Read Paite Chin NASEPTE 13 Bible Online

NASEPTE 13 - Paite Chin bible

NASEPTE 13

¹Antiok khua a saptuam omte lak ah zawlnei leh thuhilhmi kuate hiam a om ua; huaite Barnaba, Niger a chih uh Simeon, Kurini khomi Lusia, kumpipa Herod toh khangkhawm Manaen leh Saul ahi uhi.

²Huan Toupa nasem a an a ngawllai un, Kha Siangthou in, “Barnaba leh Saul ka sapna nna sem ding in kei ding in hon koihtuam sak un” a chi hi.

³Huchi in an a ngawl ua, a thumkhit un a tung uah a khut uh a koih ua, a paisakta uhi.

⁴Huchi in Kha Siangthou sawlkhiak in a pai ua, Seliusia khua ah a hohsuk ua, huai a kipan in Kupra tuikulh ah long in a pai uhi.

⁵Salami khua a a omlai un Judate kikhopnain ah Pathian thu a gen ua; Johan leng amau panpih ding in a tonpih uhi.

⁶Huan tuikulhgam Papho khua pha in a nawksuak ua, bumsiam, zawlnei taklou, Judami khat a mu ua, a min tuh Bar Jesu ahi.

⁷Huai mi gamukpa Serjia Paulus, mi piltak kiang a om ahi. Huai gamukpa’n Barnaba leh Saul a sam a, Pathian thu zak a tum hi.

⁸Himahleh bumsiam Elima, kichi bel Bar Jesu a min khiakna ahi, amau nasep dal in gamukpa ginna a kipan heimang a tum hi,

⁹Huchi in Saul, Paul a chih uh; Kha Siangthou in a dim a, amah a ensal hi.

¹⁰“Nang, mi khem leh huathuai chiteng a dim Diabol tapa, diktatna tengteng melmapa aw, Toupa lam diktatte hihsiat na tawp kei ding maw?

¹¹Thei in, tuin Toupa khut na tung ah a tu hi, na mit a hongtaw ding a, bang tan hiam khovak na mu kei ding” a chi hi. Huchi in khomui leh mial in amah a khuhpah a, khut a kai ding mi zong in a mai puampuam hi.

¹²Huan gamukpa’n huai thilhih a mu a, Toupa sinsakna lamdang a sa mahmah a, a gingtata hi.

¹³Paul a tonpihte toh Papho khua a kipan in long in a pai ua, Pamphilia gam a Perga khua a tung uhi; huai ah Johan in amaute paisan in, Jerusalem khua ah a kiksan hi.

¹⁴Himahleh amau Perga khua a kipan a pai zel ua, Pisidia gam a Antiok khua a tung uhi; Khawlni’n kikhopnain ah a lut ua, a tu uhi.

¹⁵Dan leh zawlneite laibu a simkhit un, kikhopnain upate’n a kiang uah mi a sawl ua, “Unaute aw, mite hanthawnna thu banghiam na neih uh leh gen un” a chi uhi.

¹⁶Huan Paul ading a, a khut a zap in a gen hi; “Israel mite leh Pathian laudansiamte aw, ngai un:

¹⁷Hiai Israel chite Pathian in i pipute a tel a, Aigupta gam a a tamlai un a hihthupi a, ban thahat in amaute huai a kipan in a pikheta hi.

¹⁸Huan kum sawmli gamdai ah a thilhihte uh a thuak teitei hi.

¹⁹Kanan gam a nam sagihte a hihsiat khit in, a gam uh aisan a hawm a a luah ding un a pia hi.

²⁰Huaite nung kum za li leh sawmnga sung teng vaihawmmite a pe zel a, zawlnei Samuel huntan in.

²¹Huan huai nung in kumpipa a ngen ua; Pathian in, Saul kichi, Benjamin nam a Kish tapa, kum sawmli sung amau a pia hi.

²²Amah a suanmang nung in a kumpipa ding un David a bawlta hi; Pathian in huai thu theihsak in, David, Jesse tapa, ka lungtang bang pu mi ka mukheta, aman ka deihlam a hih ding, a chi hi.

²³Hiai mi suan a kipan in Pathian in a thuchiam bang in Israelte kiang ah Hondampa, Jesu kichi a hon dinkhia hi.

²⁴Amah a hong paima in Johan in kisikna baptisma thu Israel mi tengteng kiang ah a na hilh masa hi.

²⁵Huan Johan in a sepding a zoh kuan in, ‘Noute’n kei kua na honsa ua? Amah zaw ka hi kei hi. Himahleh ngai un, ka nung ah mi khat hongpai dek ahi, kei zaw a khepek a khetuam pheltak leng ka hi kei’ a chi hi.

