Read Paite Chin NASEPTE 15 Bible Online

NASEPTE 15 - Paite Chin bible

NASEPTE 15

¹Mi kuate hiam Judia gam a kipan in a hongsuk ua unaute kiang ah, “Mosi dan bang a zek na sumkei uleh hotdam na hi theikei ding uh” chi in, a hong gen uhi.

²Huchi in Paul leh Barnaba in amaute kalh in nakpitak a kisel in a kilan ziak un, Paul leh Barnaba, a lak ua kuate hiam toh, huai thubuai dongchian ding in Jerusalem ah sawltakliante leh upate kiang ah hohtou ding in a sep uhi.

³Huchi in Saptuamte’n a vakha ua amau Jentelte kiheikik nawndanthu genzel in, Phoinisia gam leh Samari gam a tawnsuakta uh; huchi in unaute tengteng a kipaksak mahmah uhi.

⁴Jerusalem khua a tun touh un Saptuam pawlte, sawltakte, upate’n a na kipahpih ua; Pathian in amau zang a a thilhihte a gengen uhi.

⁵Himahleh Pharisai pawl a mi gingta kuate hiam a kisa ua, “Jentelte zeksum ding leh Mosi dan a zuihchiat ding uh ahi” a chi uhi.

⁶Huan sawltakliante leh upate, huai thu ngaihtuah ding in a kikhawm uhi.

⁷Nakpi a a kisel nung un Peter a dingtou a, a kiang uah, “Mite leh unaute aw, Jentelte’n keimah kam a Tanchinhoih thu za a gingta ding a, Pathian in nidanglai a na lak ua kipan a a hon sehdan na thei uhi.

⁸Lungsim theipa Pathian in eite honpiak bangmah in Kha Siangthou a kiang ua pesam in a tung uah a kipak chih a theisak hi;

⁹Huan eite leh amau khentuam neilou in ginna in a lungsim uh a hih siangthou hi.

¹⁰Huchi in i pipute leh eite’n i zuih zohlouhsa hakkol tun ah nungzuite tung a ngaktum a bangdia Pathian kalh na hi ua?

¹¹Amau gintak bangmah in eite’n leng Toupa Jesu hehpihna ziak a hotdam ding hi in i kigingta ngal ua” a chi hi.

¹²Barnaba leh Paul in, amaute zang a Pathian in Jentelte lak a chiamtehna leh thillamdang a hih thu a genlai un mipite’n ngaikhia in a dai sipsip uhi.

¹³Huchi a mipite a daih sipsip lai un Jakob in a dawng a, “Unaute aw, ka thu ngaikhia un, chi in a gen sam hi,

¹⁴Simeon in Pathian in amah min pu ding leh a lak ua kipan mite lakhe ding in Jentelte a veh tungthu a genta hi.

¹⁵Huai thu leh zawlneite thu, gelh a omsa toh a kituak hi.

¹⁶Huai khitchiang in ka kiknawn ding a, David biakbuk chimsia ka bawlnawn ding a, a siatna lai ka puah ding a, ka tungding nawn ding;

¹⁷Midang a omsunte leh ka minpu Jentelte ka min kikoppih te’n, Toupa a zonna ding un huai thilte tengteng ahihta hi, chi in.

¹⁸Khovel siamchil a kipan hiai thu theisakpa Toupa’n a chi, chih gelh ahi.

¹⁹Huaiziak in Jentelte lak a Pathian lamngate hihgim keini chih ka thusawm ahi.

²⁰Milim biakna sanek, kingaihna nin, sa heklup leh sisan nek a tawpsanna ding un a kiang uah laigelh zaw lehang, ka chi pen hi.

²¹Mosi dan lah nidanglai a kipan khaw teng ah a thu tangkoupih a hih ban ah kikhopnain peuh ah khawlni teng in a thu sim ahi” a chi hi.

²²Huan sawltakte, upate, saptuam tengteng toh, a pawl ua mi tel, Paul leh Barnaba kiang ah Antiok khua a hohsak hoih a sa ua; a telte uh min Judas, Barnaba a chih uh leh Sila ahi ua, huai mite unaute lak a heutu deuh ahi uhi.

²³Hichibang in a gelh ua, a khut uah a khak uh: “Sawltakte leh unaute lak a upate’n Antiok khua, Suria gam leh Silisia gam a Jentel unaute chibai a buk uhi.

²⁴Ka pawl lak ua mi kuate hiam in noute kiang a thugen in, Zeksum ding leh Mosi dan zuiding in a hon hihbuai ua, na lungsim uh a hon mangbangsak uh chih ka za ua, amaute hiai thu gen ding in ka sawl kei uhi.

²⁵Huaiziak in thukhatsat a ka kikhop un, ka deihtak uh Barnaba leh Paul,

²⁶Toupa Jesu Khrist min ziak a sih khawk saloute toh, mi telte na kiang ua honsawl hoih ka sa uhi.

²⁷Huchi in Judas leh Sila k’on sawl uhi, amau leng hiai thu mah kam in a honhilh ding uhi.

²⁸Hiai thu poimawhte ka gelhte uh chih louhngal Kha Siangthou leh koute’n puakgik tuan na tung uah bangmah nga kei le ung hoih ka sa uhi:

²⁹Milim biakna sa nek, sa sisan nek leh kingaih tawpsan le uchin ka chi uh; hiaite na tawp uleh nou ading in a hoih ding hi. Damtakin om un” chi in.

³⁰Huchi in a sawl un a kuan ua, Antiok khua a tungsuk ua; mipi a samkhawm ua, lai a pia uhi.

³¹Huan a simkhit un lungmuanna thu ziak in a kipak mahmahta uhi.

³²Judas leh Sila in, zawlnei leng ahi ua, thu tampi in unaute a khamuan ua, a hihkip uhi.

³³Huan huai ah sawtkhop a om nung un amau sawltakte kiang a pai nawn ding in, unaute’n khamuangtak in a pawtsak nawnta uhi.

³⁴Bangteng hileh Sila in bel a kiang ua omtakdih hoih a sa hi.

³⁵Paul leh Barnaba bel midang tampite toh Antiok khua ah Toupa thuhilh leh gen in a om nilouh uhi.

³⁶Huan ni bangzah hiam nung in Paul in Barnaba kiang ah, “Khoteng a Toupa thu i genna peuh a unau omte vaveh nawn in, a omdan uh va en lehang,” a chi hi.

³⁷Barnaba in Johan, Mark a chih uh, a kiang ua tonpih a tuma;

³⁸Himahleh Paul in bel aman Pamphilia gam a amau a kiksan a, nasepna a a kiang ua a hohlouh ziak in tonpih hoih a sa kei hi.

³⁹Huchi in nakpi’n a kiselta ua, huan a kikhen ua Barnaba in Mark a tonpih a, Kupra tuikulh lam ah long in a paita hi.

⁴⁰Paul in Sila a tel a, unaute’n Toupa hehpihna a kepsak nung un a paikheta uhi.

⁴¹Huan saptuam pawlte hihkip zel in Suria leh Silisia gam a tawnsuak uhi.