Read Paite Chin NASEPTE 12 Bible Online

NASEPTE 12 - Paite Chin bible

NASEPTE 12

¹Huailai in Kumpipa Herod in saptuamte lak a kuate hiam hihgim tum in a khut a likta hi.

²Huan Jakob, Johan unau, namsau in a satlum hi.

³Huai in Judate a kipaksak chih a theih in, Peter leng mat a tum zel hi. Huai ni tuh tanghou silngou sohlouh ni ahi.

⁴Huan a mat nung in suangkulh ah a khum a, sepaih pawl li, li chiat zel in, a venkhel sak hi; Paikan Ankuanglui nung in mi tengteng kiang ah pikhiak a tum hi.

⁵Huaiziak in Peter suangkulh ah a omsak tadih hi; himahleh, saptuamte’n amah ading in phatuamngaitak in Pathian kiang ah a thumsak uhi.

⁶Herod in a pikhiak ding zan in Peter sepaih nih kikal ah khainiang nih bun in a ihmu a; a vengte kongkhak bul a om in suangkulh a veng uhi.

⁷Ngai in, Toupa angel khat a kiang ah a hong ding a, suangkulh sung ah vak a hongtang hi; huan Peter nak ah a beng halh a, “Thou meng in” a chi hi. A khut a kipan khainiangte a tolh khesuk hi.

⁸Huan angel in a kiang ah, “Na puan silh inla, na khetuam bun in” a chi hi. Huan aman huchibang in a hih hi. Angel in a kiang ah, “Na puan silhhoih inla honzui in” a chi hi.

⁹Huan Peter a pawt a a zuita hi, angel tatdan a tak a hih a theikei a, mengmu bang a a muh hiam a kisa hi.

¹⁰Huan chingmi masa leh a zawm a khennung un, khopi lutna sik kongpi a vatung ua, huai tuh amau ading in a kihong tawmta hi; huan a pawt ua, kongzing khat a kheng ua; huai a kipan angel in a amah paisanta hi.

¹¹Huan Peter a halhtakin, “Herod khut leh Judamite lametna tengteng a kipan a honkhe ding a Toupa’n a angel hon sawlkhia ahi chih tuin diktak in ka theita” a chi hi.

¹²Huan a kingaihtuah khit in, Johan, Mark a chih uh, huai nu Mari inn ah a vahoh a; huai ah thum in mi tampi a na omkhawm uhi.

¹³Kongpi kongkhak a kiuh tak in, nungak khat a min Roda, a dawng ding in a va hoh hi.

¹⁴Peter aw a zaktak in a kipah ziak in kong honglou in a tailut nawn a, kongkhak bul ah Peter ading chih a vagen hi.

¹⁵Himahleh amau a kiang ah, “Hai neita ve” a na chi uhi. Aman bel, “Hi petmah ahi” chi in a pang teitei hi. Amau “Angel hi in teh” a chi uhi.

¹⁶Himahleh Peter in kongkhak a kiukiu a; a hon ua leh amah a mu ua, lamdang a sa uhi.

¹⁷Huchi in aman amaute dai ding in a khutvan a, Pathian in suangkulh a kipan amah a pikhiakdan a hilhta hi. “Hiai thute Jakob leh unaute kiang ah vahilh un” a chi hi. Huan a pawt a mun dang ah a vapai hi.

¹⁸Ni a hong suahtakin, sepaihte Peter tung a bang thil tung hiam, chi in buai chihtak in a buai uhi.

¹⁹Huan Herod in amah a zong a a mu kei hi, a vengtute a enchian a, thah ding in thu a peta hi. Huan Judia gam a kipan Kaisaria khua ah a hohsuk a, huai ah a om nilouh hi.

²⁰Huan Tura leh Sidon khua a mite tung ah Herod a lunghikei mahmah hi: amau thukhatsat in Blasta, kumpipa lupna ngakpa, a lawm in a bawl ua, kumpipa kiang ah hongpai ua, amah a kipan nek leh dawn ngah zel ahihman un a kholamte uh toh kilemna a ngen uhi.

²¹Huan a nichiam ni’n kumpipa Herod in kumpi puan a silh a, a mangtutphah a tuin amaute kiang uah thu a gen hi.

²²Mi tengteng in, “Hiai pathian aw ahi, mihing aw ahi kei” a chi ua, a kikou uhi.

²³Aman Pathian kiang a thupina a piaklouh ziak in Toupa Angel in amah a manpah a, hut in a ne a, a sita hi.

²⁴Pathian thu bel a dalh a, a pung zel hi.

²⁵Barnaba leh Saul in na a sepkhit un, Jerusalem khua a kipan a kiknawnta ua, Johan, Mark a chih uh, a tonpih uhi.