Read Paite Chin JOHAN 5 Bible Online

JOHAN 5 - Paite Chin bible

JOHAN 5

¹Huai thil nung in Judate Ankuangluina a om a; Jerusalem khua ah Jesu a hohtou hi.

²Jerusalem ah belam kongkhak kiang ah dil a om a, huai mun Hebru pau in Bethes’da a chi ua, inlim nga a nei hi.

³Huai ah tui hongtat ngak in damloute, mittawte, khebaite, zawte tampi a lum uhi.

⁴Bang hun hiam in huai dil ah angel a hohsuk a, tui a vatok a; kuapeuh huai tui a kitoh khit a valut masa penpen in, bangchibang natna nei hileh leng hihdam in a om zel hi.

⁵Huai ah kum sawmthum leh giat damlou mi kuahiam a om hi.

⁶Jesu’n a lum a mu a, huchibang in sawtpi a omta chih a thei a, a kiang ah, “Hihdam na ut hia?” a chi hi.

⁷Damloupa’n, “Pu, tui kitoh in dil a honkoih ding mi ka neikei hi, ka hohsung in midang in hon makhelh nak uh” chi in a dawng hi.

⁸Jesu’n a kiang ah, “Thou inla, na awngphah la inla, khe in paita in” a chi hi.

⁹Thakhat in huai mipa a dampah a, a awngphah la in, a paita hi.

¹⁰Huai ni khawlni ahi, huchi in Judate’n a dampa kiang ah, “Khawlni eive, na awngphah na lak a siangkei” a chi uhi.

¹¹Aman a kiang uah, “Hon hihdampa ngeingei in ka kiang ah, na awngphah la inla, khe in paita in” honchi ahi, a chi a, a dawng hi.

¹²Amau a kiang ah, “Na awngphah la inla, khe in paita in, na kiang a chipa kua ahia?” a chi ua, a dong uhi.

¹³Himahleh a dampa’n kua ahia a hih a theikei hi, huai a mipi a om ziak un Jesu a paimangta hi.

¹⁴A denchiang in Jesu’n amah Pathian biakin ah a mu a, a kiang ah, “Ngai in, na damta hi, khialnawn ken, huchilou in zaw thil hoihlou sem na tung ah a hongtung kha ding hi” a chi hi.

¹⁵Huan huai mi a va paikhia a, Judate kiang ah “A hihdampa Jesu ahi” chih a hilh hi.

¹⁶Huchi in khawlni a a thilhih ziak in Judate’n Jesu a engbawl uhi.

¹⁷Himahleh Jesu’n amau a houpih a, a kiang uah, “Ka Pa’n tutan pha’n nna a semzel a, ken leng ka semzel” a chi hi.

¹⁸Huchi in Judate’n hihlup a tum semsem ua, khawlni a tanlouh ziak kia ahi kei a, Pathian amah Pa a a bawl leh Pathian toh kikim a a kibawl ziak in leng ahi.

¹⁹Jesu’n a kiang uah, “Chihtaktak in, chihtaktak in, k’on hilh ahi, Tapa in amah in bangmah a hih theikei, Pa thilhih a muh kia loungal; thil a hih peuhmah, Tapa in leng a hih samzel hi.

²⁰Pa in Tapa a it a, a thilhih peuhmah a kiang ah a musak a; hiaite sang a thilhih thupizaw a kiang ah a musak lai ding, lamdang na sak ding un.

²¹Pa in misite a kaithou a, hinna a piak bang in, Tapa in leng a utna na kiang ah hinna a pia hi.

²²Pa in kuamah vai a hawmsak ngeikei, vai tengteng Tapa in a hawm sak zawta hi;

²³Mi tengteng in Pa zahna a piak bang un, Tapa leng zahna a piakna ding un. Kuapeuh Tapa zahloute’n, Pa a sawlpa leng a zahkei uhi.

²⁴“Chihtaktak in, chihtaktak in, k’on hilh ahi, Kuapeuh ka thu za a, hon sawlpa gingta in, tangtawn hinna a nei; siamlouh in a omkei a, sihna a kipan a pawt a, hinna ah a lut zawta hi.

²⁵Chihtaktak in chihtaktak in k’on hilh ahi, A hun a tung dekta, tuin leng a tung lellelta, huai hun chiang in misite’n Pathian Tapa aw a za ding ua, a za peuhmah a hing ding uh.

²⁶Pa in amah a hinna a neih bang in, Tapa in leng amah a hinna nei ding in a peta hi.

²⁷Mihing Tapa a hih ziak in, a kiang ah thukhenna leh thuneihna a pia hi.

²⁸Hiai lamdangsa kei un, a hun a tungta, huai hun chiang in han a om tengteng in a aw a za ding ua,

²⁹A hong pawtvek ding uhi; thil hoih hihte hinna tang in a thounawn ding ua, thil gilou hihte siamlouh tang in a thounawn ding uhi.

³⁰“Keimah in bangmah ka hih theikei; bil a ka zak bangbang in vai ka hawmzel; ka vaihawm a dik ahi, keimah deihlam in om ka tum kei a, hon sawlpa deihlama om ka tup zel ziak in.

³¹“Keimah tanchin theisak hileng, ka thu theihsak a dik kei ding hi.

³²Ka tanchin theisak midang ahi, aman ka tanchin a theihsak a dik chih ka thei hi.

³³Nou Johan kiang ah mi nasawl ua, aman thutak thu hon theisak hi.

³⁴Thu theihsak ka san mihing a kipan ahi kei a; himahleh na hinna ding un hiai thu ka gen ahi.

³⁵Huai Johan khawnvak kuangtak leh vaktak ahi, a vak ah nuamsak tak dih na ut uhi.

³⁶“Himahleh theihsakna ka neihzaw Johan theihsakna sang in a thupizaw hi: Pa’n thilhih zohding a a honpiak, ka thilhih ngei in Pa’n honsawl chih ka tanchin a theisak hi.

³⁷“Pa hon sawlpa’n leng ka tanchin a theisakta hi. Nou chiklai mah in a aw na za ngeikei ua, a mel leng na mu ngeikei uhi.

³⁸A thu leng noumau ah na paikei uh, a sawlpa na gintak louh ziak uh ahi.

³⁹“Laisiangthou na simsim ua, asung a tangtawn hinna om a na gintak ziak un: huai Laisiangthou ka tanchin theihpihna ahi.

⁴⁰Himahleh hinna nei ding in ka kiang ah na hong nuam kei uhi.

⁴¹Mihing pahtawina ka sangkei.

⁴²Himahleh nou k’on thei hi, Pathian itna noumau ah na neikei uhi.

⁴³Ka Pa min in ka hong a, noute’n n’on kipahpih kei uh: midang amah min in hong leh amah na kipahpih ding uhi.

⁴⁴Nou kipahtawi tuahna paktate’n Pathian tak kia a pawt pahtawina zong lou in bangchi’n kei n’on gingta thei ding ua?

⁴⁵Ken Pa kiang a nou k’on hek ding gingta kei un: nou honhek khat a om na muan uh Mosi ngei ahi.

⁴⁶Mosi gingta hile uchin aman kei tanchin gelh a, keileng n’on gingta tading uhi.

⁴⁷Himahleh amah thugelh gingtalou in, bangchi’n ka thute na gingta ding ua?” a chi hi.