Read Paite Chin NASEPTE 14 Bible Online

NASEPTE 14 - Paite Chin bible

NASEPTE 14

¹Ikoniam khua ah Judate kikhopnain ah a luttuak ua, thu a genzel uhi, huchi in Judate leh Grik mipi tampi in leng a gingtata uhi.

²Himahleh gingta nuamlou Judate’n Jentelte lungsim a tokthou ua, unaute a hawsak uhi.

³Huaiziak in Toupa ah hangtak a thugen in huai ah sawtsim a om uhi. Aman chiamtehna leh thillamdangte a khut ua hihsak in, a hehpihna thu a theisak zel hi.

⁴Himahleh khua a mipite a kilangta ua, a khen in Judate a gum ua, a khen in sawltakte a gum uhi.

⁵Jentelte leh Judate a heutute utoh pangkhawm in sawltakte simmohhuaitak a bawl a suang a den a tuplai un,

⁶Amau a na thei ua, Lykonia gam mah ah Listra leh Darbi khua ah leh a kim gam ah a taimang uhi;

⁷Huai ah Tanchinhoih a gen zel uhi.

⁸Listra khua ah khe zaw kuahiam a tu a, a piantung apat khebai him ahi a, khe in a pai ngeikei hi.

⁹Huai min Paul thugen a ngaikhia a; huan Paul in a en gegu hi, “Damna ding in ginna a nei chih a thei a, aw ngaihtak in, na khe in dingtang in” a chi hi.

¹⁰Huan amah a tawm a, khe in a paita hi.

¹¹Mipite’n Paul thilhih a muh un, Lykonia pau in aw ngaihtak in, “pathiante mihing bang in i kiang uah hongsukta uh e!” a chi uhi.

¹²Amaute’n Barnaba pen, ‘Jupiter’ a chi ua, Paul bel thugen pen a hih ziak in ‘Hermes’ a chi uhi.

¹³Huan Jupiter siampu khopi pawlam a om leh mipite’n bawngpate leh pakkhigui limte kongkhak kiang a hontawi in, amau biakna ding in lat a tum uhi.

¹⁴Himahleh sawltak Barnaba leh Paul in huai a zak un, a puan uh a botkek ua, mipi lak ah a dianglut ua, a kikou uhi.

¹⁵“Pute aw, hiai thilte bangdia hih na hi ua? Kou leng noumau hindan kibang pu mihing ka hive ua le: hiai thil ginaloute na kiheisan ua, van, lei, tuipi, leh asung ua om tengteng bawlpa Pathian hing kiang a n’ong kiheina ding un Tanchinhoih k’on tun uhi.

¹⁶Pathian in nidanglai in namchih amau lampi chiat zuih a phal hi.

¹⁷Himahleh amah theihsakna omlou in a kibawl kei hi, huchi in thil a hihhoih zel a, van a kipan in vuahtui a honpia a, na lungtang uh nekding leh kipahna in a hihdim gige a kei hiam” a chi uhi.

¹⁸Huchi in huai thu in mipite’n amaute biakna dia gan a goh ding uh a kham zou teitei hi.

¹⁹Himahleh Antiok leh Ikoniam khua ah Judami kuate hiam a hong ua, mipite a khempukta uhi; huchi in suang in Paul a deng ua, si a a gintak ziak un khua a kipan a kaikheta uhi.

²⁰Himahleh nungzuite a kim a a dinlai un, a hong thou a, khua ah a lut nawnta hi. Huan a zing in Barnaba toh Darbi khua ah a paita uhi.

²¹Huan huai khuate kiang ah Tanchinhoih a hilh ua, nungzui tampi a bawlnung un Listra, Ikoniam leh Antiok khua ah, a kiknawn uhi.

²²Gim tampi thuak in Pathian gam i lut ding ahi him ahi, chi in, nungzuite lungsim a hihkip ua, ginna a om gige ding in a hanthawn uhi.

²³Huan saptuam pawl teng ah upate a sehsak ua, anngawl kawm a a thumkhit un, a gin uh Toupa kiang ah a kemsak zelzel uhi.

²⁴Pisidia gam a tawnsuak ua, Pamphilia gam a tung uhi.

²⁵Perga khua a thu a genkhit un Attalia khua ah a hohsuk uhi.

²⁶Huai a kipan in long in a pawt ua, Antiok khua a hongtung nawnta uhi. Huai mun ahi tua a thilhih khitsa uh hih ding a unaute’n Pathian hehpihna a kemsak a a sawlkhiakna uh.

²⁷Huan a tunnung un a saptuamte a samkhawm ua, Pathian in, amaute zang a a thilhihte leh Jentelte adia ginna kongkhak a honsak dan a hilh uhi.

²⁸Huan nungzuite kiang ah sawtsim a omta uhi.