Read Paite Chin JOHAN 9 Bible Online

JOHAN 9 - Paite Chin bible

JOHAN 9

¹Huan Jesu’n a paikawm in piantung a kipan mittaw khat a mu hi.

²A nungzuite’n a kiang ah, “Rabbi, mittaw sa a a pian kuan ahia thil hihkhial, hiai mi hia, a nu leh a pa?” chi in a dong uhi.

³Jesu’n, “Hiai mi’n a hihkhial kei, a nu leh pa’n leng a hihkhial kei uh; Pathian nasepte a tung a a latna ding ahizaw” chi in a dawng hi.

⁴Sun a hihlai in hon sawlpa nna i sep ngeingei ding uh ahi; zan hi dekdekta ahi, huai hun chiang in kuamah in nna a sem theikei ding uh.

⁵Khovel a ka om sung in khovel vak ka hi” a chi a, a dawng hi.

⁶Huchibanga a genkhit in, lei ah chil a sia a, tungman a bawl a, huan tungman a mit ah a nuh hi.

⁷A kiang ah, “Siloam dil ah vasil in” a chi a. “Siloam tuh sawl” chihna ahi. Vapai in a sil a, mitvak in a hong kiknawn hi.

⁸Huchi in a vengte leh tuma a khutdoh a mute’n, “Hiai mi tukawm a khutdohpa ahi ka hia?” a chi uhi.

⁹Midang in “Amah ahi vaw oi, a chi ua, midang in, hi kei a kibatpih ahizaw, a chi uhi. Aman bel huai mi mah ka hi” a chi hi.

¹⁰Huan amau a kiang ah, “Na mit bangchi’n ahia a hongvak?” a chi uhi.

¹¹Aman, “Mi khat, Jesu a chih un tungman a bawl a, ka mit a nuh a, ‘Siloam dil ah vahoh inla va sil in’ a honchi a, huchi in, ka vahoh a, ka sil a, mitvakna ka muta” a chi hi.

¹²Huan amau a kiang ah, “Amah kaw om ahia?” a chi uhi. Aman, “Ka theikei” a chi hi.

¹³Amaute’n huai mittawpa Pharisaite kiang ah a honpi uhi.

¹⁴Jesu’n tungman bawl a, a mit ahihvak ni khawlni ahi.

¹⁵Huchi in Pharisaite’n a mit a hongvak takdan a dong nawn uhi. Aman a kiang uah, “Ka mit ah tungman a koih a, ka sil a, ka mu theita hi” a chi hi.

¹⁶Huan Pharisai khenkhat in, “Huai mi’n khawlni a tanlouh ziak in, Pathian a kipan ahi kei” a chi uhi. Khenkhat in bel, “Mikhial in bangchi’n hichibang thillamdang a hih thei dia?” a chi uhi. Huchi in a kikhen ua, a kilangta uhi.

¹⁷Mittawpa kiang ah, “Na mit ahihvak nang bangchi bang in amah na ngaihtuah?” a chi nawn ua. Aman, “Zawlnei ahi: a chi hi.

¹⁸Himahleh Judate’n a mit hongvakta nu leh pa a sap masiah uh, mittaw a na hi hima a mit a hongvakta chih a tungtang thu a taksang kei uhi.

¹⁹A nu leh a pa kiang ah, “Hiai mi na tapa uh mittaw sa a piang ahi na chih uh ahi hia? Bangchi’n ahia tua a muhtheih tak?: chi in a dong uhi.

²⁰A nu leh apan, “Hiai ka tapa uh ahi chih ka thei uh, mittaw sa in a piang chih leng ka thei uhi.

²¹Himahleh bangchi’n ahia tua hon muhtheih chih ka theikei uh, a mit hihvakpa leng ka thei sam kei uh; amah dong un; piching ahi a; amah thu kigen thei ahita ” a chi ua, a dawng uhi.

²²Judate a kihtak ziak un a nu leh apan huai thute a gen uhi; Judate’n, huai ma him in leng, Amah Khrist ahi chi a gum a om leh kikhopnain apan nawhsuah ding chih a lemsa chiat ngal uhi.

²³Huaiziak in a nu leh pa’n “Piching ahi, amah dong un” a chi uhi.

²⁴Huchi in mittawpa a samnawn ua a kiang ah, “Pathian phat in hiai mi zaw mikhial ahi chih ka thei uh” a chi uhi.

²⁵Aman bel, “Mikhial ahi hia hilou ka theikei, thil khat ka thei, tuma in ka mit a taw a, tuin ka mu theita hi” a chi a, a dawng hi.

²⁶Amau a kiang ah, “Na tung ah bangchi’n ahia a hih? Na mit bangchi’n ahia ahihvak?” a chi uhi.

²⁷Aman a kiang uah, “Den in k’on hilhta vele, na theinuam ngalkei ua; bang a chia theinuam nawn na hi ua? Nou leng a nungzui hihsam ut u maw?” chi in, a dawng hi.

²⁸Huan amau amah a tai ua, “Nang amah nungzui na hi, kou zaw Mosi nungzuite ka hi uh chi in.

²⁹Pathian in Mosi a houpih chih ka thei uh, hiai mi phiangsan koi a hong kipan ahia ka theihsak kei uh” a chi uhi.

³⁰Huai min a kiang uah, “Huai pen tak ahi a lamdanna, koi a hong kipan ahia na theihlouh uh, ka mit lah ahihvak ngei ngal a a chi hi.

³¹Pathian in mikhial thu a ngaikhe kei chih i thei uhi. Himahleh kuapeuh in Pathian a limsak a, a deihlam ahihleh, Pathian in amah a ngaikhia hi.

³²Khovel omtung a kipan kuamah mittaw sa a piang mit ahihvak nawn chih a kithei ngeikei hi.

³³Hiai mi Pathian a kipan a pawt ahihkei leh bangmah a hih theikei ding” a chi a, a dawng hi.

³⁴Amau a kiang ah, “Nang khial lumlet a piang in hiai bang n’on hilh vial maw?” chi in a dawng uhi. Huchi in amah a nawhkhia uhi.

³⁵Huan a nawhkhia uh chih Jesu’n a za a; amah a muh in, “Pathian Tapa na gingta hia?” a chi hi.

³⁶Aman “Pu, amah kua ahia ka gintak theihna din?” chi in a dawng hi.

³⁷Jesu’n, “Amah na mukhinta a, tua nang hon houpihpa ahi” a chi hi.

³⁸Aman “Toupa, ka gingta hi” chi in amah a bia hi.

³⁹Jesu’n, “Thukhen ding in hiai khovel ah hong ka hi, mittawte mit a hongvakna ding leh, mitvakte mit a hongtawtna ding in” a chi hi.

⁴⁰A kiang a Pharisai omte’n huai thu a zak un, a kiang ah, “Kou leng mittaw ka hi sam u maw?” a chi uhi.

⁴¹Jesu’n a kiang uah, “Mittaw hile uchin khelhna neilou ding hi u chin a, himahleh ka muthei uh na chih ziak un khelhna ah na om gige uhi” a chi hi.