangtak nawn louhna ding leh hiai tantan a tuitawi ding a ka hong kuanlouhna din” a chi hi.

¹⁶Jesu’n a kiang ah “Pai inla, na pasal va sam inla, hiai ah hongkik nawn in” a chi hi.

¹⁷Numei in a kiang ah, “Pasal ka neisam a” chi in a dawng hi. Jesu’n a kiang ah, “Pasal ka neisam a, na chih zaw, na chi dik ve;

¹⁸Pasal nga na neita a, tua na neihpa na pasal ahi kei him ahi, hiai thu na chidik ve” a chi hi.

¹⁹Numei in a kiang ah, “Pu, zawlnei na hi chih ka thei hi.

²⁰Kou pipute’n hiai tang ah Pathian a bezel ua; nou bel mihing in Pathian a biakna mun ding Jerusalem khua ahi na chi sese ua” a chi hi.

²¹Huan Jesu’n a kiang ah, “Numei, kei hon gingta in, hiai tang chitchiat lou leh Jerusalem khua chitchiat lou ah leng Pa na biak hun uh a tungta hi.

²²Nou na theihlouhpi uh na benak ua; kou zaw ka theih uh ka bia uhi. Hotdamna Judate a kipan ahi.

²³Himahleh a hun a tungta, tuin leng a tungkhin lel hi, huai hun chiang in Pathian be taktakte’n kha leh thutak a Pa be ding uh ahi, Pa’n huchibang mi a bemi ding in a zong hi.

²⁴Pathian zaw Kha ahi; a bemite’n kha leh thutak a a biak ngeingei ding uh ahi” a chi hi.

²⁵Numei in a kiang ah, “Messia, Khrist a kichi, a hongpai ding chih ka thei, amah a hongpai chiang in bangkim a honhilh ding” a chi hi.

²⁶Jesu’n, “Keimah nang hon houpihpa, huai amah ka hi” a chi hi.

²⁷Huan huailai in a nungzuite a hongpai ua, numei a houpih lamdang a sa mahmah uhi; himahleh kuamah in “Bang zong na hia? Bangdia numei houpih?” a chi kei uhi.

²⁸Numei in a tuibel a paisan a, khua ah a vapai a, mite kiang ah,

²⁹“Ka thilhih peuh honhilh zel mi khat a om, hong unla, en dih uh; Khrist a hih theihtuak hiam?” a chi hi.

³⁰Amaute khua a kipan a hongpawt ua, a kianglam a zuanta uhi.

³¹Huai kal in nungzuite’n a kiang ah, “Sinsakpa, ne in” a chi uhi.

³²Himahleh aman a kiang uah, “An na theihlouh uh nekding ka nei” a chi hi.

³³Huan nungzuite a kihou ua, “A nekding min a hontawi ding ua eita maw? a kichi uhi.

³⁴Jesu’n a kiang uah a gen a, “Hon sawlpa deihlam hihleh, a nna sepzoh ding ka an ahi.

³⁵Nou, Buhlakna ding kha li a omlai, na chi uh hilou hia? Ngai un k’on hilh ahi, dak unla loute en un, tu mahmah in lak ding in a min ahi.

³⁶A lapa’n loh a mu a, tangtawn hinna ding in gah a la hi, huchi a a tuhpa leh a lapa a kipah tuak theihna ding un.

³⁷Khat in a tuha, midang in a la chih thu hiai ah a dik hi.

³⁸Na sepgimlouh uh at dia honsawl ka hi; midang in a sem ua, nou a sepsa uh na sunzom uh ahi” a chi hi.

³⁹Huan numei in, “ka thilhih peuh honhilh zel,” chi a a theihsak thu ziak in huai khua a om Samari mi tampi in Jesu a gingta uhi.

⁴⁰Huchi in Samari mite Jesu kiang ah a hongpai ua, a kiang ua om ding in a khou ngutngut ua; huchi in huai ah ni nih a tam hi.

⁴¹Huan midang tampi in amah thu ziak in a gingta samta uhi.

⁴²Amau numei kiang ah, “Tun zaw na thugen ziak a gingta ka hi kei uh; koumau ngei in a thu ka za ua, hiai mipa khovel Khrist, Hondampa ahi ngeina chih ka theita uh” a chi uhi.

⁴³Huan ni nih nung in huai apan pawt in, Galili gam ah a paita hi.

⁴⁴Jesu ngei in, zawlnei zaw amah kholam ah pahtawi in a om ngeikei chih a theisak hi.

⁴⁵Huchi in Galili gam a hongtun in Galili gam mite’n a na kipahpih ua, Jerusalem khua a Ankuanglui lai a a thilhih tengteng a muhtak ziak un; amau mah leng Ankuangluina ah a hohsam uhi.

⁴⁶Galili gam a Kana khua, tui uain a suahsakna mun a hongtung nawnta hi. Kumpi Milian kuahiam a om a, a tapa Kapernaum khua ah a china hi.

⁴⁷Judia gam a kipan Galili gam ah Jesua hong chih a zak in a kiang ah a hohtou a, “Va hohsuk a a tapa sidekdek hihdam ding in” a chial hi.

⁴⁸Jesu’n a kiang ah, “Chiamtehnate leh thillamdangte na muhkei uh leh na gingta kei hial ding uh, a chi hi.

⁴⁹Huan Kumpi Milian in a kiang ah, “Pu, ka ta sihman hongsuk mai in” a chi hi.

⁵⁰Jesu’n a kiang ah, “Pai nawnta in, na tapa a damta” a chi hi. Huai mipa’n Jesu’n a kiang a thu a gen a gingta a, a paita hi.

⁵¹A paisuk lai in a sikhate’n a na dawn ua, “Na tapa a damta” a na chi uhi.

⁵²Aman a kiang uah a dam tunglai a dong hi. Amau a kiang ah, “Zan in ni kihek lai in a khosik a daita hi” a chi uhi.

⁵³Naupang pa’n Jesu’n a kiang a, “Na tapa a damta hi” a chihlai ahi chih a theita a; amah leh a inkuanpihte’n avek un, a gingta ta uhi.

⁵⁴Hiai Judia gam a kipan Galili gam a a hong a Jesu thillamdang hih a nihveina ahi.