Read Paite Chin NASEPTE 1 Bible Online

NASEPTE 1 - Paite Chin bible

NASEPTE 1

¹Theophilus aw, tuma a ka laigelh ah, Jesu thilhih leh a thuhilh pattung tengteng thu ka gelh hi.

²Kha Siangthou tawn a a sawltak telte kiang a thupiak tampi a piakkhit a van a pitouh a a omni tan a thute ahi.

³Huai sawltakte kiang ah gimna a thuaknung in theihna zuaulou tampi in hing in a kimusak a, ni sawmli hial a kiang uah a kilak a, Pathian gam thu a gen hi.

⁴Huan a omkhawm uh a kithuahpih a, “Jerusalem khua paisan kei un, Pa thilchiam ka gen na zak uh ngak un, a chi chiltel hi.

⁵Johan in tui in a baptist zel a, himahleh, ni sawtlou nung in Kha Siangthou a baptist in na om ding uh” a chi hi.

⁶Huan amau a hong kikhop un a kiang ah, “Toupa, tuin hia Israelte kiang a lalgam na piaknawn ding?” chi in a dong uhi.

⁷Aman a kiang uah, “Pa in a hun leh a ni amah thuthu a om dia a seh, nou theih ding ahi kei hi.

⁸Himahleh, Kha Siangthou na tung ua a hongtun chiang in thilhihtheihna na nei ding uh; huchi in, Jerusalem ah, Judia leh Samaria gam teng leh kawlmong pha in ka theihpihte na hi ding uh” a chi hi.

⁹Huai thu a genkhit in a muh laipi un, van a pitouh in a omta a, meipi in a muh phaklouh uah a pitouta hi.

¹⁰Huan a paitouh lai a vanlam a et nilouh lai un, ngai in, mi nih, puanngou silh in, a kiang uah a hongding uhi.

¹¹Huai mite’n, “Galili gam a mite aw, bangdia vanlam en a ding? Hiai Jesu na kiang ua kipan a van a pitouha om, van a a paitou na muh bang un amahmah a hong kiknawn ding” a chi uhi.

¹²Huan Olive tang a chih ua kipat Jerusalem khua ah a kiknawnta uhi. Huai tang Jerusalem khaw kiang ahi a, khawlni a hohna hunlel ahi.

¹³Huan a lut un, a omna dantan tungnung uah a paitou ua, Peter leh Johan, Jakob leh Andru, Philip leh Thomas, Bartholomai leh Matthai, Alphai tapa Jakob, Simon Zelot Pawl a leh Jakob tapa Judas toh ahi uh.

¹⁴Huai tengteng numei kuate hiam leh Jesu nu Mari toh, Jesu unaute toh, lungsim munkhat a, phatuamngaitak a thum in a om nilouh uhi.

¹⁵Huan huai ni’n unaute lak ah Peter ading a, avek un za leh sawmnih ahi uhi.

¹⁶“Unaute aw, Kha Siangthou in, David kam a, Jesu mante makai Judas thu a genkholh Laisiangthou thu a hongtung ding him ahi.”

¹⁷Amah zaw i lak ua sim tel ahi a, hiai nasepna ah tan leng a neisam hi.

¹⁸Himahleh huai min a khelhna man in mun khat a lei a, a khup in a kia a, a lai in a puakkham a, a gil tengteng a lawtvek hi.

¹⁹Huai thu Jerusalem khua a omte tengteng in a naza uhi; huchi in huai mun amau pau in, Akeldama, a chi ua, huai Sisan Mun, chihna ahi.

²⁰“Sam Laibu ah hiai thu gelh ahi. ‘A omna mun hihgam in om hen, asung ah kuamah omkei hen,’ ‘huan a heutu hihna midang in tang hen’ chih ahi.

²¹Huchi in Toupa Jesu i lak ua lutzel pawt zel a a omsung teng a,

²²Johan baptisma nungsiah, i lak ua kipan van a pitouh a a om ni tan hiai hon kithuahpihpihte lak a mi khat a thohnawnna theihpih ding in a om ding ahi” a chi hi.

²³Huan mi nih a sepkhia ua, khat Joseph Barnaba ahi a, a min khem Justa leh midang khat Mathia ahi.

²⁴Huan a thum ua, “Toupa, Nang, mihing tengteng lungtang thei, hiai nihte a kua zaw ahia na tel honhilh in,

²⁵Judas in amah omna a pai ding in hiai nasepna leh sawltakna a kiaksan sik ading in” a chi uhi.

²⁶Huan ai a sansak ua, a aisan uh Mathia tung ah a tu a; huchi in amah sawltak sawmlehkhatte lak a sim tel ahita hi.