Read Paite Chin JOHAN 7 Bible Online

JOHAN 7 - Paite Chin bible

JOHAN 7

¹Huaikhit in Galili gam ah Jesu a vak a; Judate’n amah hihlup a tup ziak un Judia gam a pha nuam kei hi.

²Judate Biakbukte Ankuangluina a naita hi.

³Huchi in a unaute’n a kiang ah, “Hiai a kipan in Judia gam ah vahoh in, na nungzuite’n na thilhih a muh theihna ding un” a chi uhi.

⁴Kuamah in a guk in thil bangmah ahihkei ua, Amahmah in a langtang in mite theih din a hih hi. Hiai thilte na hih ngal leh khovel kiang ah kimusak in” a chi uhi.

⁵A unaute nangawn in leng amah a gingta kei uhi.

⁶Huan Jesu’n a kiang uah, “Ka hun a tung naikei; nou hun zaw chikpeuh in a tung gige hi.

⁷Khovel in nou hon haw theikei hi, kei zaw hon hawnak uhi, a thilhihte uh a gilou chih ka theihsak ziak in.

⁸Nou Ankuangluina ah va hohtou unla, kei zaw tu Ankuangluina ah ka hohtou tadih kei ding, ka hun a tun nailouh ziak in” a chi hi.

⁹Huai thu a kiang uah gen in Galili gam ah a om nilouh hi.

¹⁰Himahleh a unaute Ankuangluina a a hohtouh nung un, amah leng vantang theihlouh in, a guk bang in a hohtou sam hi.

¹¹Judate’n Ankuangluina ah amah a zawng ua, “Koi a om ahia?” a chi uhi.

¹²A tung ah mipite lak a mi a phunsim supsup ua, “Khenkhat in, mi hoih ahi, a chi ua; khenkhat in, hi dekkei e, mipi a pimang ahi” a chi uhi.

¹³Himahleh Judate a kihtak ziak un kuamah in a langtang in a tungtang thu a genlang ngamkei uhi.

¹⁴Ankuanglui sanlaitakin, Pathian biakin ah Jesu a hohtou a, thu a hilh hi.

¹⁵Huan Judate’n, “Hiai mi’n zil ngeiloupi a bang a chia thei ahia?” a chi ua, lamdang a sa mahmah uhi.

¹⁶Huan Jesu’n amau a dawng a, “Ka thuhilh kei a hilou in, hon sawlpa thu ahizaw hi.

¹⁷Kuapeuh amah deihlam hih ut in ka thuhilh Pathian a kipan hia, keimah phuahtawm a ka gen chih a thei ding hi.

¹⁸Kuapeuh amah phuahtawm thugen zaw, amah hoihna zawng ahi; a sawlpa hoihna zawngmi mitak ahi, amah ah diklouhna himhim a omkei hi.

¹⁹Mosi in dan na kiang uah honpe ka hia? Himahleh na lak uah kuamah in Dan na zuikei uhi. Nou bang a chia hon hihlup tum?” a chi hi.

²⁰Mipi’n, “Dawizawl neive; kuan ahia hon hihlup tum?” chi in a dawng uhi.

²¹Jesu’n a dawng a a kiang uah, “Thil khat ka hih nou tengteng in lamdang na sa uh.

²²Ahi a, Mosi in zeksum thu nou a honpiak ziak in khawlni’n leng mi zek na sum zel uhi. Huai pen Mosi a kipan hilou in pipute a kipan ahizaw hi.

²³Mosi dan a tatlek louhna ding a khawlni a pasal in a zek a sum ngal a leh, ken khawlni a mi ka hihdam ziak in ka tung ah na heh tuam umaw?

²⁴A kilat dan in ngaihtuah kei unla, diktattakin ngaihtuah zaw un” a chi hi.

²⁵Huan Jerusalem khua a mi khenkhat in, “Hiai mi thah a tuppa uh hilou hia?

²⁶En dih uh, a langtang in hiai ah thu a gen a, a kiang ah bangmah a genkei uhi. Amah Khrist ahi chih vaihawmte’n a thei taktakta ua eita maw?

