Read Paite Chin JOHAN 6 Bible Online

JOHAN 6 - Paite Chin bible

JOHAN 6

¹Huai thilte khit in, Galili dil, Tiberias dil kichi gallam ah Jesu a paita hi.

²Damloute tung a thillamdang a hihte a muh ziak un mipi tampi in amah a zui uhi.

³Jesu tang ah a hohtou a, huai ah a nungzuite kiang ah a tu hi.

⁴Huan Paikan Ankuangluina, Judate Ankuangluina a naita hi.

⁵Jesu a dak a, mipi tampi in a kiang lam honzuan in a mu a, Philip kiang ah, “Hiaite nekding tanghou koi a lei ding i hi ua?” a chi hi.

⁶Huai thu amah ze-et nadia a gen ahi, a hih ding lah aman a theigige hi.

⁷Philip in a kiang ah, “Michih in tawmchik a a tan chiat ding u leng, makhai za nih man tanghou in a daihkei ding” chi in a dawng hi.

⁸Huan a nungzuite lak a khat, Simon Peter unau Andru in a kiang ah,

⁹“Barli buh tanghou phel nga leh ngasa nih nei pasal naupang khat hiai ah a om hi; himahleh mi hiai zah lawmlawm lak ah bang tham hizou ding ahia?” a chi hi.

¹⁰Jesu’n, “Mite tusak un” a chi hi. Huai ah loupa tampi a om hi. Huchi in pichingte a tuta ua, a tamlam uh sang nga vel ahi.

¹¹Jesu’n tanghou phelte a la a, kipahthu a genkhit in a tute kiang ah a hawm a, huchi mah bang in ngasate leng a deihhun un a hawm sam hi.

¹²Huan a kham nung un, a nungzuite kiang ah, “Bangmah manglou ding in a nente luak un” a chi hi.

¹³Huchi in a luak ua, barli buh tanghou phel nga nete nekbang nente bawm sawmlehnih a hihdim uhi.

¹⁴Mite’n a thillamdang hih a muhtak un, “Hiai mi, zawlnei, khovel a hong dingpa a na hingei e” a chi uhi.

¹⁵Huchi in amah kumpipa dia bawl ding a mat teitei tum in a hong kuan ding uh chih Jesu’n a thei a, tang ah amah kia in a paituam nawnta hi.

¹⁶Huan nitaklam in a nungzuite dil ah a paisuk uhi.

¹⁷Long ah a tuang ua, dil ah Kapernaum khua a zuan uhi. Khua a mialta a, Jesu lah a kiang uah a hongtung naikei hi.

¹⁸Huihpi hattak a nun ziak in tui a kihot sang hulhul hi.

¹⁹Ching sawmnih leh ching nga hiam, ching sawmthum hiam a kalh nung un, Jesu dil tung ah khe a pai a, long honnaih in a mu ua, a lauta uhi.

²⁰Himahleh aman a kiang uah, “Keimah ka hi, lau kei un” a chi hi.

²¹Huchi in kilawptakin long ah Jesu a tuangsakta ua, huchi in long a zot gam uh a tungpah hi.

²²A zing in dilgal lehlam a mipi dingte’n, long khat loungal long dang a omkei a, Jesu a nungzuite toh long ah a tuang tonkei a, a nungzuite amau kia in a pai uh chih a thei uhi.

²³Himahleh Toupa’n kipahthu a gen nung a, tanghou a nekna kiang uh, Tiberias khua a kipan long neuchikchik a hongtung uhi.

²⁴Huchi in mipi’n Jesu leh a nungzuite a omta kei uh chih a theih un, amau leng longneute a tuang in, Jesu zong in Kapernaum khua a hongtung uhi.

²⁵Huan dilgala a hong muh un a kiang ah, “Rabbi, chik in ahia hiai lam n’ong tun? a chi uhi.

²⁶Jesu’n a kiang uah, “Chihtaktak in, chihtaktak in, k’on hilh ahi, thillamdangte na muh ziak ua hon zawng na hi kei ua, tanghou phel na nekvah ziak uh ahizaw.

²⁷An mang theiphet zawng in phiaphia kei un, himahleh an, tangtawn hinpha a om gige ding, Mihing Tapa honpiak ding zong in phezaw un; Pa Pathian in amah a chiamtehta hi,” chi in a dawng hi.

²⁸Amau a kiang ah, “Pathian nna ka sep theihna ding un bang ahia ka hih ding uh?” a chi uhi.

²⁹Jesu’n a kiang uah, “Pathian nasep hiai ahi, a misawl gingta le uchin” chi in a dawng hi.

³⁰Amau a kiang ah, “Chiamtehna bang ahia na hih ding, ka muh ua nang k’on gintak theihna ding un? Thil bang ahia na hih ding?

³¹Van a kipan a kiang uah amau tanghou nekding a pia chih gelh bang in, Ka pipute un gamdai ah manna a ne uhi” a chi uhi.

³²Jesu’n a kiang uah, “Chihtaktak in, chihtaktak in, k’on hilh ahi, Van a kipan a tanghou na muh pen uh Mosi honpiak ahi kei, ka Pa’n van a kipan tanghou tak nou a honpia hi.

³³Pathian tanghou van a kipan in a hong paisuk a, khovel kiang a hinna pepa ahi” a chi hi.

³⁴Amau “Toupa, huai tanghou honpe gige in” a chi uhi.

³⁵Jesu’n a kiang uah, “Keimah hinna tanghou ka hi; kuapeuh ka kiang a hongpai a gilkial kei ding, kuapeuh kei hon gingta chikmah chiang in a dangtak kei ding.

