Read Paite Chin NASEPTE 17 Bible Online

NASEPTE 17 - Paite Chin bible

NASEPTE 17

¹Amphikoli khua leh Appo lonia khua tawn in, Thessalonika khua a tungta uh, huai ah Judate kikhopnain a om hi;

²Paul, a dan ngeina bang in, a kiang uah a lut a, khawlni thumvei Laisiangthou a kipan in teltak in a sutpih hi.

³Khrist in gimthuak ding him a hihdan leh misi lak a kipan a thounawn ding a hihdan hilhchianin, a hihlang zel hi. “Hiai Jesu, a thu k’on hilh, amah Khrist ahi” chi in a gen behlap hi.

⁴Huchi in a lak ua khenkhat in a gingta ua, Pathian limsak Grik mipi thupitak leh numei makai tampi toh Paul leh Sila a kithuahpihta uhi.

⁵Himahleh gingtalou Judate’n a mullit ua; dawlmun a migilou thadah kuate hiam a kiang uah a tonpih ua, mipi samkhawm in khua pumpi a tokbuai ua, Jason inn a luh ua, vantang kiang a pikhiak a tum uhi.

⁶Amau a muhlouh tak un Jason leh unau dang kuate hiam khaw heutute kiang ah a kailut ua, a kikou ua, “Khovel tokbuai a lumlette hiai ah a hong uhi”

⁷Jason in a na zintun a; hiai mite’n Kaisar vaihawmna kalh in kumpipa dang khat, a min Jesu a om a chi uhi.

⁸Huan mipi leh khaw heutute’n huai thu a zak un a buaita uhi.

⁹Jason leh midangte tatkhiakna ding banghiam a la ua, amau tuh a khahta uhi.

¹⁰Huan unaute’n a zanzan in Beriah khua ah Paul leh Sila a paisak pah ua; huailai a vatun un Judate kikhopnain ah a lut uhi.

¹¹Huai mite Thessalonika khuate sang in a na hoihzaw ua, huchi in lungsim kipaktak in thu a pom ua, a thugen uh a dik leh diklouh theihna ding in niteng in Laisiangthou a zong zel uhi.

¹²Huchi in huaite mi tampi in a gingtata uhi; Grik numei zahtakhuai leh pasalte leng tampi mahmah in a gingtata uhi.

¹³Himahleh Thessalonika khua a Judate’n, Paul in Beriah khua ah Pathian thu a gen chih a zaktak un, huai ah leng a vahoh ua, mipite hanthawn in, a hihbuai nawn uhi.

¹⁴Huchi in unaute’n tuipi tan a pai ding in Paul a sawlkhia ua, Sila leh Timothi bel huai ah a omtadih uhi.

¹⁵Paul pitute’n Athen khua tan in a pi ua; Sila leh Timothi kintak a a kiang a hongpai ding a thukhah pua in a paikikta uhi.

¹⁶Huan Paul in Athen khua a amau a nangak lai in, huai khua milim pathian a dim in a mu a, a lungtang in na a sa mahmah hi.

¹⁷Huchi in kikhopnain ah Judate leh Pathian limsakte a houlimpih zel a, dawlmun ah leng huai a na om peuhmahte toh niteng in a kihoulim zel uhi.

¹⁸Huan Epikuria mi leh Stok mi lak a mi pil kuate hiam in leng amah a hong kiselpih uhi. “Hiai mi kamtam in bang ahia gen a tup?” a chi ua, a khen in “Jesu thu leh thohnawnna thu a genziak in gamdang pathiante thugenpa a hihtuak e” a chi uhi.

¹⁹Amah a len ua, Areopaga ah a honpi ua, a kiang ah, “Hiai sinsakna thak na gengen n’on theisak thei diam?

²⁰Thil lamdang banghiam ka bil uah na hontun ahi; huchi in, hiai thil omdan theih ka ut uh” a chi uhi.

²¹Athen khomi tengteng, huai a mikhualte toh, a man peuh ua leh thu thak photphot gen hiam, a ngaikhia ding in a hunte uh a zang zel uhi.

²²Huchi in Areopaga laitak ah Paul ading a, “Nou Athen khua a mite aw, bangkim ah sabiak limsaktak mi na hi uh chih ka thei hi.

²³Ka vakkawm a, na biaknate uh ka etlai in, maitam khat, a tung a, ‘Theihlouh Pathian’ ading, chi a kigelh, ka mu ahi. Huchi in theilou a na biak uh, huai thu k’on hilh ahizaw hi, a chi hi.

²⁴Pathian khovel leh asung a thil tengteng siampa, lei leh van Toupa a hih ziak in khut a lam inn peuh ah a omkei hi.

²⁵Thil tasam bang in mihing khut a nasepsak in leng omkei, amah mah bangkim kiang a hinna, hatna leh thil tengteng pepa ahizaw hi.

²⁶Huan leitung maikaih teng a om ding in bul munkhat vek in namchih a siam a, amau ading in hunbi a sehsak a, tenna ding gamgi a khunsak hi.

²⁷Aman hon gamlat keimah leh mitengteng in Pathian a zon ua a mai a mai ua, a muh teiteina ding ua a lemgel ahi.

²⁸Noumau laphuahsiam kuate hiam in leng, ‘ei leng a suante i hi uh, chi a a genbang un. Amah vang in i hing in i tang in, i om uhi.’

²⁹Huchi in ‘Pathian suante i hihnung, Pathian dangkaeng peuh, dangka peuh, suang peuh, mihing khutsiam leh suktuah sekte bang ahi chih i gingta ding uh ahi kei hi.’

³⁰Huchi in Pathian in i theihlouh laikhawng a kitheihmohbawl a; himahleh, tun ah zaw gamchih a mi tengteng kisik ding thu a peta hi, ni a chiam ziak in.

³¹Huai ni chiang in Pathian in a miseh zang in dikna in khovel vai a hawm ding; a miseh tungthu amah misi lak a kipan a kaithou in, mitengteng kiang ah a theisakta hi” a chi hi.

³²Huan misi thohnawnna thu a zaktak un, a khen in a nuihsan ua; a khen in, “Hiai thu na kiang ah ka ngaikhe nawn ding uh” a chi uhi.

³³Huchi in Paul tuh a lak ua kipan a pawtta hi.

³⁴Himahleh mi kuate hiam amah lam ah a pang chinten ua, a gingtata ua, huailak a khenkhat Areopaga mi Dionisia leh numei khat a min Damari leh a kiang ua midangte toh ahi uhi.