²⁷Hiai mi a hong kipatna lam nangawn i thei ngal a. Khrist zaw a hongtun chiang in a hong kipatna lam kuamah in a theikei ding uh” a chi uhi.

²⁸Huaiziak in Pathian biakin a Jesu’n thu a hilhkawm in a kikou a, “Nou n’on thei ua, ka hong kipatna lam leng na thei uh. Himahleh keimah thu a hongpai ka hi kei, amah kei hon sawlpa midik ahi, amah lah na thei ngalkei uhi.

²⁹Ken amah ka thei hi; amah a kipan a hongpawt ka hi a, aman lah a honsawl ngal a” a chi hi.

³⁰Huchi in amah mat a tumta ua, himahleh a hun a tun nailouh ziak in kuamah in a khoih theikei uhi.

³¹Mipi a khen tampite’n bel amah a gingta ua, “Khrist a hongtun chiang in, hiai mi hih sang a tam zaw thillamdang a hih dia hia? a chi uhi.

³²Huan Pharisaite’n a tung a mipi phunna thute a za ua; huchi in siampu liante leh Pharisaite’n amah man ding in heutute a sawlta uhi.

³³Jesu’n, “Sawtloukal na kiang uah ka omphot dia, hon sawlpa kiang ah ka pai ding hi.

³⁴Nou n’on zong ding ua, n’on mu kei ding uh; ka omna ah leng na hong theikei ding uh” a chi hi.

³⁵Huan Judate a kihou ua, “I muhlouh ding in hiai mi koi a hohdek ading? Grik pemdalhte kiang a hoh in Grikte thu vahilh ding a diam aw?

³⁶Nou n’on zong ding ua, n’on mu kei ding uh, ka omna ah leng na hong theikei ding uh a chih, bang a chihna a diam maw?” a chi uhi.

³⁷Huan ankuangluini nanungpen, ni thupi ni’n, Jesu ading a, a kikou a, “Kuapeuh a dangtak leh ka kiang ah hong henla, dawn hen.

³⁸Kuapeuh kei hon gingta Laisiangthou gen bang in tuihing luite asung apan a hong luangkhe ding” a chi hi.

³⁹Hiai thu a gingtate’n Kha a tan ding thu uh a genna ahi; Kha lah piak ahi nai tadih kei ua, Jesu lah pahtawi a a om nailouh ziak in.

⁴⁰Huchi in mipi lak a khenkhat in huai thu a zak un, “Hiai zaw zawlnei hi petmah e” a chi uhi.

⁴¹Khenkhat in, hiai zaw “Khrist ahi” a chi ua, khenkhat in bel, “Bangdi’n Galili gam ah Khrist a hongpawt tel dia?

⁴²Khrist zaw David suante lak ah, David omna khua Bethlehem ah a pawt ding ahi chih Laisiangthou in a gen ka hia?” a chi uhi.

⁴³Huchi in amah ziak in mipi a kikhen ua, a kilangta uhi.

⁴⁴Khenkhat in mat a ut ua, himahleh kuamah in a khoih tuankei uhi.

⁴⁵Huan heutute, siampu liante leh Pharisaite kiang ah a hongpai nawn ua a kiang uah, “Bang a chia hon pilou? a chi uhi.

⁴⁶Heutute’n, “Hiai mi bang in kuamah in thu a gen ngeikei” a chi ua, a dawng uhi.

⁴⁷Pharisaite’n a kiang uah, “Nou leng pimang a omsamta umaw?

⁴⁸Vaihawmte leh Pharisaite lak a mi amah gingta a omta ahia?

⁴⁹Huai dan theilou mipite soplai, hamsethuak eive ua” a chi ua, a dawng uhi.

⁵⁰Nikodem, tuma a Jesu kiang a hong, a lak ua pangsam ahi a, aman a kiang uah,

⁵¹“Amah kam ngei a thu zak leh a thilhih theih ma in i dan un mi siamlouh a tangsak ngei ahia?” a chi hi.

⁵²Amau a kiang ah, “Nang leng huai Galili mi na hi sam maw? Zong lechin, Galili gam ah zawlnei kuamah pawt ding a omkei uh chih thei tanla” a chi ua, a dawng uhi.

⁵³Huan michih amau in chiat ah a paita uhi.