Read Paite Chin NASEPTE 10 Bible Online

NASEPTE 10 - Paite Chin bible

NASEPTE 10

¹Kaisaria khua ah mi khat a min Kornelia a om a; Italy pawl a chih uh, huai pawl a sepaih zaheutupa ahi,

²Amah Pathian limsakmi ahi a, a inkuanpihte tengteng toh Pathian laudan a siam uhi, mite kiang ah thil thawnpiak tampi a pe zel a, Pathian kiang ah leng a thum gige hi.

³Hiai mi’n sun dak kua na ding in mengmuhna in chiantak in Pathian angel khat a kiang a lut a, ‘Kornelia’ chi in, a mu hi.

⁴Huan Kornelia in lau in amah a na en kilkel a, “Toupa, bang ahia?” a chi hi. Aman a kiang ah, Na thumnate leh na thilpiakte theih gige na ding in Pathian ma ah a tungtouta hi.

⁵Tun ah Joppa khua ah mi sawl inla, mi khat Simon Peter a chih uh vapi sak in:

⁶Savunbawlpa Simon inn ah a tung a, a in tuipigei a om ahi, aman na hih ding hon na hilh ding hi” a chi hi.

⁷A houpihpa angel a paitakin, Kornelia in a sikhate lak a mi nih leh a nekbawl gigete lak a Pathian limsak sepaih khat a sam hi.

⁸Thu tengteng a kiang ua a hilhkhit in Joppa khua ah a sawlta hi.

⁹Huan a zingnawn in, khopi zuan a pai, khua a tun kuan un, Peter thum ding in dak gukna vel in intung ah a kaltou hi.

¹⁰Huan a gil a hong kial mahmahta a, annek a utta hi; himahleh nekding a bawllai un ihmu bang in a hongom hi.

¹¹Van kihong in, banghiam bawm, puan liantak bang, ningli a khih, lei a luai a khaikhiak a om a mu hi.

¹²Huai sung ah leitung a khelinei ganhing chichih leh gamsa leh, ganhing bokvak, tungleng vasa chichihte a om uhi.

¹³Huan a kiang ah aw in “Peter, thou in gou inla, ne in” a chi hi.

¹⁴Himahleh Peter in, “Toupa hilou e; sianglou leh nin bangmah himhim ka ne ngeikei” a chi hi.

¹⁵Aw in, a nihveina in, “Pathian in a hih siangthousa nang sianglou chi ken” a chi hi.

¹⁶Huchibang ngen in thumvei a hongom a; huan bawm van a khaitouh in a om nawnta hi.

¹⁷Huan Peter in mengmu bang a a muh theisiamlou a, a buailai in, Kornelia mi sawlte’n Simon inn a na kankhia uhi.

¹⁸Kongkhak bul ah a na ding ua a sam ua, “Simon, Peter a chih uh, huai a a tun leh tun louh” a na dong uhi.

¹⁹Peter in mengmu bang a a muh a ngaihtuahlai in, Kha in a kiang ah, “Ngai in, mi thum in a hongzong uh.

²⁰Huchi in thou inla, kum inla, bangmah ginglel lou in amau zui in; amau ka sawl ahi uh” a chi hi.

²¹Huchi in Peter huai mite kiang ah a hohsukta a, a kiang uah, “Ngai un na zon uh ka hi; bang ahia na hongna uh?” a chi hi.

²²Amau, Angel siangthou khat in, Kornelia sepaih zaheutupa, midiktak, Pathian laudansiam, Juda nam tengteng lak a mi hoih kiang ah, na thugen a zakna din, a inn ah nangmah sam ding in, a hilh hi, a chi uhi.

²³Huchi in mite a samlut a, a giaksakta hi. Huan a zing in Peter a thou a, a kiang uah a pai a, Joppa khomi unau kuate hiam leng a kiang uah a pai sam uhi.

²⁴Huan a zingnawn in Kaisaria khua ah a lutta uhi. Kornelia in, a sanggamte leh a lawm deihpente samkhawm in, amau a na ngak nilouh hi.

²⁵Peter a honglut dek laitak in Kornelia in a na dawn a, a khebul a khupboh in, a bia hi.

