Read Paite Chin NASEPTE 16 Bible Online

NASEPTE 16 - Paite Chin bible

NASEPTE 16

¹Huchi in Darbi khua leh Listra khua ah leng a hoh a; huai ah nungzui khat a min Timothi a om hi. Amah gingta Juda numei tapa, a pa bel Grik ahi;

²Listra leh Ikoniam khua a unau omte’n amah a phat mahmah uhi.

³Paul in a kiang a hohsam ding in a deih a; huchi in huai a Juda omte ziak in zek a sumsak a, a pa Grik ahi chih a thei vek uhi.

⁴Khoteng a a paikawm un Jerusalem khua a sawltak leh Upa omte vaihawm zui ding in unaute kiang ah thupiak zuih ding a pe zel uhi.

⁵Huchi in ginna ah saptuam pawlte a kipta ua, niteng in a khang deuhdeuh uhi.

⁶Huan Kha Siangthou in Asia gam a thugen a kham ziak in Phrigia leh Galatia gam a tawnsuakta uhi.

⁷Mysia gam a hong tunnung un, Bithinia gam a lut a tum ua; himahleh Jesu Kha in a phalkei hi.

⁸Huchi in Mysia gam a tawn in Troas khua ah a hohsukta uhi.

⁹Zan in Paul in mengmu bang in Masidonia gam a mi khat ding a, “Masidonia gam ah hong kai inla, hong huh in” chi a thumthum in a mu hi.

¹⁰Huan huai mengmuhna a neihkhit in a kiang ua Tanchinhoih gen ding in Pathian in a honsam ahi chih kichiantak a thei in, Masidonia gam ah hoh ka tumpah uhi.

¹¹Huan Troas khua a kipan long in ka pawt ua, tangtak in Samothrasi khua ah ka pai ua, a zing in Neapoli khua ah ka pai nawn uhi;

¹²huai a kipan in Phillippi khua ah ka pai ua, huai khua tuh Masidonia gam a khua khat Rome khua a mipemte khua ahia, huai uk a khaw poimawh pen ahi. Huai khua ah ni tamsim ka tamta uhi.

¹³Huan khawlni’n kulh kongkhak pawlam ah luigei ah, thumna mun hi a ka gintakna uah ka hoh ua; huan ka tu ua, numei hong paikhawmte kiang ah thu ka gen uhi.

¹⁴Huan a min Lidia, puan sandup zuak, Thaitira khomi, Pathian bia numei khat in ka thu uh a za a; huan Paul thugen zui ding in Toupa’n a lungtang a hih vaksakta hi.

¹⁵Amah leh a inkuanpihte’n baptisma a tankhit un, “Toupa a ginom a n’on seh uleh ka inn ah hongtung un” chi in, a hon ngen a, a hon khou hi.

¹⁶Huan thumna mun a ka hohlai un, nungak kuahiam dawi aisansiam zawl in a hon kituahpih a, aman a aisan ziak in a pute sum tampi a muhsak zel hi.

¹⁷Huai mi in Paul leh kou a honzui a, “Hiai mite, hotdamna lampi nou honhilhte, tungnungpen Pathian sikha ahi uh” chi in, a kikou hi.

¹⁸Huchibang in ni tampi a hih hi. Huchi in Paul a lungkimta kei a, a kihei a dawi kiang ah, “Jesu Khrist min in asung a kipan pawt thu ka honpia” a chi hi. Huchi in a hongpawt khepah hi.

¹⁹Huan a pute’n a summuhna uh a mang chih a theihtak un, Paul leh Sila a man ua, heutute ma ah dawlmun ah a kailut uhi.

²⁰Huchi in vaihawmte kiang ah a pi ua, “Hiai mite Judate ahi uh, ka khua uh a hihbuai mahmah uhi;

²¹Rome mite adia kipahpih huailou leh zuih siangloute chindan a gengen uh” a chi uhi.

²²Huchi in mipite sawltakte sual ding in a hong dingkhia ua, vaihawmte’n a puanuh a sahkeksak ua, chiang a satding in thu a pia uhi.

²³Huan tamvei pi a satkhitun suangkulh ah a khum ua, a vengpa kiang ah bittaka ven ding a chi bikbek uhi.

²⁴Huchitel a thu a piak ziak un aman tanna sungnung ah a khum a, a khe uh singkol a bunsak hi.

²⁵Himahleh zanlai in, Pathian kiang ah Paul leh Sila a thum ua, la a sa ua, hentate’n a ngaikhia uhi;

²⁶Thakhat in zin nakpitak in a hongling a, huchi in suangkulh suangphumte tan in a lingsak a, kongkhak tengteng a kihong paha, saltang chih kolbutte a kiphel vekta hi.

²⁷Huan a sungkul vengpa ihmu a honghalh a, suangkulh kongkhakte kihong in a mu a, hentate taimang uh a sa a, a namsau a dok a, a kithat dek hi.

²⁸Himahleh Paul, aw ngaihtak in a kikou a, “Bangmah kichih ken, ka vek un hiai ah ka omlai uhi” a chi hi.

²⁹Huan suangkul vengpan khawnvakte a zong a, asung a tawmlut in, ling kawm in Paul leh Sila ma ah a khupboh hi;

³⁰amaute a pikhia a, “Pute aw, hotdama om ding in bang ahia ka hih ding?” a chi hi.

³¹Huan amau, “Toupa Jesu ging inla, huchi in hotdam in na om ding, nang leh na inkuanpihte toh” a chi uhi.

³²Amah leh a inn a omteng kiang ah Toupa thu a gen uhi.

³³Huai zanlai mah in a pikhia a, a satna golhte uh a silsiang a; amah leh a inkuanpihte tengteng in baptisma a tang uhi.

³⁴A inn ah a pitou a nekding a lui a, Pathian a gintak ziak un, amah leh a inkuanpihte, a kipak mahmah uhi.

³⁵Nisuahin vaihawmte’n, mimante sawl in, “Huai mite khahin” a chi uhi.

³⁶Suangkulh vengpan, Paul kiang ah a thu uh a hilh a, “Vaihawmte’n nou khah ding in mi a honsawl uhi; huaiziak in tu’n hongpawt unla, khamuangtak in paita un” a chi hi.

³⁷Himahleh Paul in, a kiang uah, “Rome khomi ka hi ngal ua, ka siamna uleh siamlouhna uh theilou in vantang mitmuh in n’on sat ua, suangkulh ah na honkhum ua; tun ah a guk a hon delhkhe dek na hi u maw? A hi kei ding; amau mahmah hong uhenla hong pikhia uhen” a chi hi.

³⁸Huchi in mimante’n huai thute vaihawmte kiang ah a hilh uhi. Rome mite ahi uh chih a zakun a lauta uhi;

³⁹A vahohin a vakun ua, a pikhia uhi, khua a kipan paimang ding in a deih uhi.

⁴⁰Huan suangkulha kipan a pawt ua, Lidia inn ah a lut uhi: Unaute a muh un, a khamuan ua, a pawtta uhi.