³⁶Himahleh nou n’on muh un leng n’on gingta kei uh chih k’on hilhta ve.

³⁷Pa’n honpiak peuhmah ka kiang ah a hong paivek ding uh; kuapeuh ka kiang a hongpai ka delhkhe kei hial ding hi.

³⁸Kei deihlam hih ding in van a kipan a hong paisuk ka hi kei a, hon sawlpa deihlam hih ding a hong paisuk ka hi zaw hi.

³⁹Hiai pen hon sawlpa deihlam ahi, aman honpiak tengteng bangmah mangsak lou in, nitawpni chiang in kaithou zaw leng.

⁴⁰Hiai pen ka Pa deihlam ahi, kuapeuh Tapa mu a gingta in tangtawn hinna a neih a, nitawpni chiang in amah ka kaithou ding” a chi hi.

⁴¹Van a kipan a tanghou hong paisuk ka hi a chih ziak in, Judate a tung ah a phun uhi.

⁴²“Hiai mi Joseph tapa Jesu ahi ka hia, a nu leh a pa leng i theih? Van a kipan a hong paisuk ka hi bangchi chih a chi ahia?” a chi uhi.

⁴³Jesu’n a kiang uah, “Phunphun dah un.

⁴⁴Pa honsawlpan a hip kei leh kuamah ka kiang ah a hongpai theikei. Ken a hongpai mi nitawpni chiah ka kaithou ding.

⁴⁵Zawlneite laibu ah Pathian hilh in a omvek ding uh, chih gelh ahi. Michih Pa thu za a thei peuhmah ka kiang ah a hongpai uhi.

⁴⁶Pathian a kipan pen loungal in kuamah in Pa a mu ngeikei, aman zaw Pa a mu hi.

⁴⁷Chihtaktak in, chihtaktak in k’on hilh ahi, kuapeuh a gingta in tangtawn hinna a nei hi.

⁴⁸Keimah hinna tanghou ka hi.

⁴⁹Na pipute un gamdai ah manna a ne ua a si uhi.

⁵⁰Hiai tanghou i chih pen van a kipan a hong paisuk ahi, min a nek ua a sihlouhna ding un.

⁵¹Keimah van a kipan a tanghou hing hong paisuk ka hi, kuapeuh in hiai tanghou a nek leh tangtawn in a hing gige ding; ahi, khovel hinna dia ka piak ding tanghou ka sa ahi” a chi hi.

⁵²Huchi in Judate a kisel ua, “Hiai min bangchi’n a sa nek ding in honpe thei ding ahia?” a chi uhi.

⁵³Jesu’n a kiang uah, “Chihtaktak in, chihtaktak in, k’on hilh ahi, Mihing Tapa sa na nek ua, a sisan na dawnkei uleh noumau in hinna neilou hive uchin.

⁵⁴Kuapeuh ka sa ne a, ka sisan dawn in tangtawn hinna a nei; huan, nitawp ni chiang in amah ka kai thou ding hi.

⁵⁵Ka sa zaw an taktak ahi a, ka sisan leng dawntak taktak ahi.

⁵⁶Kuapeuh ka sa ne a, ka sisan dawn mi keimah ah a om gige a, keileng amah ah ka om gige hi.

⁵⁷Pa hing in honsawl a, Pa ziak a hing ka hih mah bang in, kuapeuh kei hon nete keimah ziak in amah leng a hing ding hi.

⁵⁸Hiai van a kipan a tanghou hong paisuk ahi; na pipute un tanghou a ne ua, a sih bang uh zaw ahi kei; kuapeuh hiai tanghou ne tangtawn in a hing gige ding” a chi hi.

⁵⁹Huai thute Kapernaum khua a kikhopnain a thuhilh lai a a gen ahi.

⁶⁰Huchi in a nungzuite a khen tampi in huai a zak un, “Hiai thuhaksa ahi, kuan a ngaikhe thei dia?” a chi uhi.

⁶¹Huchi in huai thu ah a nungzuite a phun uh chih Jesu’n a lungsim in a thei a, a kiang uah, “Hiai thu in honhih lunghilou hia?

⁶²Mihing Tapa tuma lam a a omna ngei a kahtou mu le uchin, bang na chi ding ua?

⁶³Hinna pia zaw kha ahi a, sa zaw bangmah din a phatuam kei; na kiang ua thu ka gente kha ahi a, hinna leng ahi.

⁶⁴Himahleh na lak uah a khen gingtalou om na hi uh” a chi hi. Jesu’n a gingtaloute leh a mansak dingpa a tung a kipan in a theigige ngal a.

⁶⁵Huan aman, huaiziak in ahi na kiang ua, “Pa in a piak kei leh kuamah ka kiang ah a hongpai theikei” ka chih, a chi hi.

⁶⁶Hiai nung in a nungzuite a khen tampi a paikik ua, amah a kithuahpih nawnta kei uhi.

⁶⁷Jesu’n sawmlehnihte kiang ah, “Nou leng paimang sam na ut uhia?” a chi hi.

⁶⁸Simon Peter in, “Toupa, kua kiang ah ahia ka pai ding uh? Nangman tangtawn hinna thute na nei hi, chi in a dawng hi.

⁶⁹Nangmah Pathian Mi Siangthou na hi chih ka taksangta ua, theih leng ka thei uhi” chi in a dawng hi.

⁷⁰Huan Jesu’n a kiang uah, “Nou sawmlehnihte keimah hon tel hilou na hi umaw? Na lak ua mi khat Diabol a hih laitei toh” a chi hi.

⁷¹Iskariot Simon tapa Judas, sawmlehnihte lak a telsam, huai thu a gen ahi, amah zuausan a mansakpa ding ahi.