Read Paite Chin NASEPTE 11 Bible Online

NASEPTE 11 - Paite Chin bible

NASEPTE 11

¹Huan Judia gam a sawltak leh unau omte’n Jentelte’n leng Pathian thu a gingta uh chih a zata uhi.

²Huchi in Peter Jerusalem khua a tuntouh tak in, zeksumte’n a kiang ah,

³“Zeksumloute inn ah lut in, a kiang uah na ne” chi in a kalhta uhi.

⁴Himahleh Peter in a bul a kipan in kizom zel in a kiang uah a hilhchian hi:

⁵“Joppa khua ah thum in ka om a, huan ihmu bang in ka om a, banghiam bawm puan liantak bang a ningli a khih, van a kipan a khiaksuk bang in ka mu a; ka kiang ngeingei a hongtung hi.

⁶Huai tuh ka en kilkel a, ka ngaihtuah a, ‘lei a ganhing kheli nei leh gamsate chichih, awm a kitholh ganhingte leh tungleng vasate ka mu hi.’

⁷Huan aw in ‘Peter, thou in; gou inla, ne in, honchi in,’ ka za hi.

⁸Himahleh ken, Toupa, hilou e, sianglou leh nin bangmah ka kam ah a lut ngeikei, ka chi hi.

⁹Himahleh van a kipan in aw in, a nihveina in, Pathian in a hih siangthousa nang sianglou chi ken, chi in a hon dawng hi.

¹⁰Huchibang ngen in thumvei a hongom a: huan bangkim van ah khaitouh in a om nawnta hi.

¹¹Huan ngai in, mi thum Kaisaria khua a kipan ka kiang ah a honsawl ua, ka omna inn mai ah a na ding nilouh uhi.

¹²Huan Kha in kuamah khentuam neilou a amau zui ding in a honsawl hi. Hiai unau guk in leng a honzui sam ua, huai mi inn ah ka lutta uhi.

¹³Huan aman ka kiang uah, a inn a angel kilak a muhdan leh angel in a kiang a, Joppa khua ah mi sawl a, Simon Peter a chih uh, pisak ding leh;

¹⁴‘Aman thu a honhilh ding a, huai mi thu in nang leh na inkuanpihte hotdam in na om ding uh’ a chih dan leng a honhilh hi.

¹⁵Huan thu ka gentung in, Kha Siangthou ka tung uah a hongtungta.

¹⁶Toupa thu, Johan in tui in a baptist zel; himahleh nou zaw Kha Siangthou a baptist in na om ding uh a chih k’on theikhenawn uhi.

¹⁷Huchi in Toupa Jesu Khrist i gintak ua, Pathian in thilthawnpiak a honpiak amau kiang a a piaksam, kei Pathian sel vual ka hi ahia?” a chi hi.

¹⁸Huai thu a zak un a daita ua, huchi ahihleh “Pathian in Jentelte leng hing ding a kisik phalta ahi ngei maw” chi in, Pathian a phat uhi.

¹⁹Huan Stephen ziak a sawina thuak dalhzakte, Phoinisia gam, Kupra tuikulh, leh Antiok khua pha in a pai ua, Judate kiang kia ah loungal kuamah kiang ah thu a gen kei uhi.

²⁰Himahleh a lak ua a khen tuh Kupra tuikulh leh Kurini khua a mite ahi ua, huai mite’n Antiok khua a tun un Grikte leng a houpih ua, Toupa Jesu Tanchinhoih a hilh samta uhi.

²¹Huan Toupa khut in amaute a panpih a; mi tampi in a gingta ua, Toupa lam a hong nga chiatta uhi.

²²Huan a tanchin thu uh Jerusalem khua a saptuam omte bil ah a lutta a: huchi in Antiok khaw pha in Barnaba a sawlkhia uhi.

²³Amah a vatung a, Pathian hehpihdan a muh in a kipak hi, phatuamngaitak in Toupa len gige ding in avek un a hanthawn hi.

²⁴Barnaba mi hoihtak ahi a, Kha Siangthou leh ginna a dim ahi. Huan mi tampi Toupa kiang ah a behlap in a omta uhi.

²⁵Huan Saul zong ding in Barnaba Tarsa khua ah a hoh hi.

²⁶A muh in Antiok khua ah a honpi hi. Huan kum khat hilhial saptuamte kikhopna ah a pang zel ua, mi tampi leng thu a hilh uhi. Antiok khua ah ahi nungzuite “Khristian” a chih masak pen uh.

²⁷Huailai in zawlnei kuahiam Jerusalem khua a kipan in Antiok khua ah a hohsuk hi.

²⁸A lak ua mi khat a min Agaba, ading a, khovel tengteng ah kial thupitak a tung dek chih Kha hilh in a theisak a; huai kial tuh Klaudia vaihawm lai in a hongtungta hi.

²⁹Huchi in nungzuite’n a theihdan chiat un Judia gam a unau omte kiang ah panpihna khak a tum uhi.

³⁰Huai tuh a hihta ngei uhi, Barnaba leh Saul khut ah upate kiang ah a khak uhi.