²⁶Himahleh Peter in amah a kaithou a, ding in, “Keileng mihing ka hi” a chi hi.

²⁷Amah toh kihou kawm in a lut a, mi tampi omkhawm a mu hi.

²⁸A kiang uah, “Juda mi namdang toh kithuah leh pai a sianlouh dan noumau na thei uhi; himahleh kuamah sianglou leh nin ka chih ding ahi kei chih Pathian in a hon theisak hi.

²⁹Huaiziak in na hong saptakin sellou in ka hongpai ahi. Huchi in ka hondong ahi, bangdia honsam na hi ua le?” a chi hi.

³⁰Huan Kornelia in, “Ni li ahita, tu hun bang tan in, ka inn ah, dak kua na hun thumna ah ka thum a; ngai in, puan vaktak silh mi khat ka ma ah a hongding hi,

³¹‘Kornelia, na thumna zak in a omta, mi kiang a na thil thawnpiakte leng Pathian in a theigige hi.

³²Huaiziak in Joppa khua ah Simon, Peter a chih uh, sam ding in mi sawl inla, na kiang ah sam in; amah tuipi gei ah savun bawlpa Simon in a tung ahi, amah a hongtun chiang in na kiang ah thu a gen ding hi’ a chi hi.

³³Huaiziak in na kiang ah mi k’on sawl pah ahi; na hong a hoih ahi. Huchi in Toupa’n thu a honpiak peuhmah thei ding in tun ah Pathian mitmuh in i vek un hiai ah i om hi, a chi hi.

³⁴Huan Peter in a gen a, “Pathian in mi deihsaktuam a neikei chih, diktak in ka thei hi;

³⁵Himahleh namchih lak ah kuapeuh amah kihtakdan siam a, diktak a gamta peuhmah, a pahtakmi ahi naknak uhi.

³⁶Aman khamuanna Tanchinhoih Jesu Khrist tungtawn in Israel suante kiang ah a gen a, Jesu mi tengteng Toupa ahi.

³⁷Johan in a tangkou pihpih baptisma nung in, hiai Tanchinhoih, Galili gam a kipan a hongthang pan a, Judia gam tengteng ah a thangsuak a, noumau leng na thei uhi;

³⁸Nazaret Jesu tungtang thu, huchi a Pathian in amah Kha Siangthou leh thilhihtheihna a a thaunilh dan, Pathian a kiang a a om ziak in amah mi tung a thil hoih hihleh Diabol gawt tengteng hihdam in a vialvak vak hi.

³⁹Judate gam ah leh Jerusalem khua a a thilhih tengteng theihpih te ka hi uhi, amah sing dawn ah khai in a that uhi.

⁴⁰Amah Pathian in ni thum ni’n a kaithou nawn a, chiantak in a kitheisak hi,

⁴¹Himahleh mi tengteng kiang ah ahi kei a, Pathian in theihpih dia a sehkholhte kiang kia ah ahi koute, misi lak a kipan a thohnawn nung a a kiang a ne a dawnte kiang ah.

⁴²Amah misi leh mihingte tung a Vaihawmpa dia Pathian seh ahi chih, mi kiang a tangkoupih leh theisak ding in Pathian in thu a honpia hi.

⁴³Kuapeuh amah gingta a min ziak in khelhnate ngaihdam in a om ding uh chih hiai a tanchin zawlnei tengteng in a na theihsak sak uh ahi” a chi hi.

⁴⁴Peter in huai thu a genlai tak in thu zate tengteng tung ah Kha Siangthou a hongtung hi.

⁴⁵Zeksumte lak a a gingtate Peter honzui peuhmah in Kha Siangthou thawnpiak Jentelte tung ah leng sunbuak a hih ziak in lamdang a sa mahmah uhi.

⁴⁶Pau theihlouh a thugen in Pathian phat in a za uhi.

⁴⁷Huan Peter in a phuang a, “Hiai mite, eimah bang a Kha Siangthou tang sam, baptisma ding in tuizat kuama’n a kham thei dia hia?” a chi hi.

⁴⁸Huchi in Toupa min a baptisma tan ding thu a pia hi. Huaikhit in ni bangzah hiam tam ding in a khou uhi.