²⁶“Mite leh unaute, Abraham suante leh Pathian laudansiam Jentelte tengteng aw, noute kiang ah hiai hotdamna thu piak in a omta hi.

²⁷Jerusalem khua a omte leh a makaite un, amah a theihlouh ziak ua siamlouh a tansak lai un, zawlneite thute khawlni teng a a simte uh tangtung sak a na hi uhi.

²⁸A sihna ding khop a tung ah bangmah a muhlouh un leng, Pilat kiang ah hihlup ding in a ngen uhi.

²⁹Huan a thu zawlneite’n a gelhkholh tengteng uh a hih tangtun khit un, sing a kipan in a lakhia ua, han ah a sialta uhi.

³⁰Himahleh Pathian in misi lak a kipan a kaithou nawnta hi:

³¹Huchi in Galili gam a kipan Jerusalem khua a amah toh hohtoute kiang ah ni sawtpi a kilak gige a; huai mite mah mi kiang a a thu theihpihte ahi uhi.

³²“Kou leng pipute kiang ah huai thuchiam a Tanchin kipahhuai k’on phuangzak uhi;

³³Huchi a Pathian in Jesu a kaihthoh, ei a tate kiang ah huai thuchiam tuh a hih tangtung hi; Sam nihna ah, ‘Nang zaw ka tapa na hi a, tuni in k’on neikhia hi,’ chih gelh bang in.

³⁴Muatna mun a painawnlou ding in Pathian in amah misi lak a kipan a kaihthoh ding danthusehsa bang in a gen hi, David kiang a hehpihna ka chiamte nangmah ka honpe ding, chi in.

³⁵Huaiziak in Sam dang ah, Na Mi Siangthou muatmang na phalkei ding, a chi behlap hi.

³⁶David zaw, Pathian vaihawmsak bang in amah khang hun a na a sepkhit in, a ihmu a, a pipute kiang ah a sial ua, a muatmangta hi.

³⁷Himahleh Pathian kaihthoh pen in zaw muatna a mu kei hi.

³⁸Huchi in unaute aw thei un; amah ziak in khelhna ngaihdamna thu na kiang ua gen ahi.

³⁹Kuapeuh a gingta tuh bangkim ah amah siamtansak in a om, huai lah Mosi dan in siamtansak in na om theikei uhi.

⁴⁰Huaiziak in pilvang un, huchilou in zaw zawlneite a a gen uh na tung uah a hongtung ding hi;

⁴¹Musitte aw, en un, lamdang sa unla, mangthang un; na damsung un nna khat ka sem hi, huai nna mi’n honhilh mahle uh, na gingta kei hial ding uhi chih” a chi hi.

⁴²Huan a pawt un, khawlni nawn chiang a huai thute gennawn ding in a ngen uhi.

⁴³Huan kikhawmte a kikhen tak un, Judate leh phungkaite Pathian limsak lak a mi tampi in Paul leh Barnaba a zuizel ua; amau a na houpih uhi, Pathian hehpihna ah om gige ding in a hanthawn hi.

⁴⁴Huan khawlni nawn in a khozang phial un Pathian thu ngaikhe ding in a hong kikhawm uhi.

⁴⁵Himahleh Judate’n mipite a muhtak un a haza mahmah ua; Paul thugente kalh in a gensia uhi.

⁴⁶Huchi in Paul leh Barnaba in hangsantak in a dawng ua, “Pathian thu noumau kiang ah gen masak ding him ahi; himahleh na nial ua, tangtawn a hingtaklou a na kiseh nung un, thei un, Jentelte lam ka ngata uh” a chi uhi.

⁴⁷Huchibang in Toupa’n thu a honpia hi, “Jentelte hihvakpa din ka honsep a, kawlmong pha a Hondampa dia na om theihna ding in ” chih gelh bang in, a chi hi.

⁴⁸Jentelte’n huai thu a zak un, a kipak ua, Toupa thu a pahtawi ua, tangtawn a hing ding a sehkholh peuhmah in a gingta uhi.

⁴⁹Toupa thu huai gam kimvel ah a dalhta hi.

⁵⁰Himahleh Judate’n numei zahtakhuai Pathian limsakte leh khua upate hanthawn in, Paul leh Barnaba sawisak in, a gam ua kipan a delhkhia uhi.

⁵¹Amau leng a tung uah a khepek ua leivui a singkhia ua, Ikoniam khua ah a paita uhi.

⁵²Huan nungzuite kipahna leh Kha Siangthou in a dim chiat uhi.